ডিজিটেল ডেস্কঃ অৱশেষত অন্ত হ’ল অপেক্ষাৰ। এক দেশ এক কৰ নীতিৰে দেশত সূচনা হ’ল পণ্য আৰু সেৱা কৰ চমুকৈ জি এছ টি। সংসদৰ বিশেষ অধিৱেশনৰ পিছতে বুটাম টিপি জি এছ টিৰ শুভাৰম্ভ কৰে ৰাষ্ট্ৰপতি প্ৰণৱ মুখাৰ্জী আৰু প্ৰধানমন্ত্ৰী নৰেন্দ্ৰ মোদীয়ে।
জি এছ টিৰ শুভাৰম্ভণি উপলক্ষে আজি সংসদৰ চেণ্ট্ৰেল হল আয়োজন কৰা হয় বিশেষ অনুষ্ঠানৰ। আড়ম্বৰপূৰ্ণ অনুষ্ঠানত একেলগে অংশগ্ৰহণ কৰে ৰাষ্ট্ৰপতি আৰু প্ৰধানমন্ত্ৰীয়ে। অনুষ্ঠানৰ আৰম্ভণিতে ভাষণ প্ৰদান কৰে কেন্দ্ৰীয় বিত্তমন্ত্ৰী অৰুণ জেটলিয়ে।
মন্ত্ৰীগৰাকীয়ে জিএছটিৰ বাবে প্ৰতিখন ৰাজ্যৰ চৰকাৰক ধন্যবাদ জ্ঞাপন কৰে। জি এছ টি পৰিষদৰ সদস্যসকলৰ লগতে কেবাখনো ৰাজ্যৰ বিত্তমন্ত্ৰীৰ নামো উল্লেখ কৰে মন্ত্ৰীগৰাকীয়ে। সংসদ উপস্থিত সদস্যসকলক তেওঁ জিএছটিৰ পাঠ পশ্চিমবংগৰ প্ৰাক্তন বিত্তমন্ত্ৰী অসীম দাসগুপ্তাৰ পৰা লাভ কৰা বুলিও জানিবলৈ দিয়ে।
ৰাজনীতিৰ উৰ্ধলৈ গৈ জি এছ টি ৰপায়ণৰ বাবে সকলোপক্ষকে ধন্যবাদ জ্ঞাপন কৰি জেটলিয়ে কয় যে সমগ্ৰ বিশ্বতে আৰ্থিক মন্দাৱস্থাই দেখা দিয়াৰ সময়তে জিএছটিৰ আৰম্ভণি ঘটাই ভাৰতে নতুন ইতিহাসৰ সূচনা কৰিছে। জিএছটিয়ে কিদৰে কৰ ফাঁকি ৰোধ কৰিবলৈ সমৰ্থ হ’ব সেই সম্পৰ্কেও ব্যাখ্যা আগবঢ়ায় জেটলিয়ে।
জেটলিৰ পিছতে ভাষণ আগবঢ়ায় প্ৰধানমন্ত্ৰী নৰেন্দ্ৰ মোদীয়ে। জিএছটি যে কোনো এটা নিৰ্দিষ্ট দল বা চৰকাৰৰ কৃতিত্ব নহয় সেয়া স্পষ্ট কৰি দিয়ে প্ৰধানমন্ত্ৰীয়ে। উল্লেখ্য যে জিএছটিৰ কৃতিত্বক লৈ বিগত কেবাদিনো ধৰি কংগ্ৰেছ আৰু বিজেপিৰ মাজত কথাৰ কটা-কটি চলি আহিছিল। ইয়াৰ মাজতে মোদীৰ এই মন্তব্যই বহন কৰিছে বিশেষ তাৎপৰ্য। প্ৰধানমন্ত্ৰী মোদীয়ে জিএছটিৰ ফলত অসমকে ধৰি উত্তৰ-পূৱৰ ৰাজ্যসমূহ অধিক লাভান্বিত হ’ব বুলিও সদৰী কৰে।
দৰিদ্ৰ জনতাৰ স্বাৰ্থতে জিএছটি ৰূপায়ণ কৰা হৈছে বুলিও ঘোষণা কৰে মোদীয়ে। জেএছটি পানীৰ দৰেই সহজ বিষয় আৰু ইয়াত কোনো জটিলতা নাই বুলিও তেওঁ দেশবাসীক পতিয়ন নিয়াবলৈ ভাষণত চেষ্টা কৰে। ৰসিক মন্তব্য কৰি মোদীয়ে কয় যে জি এছ টি হৈছে গুড আৰু চিম্পল টেক্স। দেশৰ সমগ্ৰ বজাৰ ব্যৱস্থাক ঐক্যৱদ্ধ কৰাৰ ক্ষেত্ৰত জিএছটি টীম ইণ্ডিয়াৰ মূল অস্ত্ৰ হ’ব বুলিও তেওঁ ঘোষণা কৰে।
ইয়াৰ পিছতে গুৰু-গম্ভীৰ কণ্ঠৰে ভাষণ আগবঢ়ায় ৰাষ্ট্ৰপতি প্ৰণৱ মুখাৰ্জীয়ে। বিত্তমন্ত্ৰী হৈ থকা সময়ছোৱাত জিএছটি প্ৰক্ৰিয়াৰ সৈতে কিদৰে জড়িত আছিল সেই স্মৃতি ৰোমন্থন কৰে ৰাষ্ট্ৰপতিগৰাকীয়ে। জিএছটিক লৈ আশংকাৰ কোনো কাৰণ নাই বুলিও দেশবাসীক অৱগত কৰে সাংবিধানিক মূৰব্বীগৰাকীয়ে।
ৰাষ্ট্ৰপতিৰ ভাষণৰ পিছতে মাজনিশা ১২ বজাত বুটাম টিপি জিএছটিৰ শুভাৰম্ভ কৰা হয় । ৰাষ্ট্ৰপতি আৰু প্ৰধানমন্ত্ৰীয়ে একেলগে বুটাম টিপি শুভাৰম্ভ কৰে এই নতুন কৰ ব্যৱস্থাৰ। লগে লগে দেশত বলৱৎ হৈ পৰে নতুন কৰ নীতি। এতিয়া ৰাতি পুৱালেই আৰ্থিক লেনদেনৰ ক্ষেত্ৰত এখন নতুন দেশত নিজকে আৱিষ্কাৰ কৰিবলৈ সমৰ্থ হ’ব প্ৰতিজন ভাৰতীয় নাগৰিকে।