শৈশৱৰ এখন গা ধোৱা ফটো গুগলত আপলোড কৰাৰ বাবেই সকলো গুগল একাউণ্ট ব্লক কৰি দিয়া হ'ল এগৰাকী আই টি পেছাদাৰী যুৱকৰ। গুজৰাটৰ আহমেবাদাৰ নিৱাসী ২৬ বৰ্ষীয় এই যুৱকজনৰ নাম নীল শুক্লা। এখন ফটোৰ বাবে তেওঁৰ ই-মেইলকে ধৰি সকলো গুগল একাউণ্ট ব্লক কৰি দিয়াৰ বাবে এতিয়া গুগল কোম্পানীৰ বিৰুদ্ধে আদালতৰ দাৰস্থ হ'বলগীয়া হৈছে নীল।

ভাৰতত সৰু ল'ৰা-ছোৱালীৰ গা ধোৱাৰ সময়ত ফটো তোলাটো এক তেনেই সাধাৰণ কথা। বহু পিতৃ-মাতৃ আৰু অভিভাৱকে তেওঁলোকৰ সন্তানৰ সৰু কালৰ গা ধোৱা ফটো স্মৃতি হিচাপে তুলি ৰাখে। কিন্তু তেনে এখন ফটোৱেই যে আহমেদাবাদৰ নীল শুক্লালৈ সমস্যা নমাই আনিব সেয়া সপোনতো কল্পনা কৰিব পৰা নাছিল আই টি ক্ষেত্ৰত কৰ্মৰত যুৱকজনে।

নীল শুক্লা যেতিয়া সৰু আছিল, সেই সময়ত তেওঁক আইতাকে গা ধুৱাই দি থকাৰ এখন ফটো স্মৃতি হিচাপে কেমেৰাত বন্দী কৰি ৰাখিছিল অভিভাৱকে। শেহতীয়াকৈ সেই ফটোখনে ডিজিটাইজভাৱে সাঁচি ৰাখিব বিচাৰিছিল নীলে। কিন্তু ফটোখন তেওঁ গুগল ড্ৰাইভত আপলোড কৰাৰ পিছতে গুগলৰ পৰা এক জাননী লাভ কৰে। য'ত তেওঁৰ গুগল পে', গুগল ইমেইল একাউণ্টকে ধৰি গুগলৰ সৈতে জড়িত সকলো একাউণ্ট বন্ধ কৰি দিয়াৰ বিষয়ে তেওঁক অৱগত কৰা হৈছিল। ইয়াৰ পিছতে গুগলৰ এনে সিদ্ধান্তৰ বিৰুদ্ধে উচ্চ ন্যায়ালয়ৰ দাৰস্থ হ'বলৈ বাধ্য হয় নীল শুক্লা। 

২৬ বৰ্ষীয় নীলে কয়, "মোৰ আইতাই মোক শৈশৱত গা ধুৱাইছিল, গুগলৰ বাবে এয়া কিয় গুৰুত্বপূৰ্ণ? সেই শৈশৱৰ ছবিখনৰ বাবেই গুগলে মোৰ একাউণ্ট ব্লক কৰিছে।" নীল শুক্লাই জানিবলৈ দিয়া মতে, তেওঁৰ শৈশৱৰ ফটোখন গুগলত আপলোড কৰাৰ পিছতে গুগলৰ পৰা তেওঁ এটা মেছেজ লাভ কৰে, য’ত তেওঁক কোৱা হৈছিল যে তেওঁৰ ইমেইল ডাটাও ডিলিট কৰা হ’ব, য’ত তেওঁৰ পেছাদাৰী কেৰিয়াৰ, শিক্ষামূলক নথি-পত্ৰ, আৰ্থিক লেনদেন সহজ কৰি তোলা গুগল পে’ আদি অন্তৰ্ভুক্ত আছিল।

গুগলে নিজৰ একাউণ্ট ডিলিট কৰা বন্ধ কৰিবলৈ এখন চিঠি লিখিছিল নীল শুক্লাই। ইয়াৰ পিছত গুজৰাট চৰকাৰৰ বিজ্ঞান আৰু প্ৰযুক্তি বিভাগ আৰু গুজৰাট আৰক্ষীৰ চাইবাৰ ক্ৰাইম বিভাগত লিখিত অভিযোগ দাখিল কৰে যুৱকজনে। কিন্তু কোনোফালৰ পৰা তেওঁ সঁহাৰি লাভ নকৰাত অৱশেষত নীল শুক্লাই গুজৰাট উচ্চ ন্যায়ালয়ত গোচৰ তৰে।

