ডিজিটেল ডেস্কঃ শুনিবলৈ বা পঢ়িবলৈ বেয়া লাগিলেও সম্প্ৰতি দেশখনত ধৰ্ষণৰ সংখ্যা বৃদ্ধি পোৱাৰ ৰুঢ় সত্য মানি ল’বই লাগিব প্ৰতিজনে৷ বিহাৰত শেহতীয়াকৈ সংঘটিত হোৱা এনে নাৰকীয় কাণ্ডই পুনৰ লজ্জানত কৰিছে মানৱতাক৷ 

এগৰাকী কিশোৰীক ধৰ্ষণ কৰি ট্ৰেইনৰ পৰা পেলাই দিলে ৬ ধৰ্ষণকাৰীয়ে৷। ধৰ্ষণকাৰী আটাইকেইজন নাবালক৷ ইয়াৰে এজন অভিযুক্তক গ্ৰেপ্তাৰ কৰিছে আৰক্ষীয়ে৷ বাকী ৫ জন ধৰ্ষণকাৰী পলাতক হৈ আছে৷ 

ধৰ্ষিতা কিশোৰীগৰাকী বৰ্তমান চিকিৎসালয়ত ভৰ্তি হৈ আছে৷ বিহাৰৰ লখিচৰাই গাৱঁত শনিবাৰে ৰাতি সংঘটিত হয় এই ঘটনা৷ ৰাতি শৌচ কৰিবলৈ ঘৰৰ পৰা বাহিৰলৈ ওলাই যাওতেই কিশোৰেগৰাকীক লগত সংঘটিত হয় এই নাৰকীয় কাণ্ড৷

ধৰ্ষণৰ ফলত অচেতন হৈ পৰে কিশোৰী৷ সংজ্ঞা ঘূৰাই পাওঁতে চলন্ত ৰেলত নিজক আৱিষ্কাৰ কৰে কিশোৰীগৰাকীয়ে৷ পিছত ট্ৰেইনৰ পৰা পেলাই দিয়ে কিশোৰীগৰাকীক৷ 

তাৎপৰ্যৰ কথা যে উক্ত ৬ ধৰ্ষণকাৰী কিশোৰীগৰাকী অধ্যয়ন কৰা বিদ্যালয়ৰে ছাত্ৰ৷ ৰেলৰ পৰা পেলোৱাৰ ফলত কিশোৰীগৰাকীৰ দেহৰ ৫ ডাল হাড় ভাঙিছে৷ তদুপৰি কিশোৰীগৰাকীৰ গোপনাংগত ২৪ টা চিলাই কৰা হৈছে৷ কিশোৰীগৰাকীক পাটনা চিকিৎসা মহাবিদ্যালয়ত ভৰ্তি কৰা হৈছে৷

(সম্পাদকৰ টোকাঃ এনে ঘটনাই বাৰে বাৰে সভ্য সমাজক কলংকিত কৰি আহিছে। বিগত কিছুদিন ধৰি আমাৰ ৰাজ্যখনৰ লগতে সমগ্ৰ দেশতে ক্ৰমাৎ বৃদ্ধি পাবলৈ লৈছে এনে ঘটনা। তালৈ চাই এইধৰণৰ ঘটনাৰ বা-বাতৰিবোৰ প্ৰকাশ কৰাতো উচিত নে অনুচিত সেই লৈ পঢ়ুৱৈসকলৰ মাজত চৰ্চা চলা দেখা গৈছে। বিষয়টো সম্পৰ্কত সিদ্ধান্তত উপনীত হোৱাতো সহজ নহয় যদিও এটা কথা ক'ব পাৰি যে সংবাদ মাধ্যম হৈছে সমাজৰ দাপোণস্বৰূপ। সমাজত যিবোৰ ঘটে সেইবোৰ দাপোণস্বৰূপ সংবাদ মাধ্যমত প্ৰতিফলিত হোৱাটোৱেই স্বাভাৱিক।)