বালিপৰাঃ শোণিতপুৰ জিলাৰ ৰঙপৰাৰ বৰজুলিত নৈত গা ধুবলৈ গৈ সলিল সমাধি ঘটে এগৰাকী সপ্তম শ্ৰেণীৰ ছাত্ৰীৰ। প্ৰাপ্ত বাতৰি মতে, অঞ্জলি পাত্ৰ নামৰ কিশোৰীগৰাকীয়ে বান্ধৱী এগৰাকীৰ সৈতে বৰজুলি নৈৰ পাৰত গা ধুই আছিল।
সেই সময়তে অসাৱধানবশতঃ পাৰত গা ধুই থকা বান্ধৱীগৰাকী পিছলি নৈত পৰি যায়। লগে লগে নৈৰ সোঁতত বান্ধৱীগৰাকী ডুবিবলৈ ধৰে।
বান্ধৱীগৰাকী এনেদৰে পানীত ডুব যাবলৈ ধৰা দৃশ্য দেখি উদ্ধাৰ কৰিবলৈ বুলি নিজেও পানীত জাপ দিয়ে। সাঁতুৰি গা কোনোমতে তেওঁ বান্ধৱীগৰাকীক বছাবলৈ সমৰ্থ হয়।
কিন্তু হঠাৎ চাকনৈয়াত পৰি পাৰলৈ আৰু উঠি আহিব নোৱাৰিলে বান্ধৱীৰ জীৱন ৰক্ষা কৰিবলৈ সমৰ্থ হোৱা অঞ্জলি।
পিছত ৰাইজে গা ধোৱা ঘাটৰ পৰা কিছু দূৰৈত অঞ্জলিৰ মৃতদেহটো উদ্ধাৰ কৰে। এনেদৰে পানীত উটি যোৱা বান্ধৱীৰ জীৱন ৰক্ষা কৰিবলৈ গৈ নিজেই কিশোৰীগৰাকী মৃত্যুমুখত পৰা ঘটনাই সকলোকে মৰ্মাহত কৰি তুলিছে।