বিহালীঃ বিহালীত সংঘটিত হৈছে এক চাঞ্চল্যকৰ দলবদ্ধ ধৰ্ষণ কাণ্ড ৷ শেহতীয়াকৈ পোহৰলৈ অহা এই ধৰ্ষণ কাণ্ডই তীব্ৰ জোকাৰণিৰ সৃষ্টি কৰিছে বিহালীত৷
জানিব পৰা মতে, যোৱা ৩ জুলাইৰ নিশা প্ৰায় ১২বজাত তিনিজনীয়া পাষণ্ডৰ দলে গভীৰ নিশা অতি সংগোপনে বাসগৃহত প্ৰৱেশ কৰি নিদ্ৰাৰত এগৰাকী ২৪ বছৰীয়া যুৱতীক মুখত কাপোৰ বান্ধি বিচনাৰ পৰা উঠাই নিয়ে। শোৱাপাটীৰ পৰা এনেকৈ উঠাই নি বাসগৃহৰ নাতি দূৰৈত বাটতে যুৱতীগৰাকীক আৰু কেইজনমানৰ সৈতে লগ হৈ ধৰ্ষণ কৰে৷
ধৰ্ষণ কৰি দলটোৱে মঞ্জিত মণ্ডল নামৰ ধৰ্ষণকাৰীজনৰ ঘৰত যুৱতীগৰাকীক শুবলৈ জোৰ কৰে৷ কিন্তু শুবলৈ অমান্তি হোৱাত মঞ্জিত মণ্ডলে অতি নিৰ্মমভাৱে প্ৰহাৰ কৰি যুৱতীগৰাকীক নিজ বাসগৃহলৈ পঠিয়াই দিয়ে।
ভূক্তভোগী যুৱতীগৰাকীয়ে জনোৱা মতে, নিদ্ৰাৰত অৱস্থাত শোৱাপাটীৰ পৰা মুখত কাপোৰ বান্ধি উঠাই নিয়া কাৰ্যত জড়িত আছিল জীতেন মণ্ডল আৰু ৰাজু মণ্ডল নামৰ দুই যুৱক৷ ইফালে, ঘটনা সন্দৰ্ভত নিৰ্যাতিতা যুৱতীগৰাকীয়ে যোৱা ৪ জুলাইত বিহালী আৰক্ষী থানাত ৮ টা পাষণ্ডৰ নাম ঠিকনা উল্লেখ কৰি এখন এজাহাৰ দাখিল কৰে ৷
বিহালী আৰক্ষীয়ে এজাহাৰৰ ভিত্তিত ধৰ্ষণকাৰী মঞ্জিত মণ্ডলক আটক কৰি আজি জেল হাজোতলৈ প্ৰেৰণ কৰে ৷ আনহাতে বাকী কেইটা অভিযুক্তই বৰ্তমানো মুকলি আকাশৰ তলত মুক্তমনে ঘূৰি থকাত আৰক্ষীৰ ভূমিকাক লৈ সন্দেহ প্ৰকাশ কৰিছে অঞ্চলবাসীয়ে।