গুগলৰ বিৰুদ্ধে উচ্চ ন্যায়ালয়ত আবেদন

ইফালে নীল শুক্লাৰ গোচৰ সন্দৰ্ভত বৰ্তমান কোনোধৰণৰ মত প্ৰকাশ কৰিব বিচৰা নাই গুগলে। বিষয়টো সন্মানীয় উচ্চ ন্যায়ালয়ৰ সন্মুখত বিচাৰাধীন হৈ থকাৰ বাবেই বহুজাতিক কোম্পানীটোৱে নিজৰ মত প্ৰকাশৰ পৰা বিৰত থকা বুলি জনায়। কিন্তু কোম্পানীটোৱে শিশু যৌন নিৰ্যাতনৰ সামগ্ৰীৰ সন্দৰ্ভত গুগলৰ চি এছ এ এম নীতি আৰু কাৰ্যসূচীৰ উদ্ধৃতি দি বিষয়টো সন্দৰ্ভত স্পষ্টীকৰণ দিয়াৰ চেষ্টা চলায়। কোম্পানীটোৱে জনোৱা মতে, শিশুৰ সৈতে জড়িত যিকোনো চি এছ এ এম বা যৌন বিষয়বস্তু তৎক্ষণাত আঁতৰাই পেলোৱা হয় আৰু তেনে বিষয়বস্তু আপলোড কৰা একাউণ্টও বন্ধ কৰা হ’ব পাৰে।

কিন্তু বিষয়টো দেখাতকৈ যে অধিক গুৰুতৰ সেয়া সহজেই অনুমেয়। কাৰণ ভাৰতৰ লাখ লাখ লোক আৰু হাজাৰ হাজাৰ কোম্পানীয়ে নিজৰ একাউণ্টৰ জৰিয়তে বিভিন্ন গুগল সেৱা ব্যৱহাৰ কৰে। কিন্তু এনে সমস্যাৰ বাবে উচ্চ ন্যায়ালয়ত গোচৰ ৰুজু কৰাৰ বুজাবুজি আৰু সুবিধা সকলো মানুহৰে নাই। গুগলে বেছিভাগ ক্ষেত্ৰত তেওঁলোকৰ সেৱাসমূহ বিনামূলীয়াকৈ প্ৰদান কৰে যদিও কিছুমান নিৰ্দিষ্ট সেৱাৰ বাবে গ্ৰাহক আৰু কোম্পানীয়ে গুগলক ধন আদায়ও দিবলগীয়া হয়।

নীলৰ পিতৃ সমীৰ শুক্লাই কয়, "এয়া কেৱল গ্ৰাহক আৰু কোম্পানীটোৰ মাজত হোৱা বিবাদ নহয়, বৰঞ্চ লাখ লাখ লোকৰ গোপনীয়তাৰ অধিকাৰ উলংঘাৰ অভিযোগৰ বিৰুদ্ধে আইনী সুৰক্ষা বিচৰাৰ বিষয়।" নীল আৰু তেওঁৰ পৰিয়ালৰ মতে, "আপোনাৰ অজ্ঞাতে আৰু সন্মতি অবিহনে গুগল আৰু ইয়াৰ কৰ্মচাৰীয়ে আপোনাৰ ব্যক্তিগত ফটো আৰু তথ্য ৰাখিব পাৰে। কিন্তু আপোনাৰ গোচৰ দাখিল কৰাৰ উপযুক্ত সুযোগ নিদিয়াকৈ আপোনাৰ একাউণ্ট ডিলিট কৰিলে আৰ্থিক লোকচানৰ লগতে মানসিক চাপৰ সৃষ্টি হ'ব পাৰে আৰু আপোনাৰ সামাজিক সুনামৰ ওপৰত প্ৰশ্ন উত্থাপন হ'ব পাৰে।" নীলৰ পৰিয়ালে কয় যে একেধৰণৰ প্ৰশ্নৰ সৈতে তেওঁ গুগলে একাউণ্ট ডিলিট কৰাত বাধা দিবলৈ উচ্চ ন্যায়ালয়ত আবেদন দাখিল কৰিছে।

সকলো তথ্য এটা একাউণ্টত আছে

মন কৰিবলগীয়া যে ২০২৩ চনৰ আগষ্ট মাহৰ পৰা নীল শুক্লাৰ একাউণ্ট ডিলিট কৰাত বাধা দিবলৈ গুগললৈ প্ৰেৰণ কৰা আইনী জাননীৰ প্ৰতি গুগলে কোনো সঁহাৰি নিদিলে। ইয়াৰ পিছত ২০২৪ চনৰ ২ এপ্ৰিল মঙলবাৰে গুজৰাট উচ্চ ন্যায়ালয়ত অনুষ্ঠিত এই গোচৰৰ শুনানিৰ সময়তে আদালতত উপস্থিত নাছিল গুগলৰ কোনো অধিবক্তা।

