ডিব্ৰুগড় :কিশোৰীৰ বিকশিত বয়সৰ লগে লগে কেনেধৰণে সমাজ ব্যৱস্থাৰ সৈতে চলা ফুৰা,সচেতনতা অৱলম্বন কৰাত গুৰুত্ব প্ৰদান কৰিব লাগে তাৰ প্ৰতি বিশেষ সজাগতাৰ বাবে কালি দিনযোৰা কাৰ্যসূচীৰে ডিব্ৰুগড় জিলাৰ খোৱাং শিশু বিকাশ প্ৰকল্প বিষয়াৰ কাৰ্য্যালয়ৰ সৌজন্যত খোৱাং কমিউনিটি হলত উদযাপন কৰা হয় কিশোৰী দিৱস।
ডিব্ৰুগড় জিলা শিশু আৰু মহিলা কোষৰ তত্বাৱধানত আৰু ইউনিচেফৰ সহযোগত অনুষ্ঠিত এই কাৰ্যসূচীত খোৱাং প্ৰাথমিক স্বাস্থ্য কেন্দ্ৰৰ ডাঃ ঘনশ্যাম সোনোৱালে ভাগ লয়। কেইবা শ কিশোৰীৰ বি এম আই পৰীক্ষা কৰি ইয়াৰ প্ৰয়োজনীয়তা সম্পৰ্কে বুজাই দিয়ে ।
ইফালে, কাৰ্যসূচীত খোৱাং সংহত শিশু প্ৰকল্প বিষয়া জ্যোতিৰেখা বৰগোহাঁয়ে আঁত ধৰা এক বৈঠকত আকস্মিক বক্তৃতা, স্মৃতি শক্তি পৰীক্ষা, কুইজ প্ৰতিযোগিতা আদি অনুষ্ঠিত কৰি কিশোৰীসকলক জীৱনশৈলীৰ শিক্ষাদানৰ ব্যৱস্থা কৰা হয়।
পুৱা মৰাণ মহিলা মহাবিদ্যালয় অৱসৰপ্ৰাপ্ত প্ৰতিষ্ঠাপক অধ্যক্ষা ড' সুখ বৰুৱাই বন্তি প্ৰজ্বলন কৰি আৰম্ভ কৰা অনুষ্ঠানত ইউনিচেফৰ জিলা শিশু আৰু মহিলা কোষ আৰু খোৱাং সংহত শিশু বিকাশ প্ৰকল্পৰ ফিল্ড লেভেল মণিটৰ ছৈয়দা নিহাদ ফাৰহিন আৰু প্ৰকল্পৰ ছুপাৰভাইজাৰ জেছমিন আৰা বেগমৰ লগতে সংহত শিশু বিকাশ প্ৰকল্পৰ মুখ্য সেৱিকাসকলৰ তত্বাৱধানত অনুষ্ঠানসমূহ পৰিচালিত হয়।
পুৱা প্ৰধানমন্ত্ৰীৰ স্বচ্ছতা অভিযানৰ প্ৰতি দায়বদ্ধতা প্ৰকাশ কৰি প্ৰকল্পৰ সমূহ কৰ্মচাৰীয়ে এক চাফাই অভিযানো চলায়।