৫ এপ্ৰিলত তেওঁৰ একাউণ্ট স্থায়ীভাৱে ডিলিট হ’ব বুলি গুগলে নীল শুক্লাক জনাইছিল যদিও তেওঁৰ ডাটা ডাউনলোড কৰিবলৈও অনুমতি দিয়া হোৱা নাছিল। অৱশ্যে এই ক্ষেত্ৰত গুগলে তেওঁৰ একাউণ্ট আঁতৰাইছে নে নাই সেয়া স্পষ্ট হোৱা নাই।

গুজৰাট উচ্চ ন্যায়ালয়ৰ ন্যায়াধীশ বৈভৱী নানাৱতীৰ আদালতে এই গোচৰত পৰৱৰ্তী নিৰ্দেশ নোহোৱালৈকে গুগলে নীল শুক্লাৰ একাউণ্ট ডিলিট কৰাত নিষেধাজ্ঞা আৰোপ কৰিছে। এই গোচৰৰ পৰৱৰ্তী শুনানি এতিয়া অনুষ্ঠিত হ'ব ৩০ এপ্ৰিলত।

নীল শুক্লাই কয়, "মোৰ আইতাই মোক গা ধুৱাই দিয়া বিষয়টোৰ ওপৰত গুগলে কিয় গুৰুত্ব দিয়ে? মোৰ শৈশৱৰ সেই ছবিখনৰ বাবেই গুগলে মোৰ একাউণ্ট ব্লক কৰি দিছে। ইয়াৰ বাবেই গুগলৰ সৈতে লিংক কৰা মোৰ সকলো ছ'চিয়েল মিডিয়া একাউণ্টো ব্লক কৰা হৈছে। এই একাউণ্টত মোৰ ব্যৱসায়িক কাৰ্য্যকলাপ, মোৰ সকলো সঞ্চয় আৰু বিনিয়োগৰ তথ্য আছিল।" তেওঁ কয় যে মোৰ দৰে আন লোক যাতে গুগলৰ এই স্বেচ্ছাচাৰীতাৰ বলি নহয় তাৰ বাবেই মই গুজৰাট উচ্চ ন্যায়ালয়ত গোচৰ তৰিছো।

নীলে লগতে কয়, "মই এই একাউণ্টৰ জৰিয়তে কৃত্ৰিম বুদ্ধিমত্তাৰ বিভিন্ন উন্নত অনলাইন পাঠ্যক্ৰম সম্পূৰ্ণ কৰিছো, যাতে মই নিজকে চফ্টৱেৰৰ ক্ষেত্ৰত আপডেট কৰিব পাৰো। মই মোৰ সকলো প্ৰজেক্ট কেৱল মোৰ গুগল একাউণ্টত চেভ কৰিছিলোঁ। আনকি মোৰ প্ৰমাণপত্ওৰ ইমেইলতে আহে। ইয়াৰোপৰিও আন বহু প্ৰয়োজনীয় তথ্য মোৰ ইমেইল একাউণ্টত আছিল। ষ্টক মাৰ্কেটৰ বিনিয়োগ, মোৰ বেংক একাউণ্ট, মোৰ ক্লায়েণ্টৰ সৈতে ব্যৱসায়িক ইমেইল আদিও একেটা একাউণ্টতে আছিল, যিটো এতিয়া বন্ধ হৈ আছে। মোৰ ক্লায়েণ্টসকলে মোক ইমেইল কৰে, কিন্তু মই দেখা নাপাওঁ।"

নীলে নিজৰ তথ্য অনলাইনত সংৰক্ষণ কৰিবলৈ গুগলৰ পৰা পৃথকে পৃথকে দুটা টিবি ষ্ট’ৰেজও ক্ৰয় কৰিছিল। তেওঁ কয়, "আমাৰ পৰিয়ালত বহুত ফটো আছে। মই সেইবোৰ ডিজিটাইজ কৰি অনলাইন ড্ৰাইভত সংৰক্ষণ কৰাৰ সিদ্ধান্ত লৈছিলোঁ। সেই শ শ ফটোৰ ভিতৰত এনেকুৱা এখন ফটো আছিল, যিখন শৈশৱত মোৰ আইতাই মোক গা ধুৱাই থকাৰ সময়ত তোলা হৈছিল।"

গুগল একাউণ্টত ফটোখন আপলোড কৰাৰ পিছতেই নীলে ২০২৩ চনৰ ১১ মে’ত গুগলৰ পৰা এখন জাননী লাভ কৰে, য’ত তেওঁৰ একাউণ্ট ব্লক কৰা হৈছে বুলি জনোৱা হয়।

চি এছ এ এম কাৰ্যসূচীৰ বিষয়ে কি কয় গুগলে?

গুগলৰ তথ্য অনুসৰি নীলে তেওঁলোকৰ সেৱাৰ চৰ্ত উলংঘা কৰিছে। গুগলৰ বিৰুদ্ধেও বহু অভিযোগ উত্থাপন কৰিছে নীলে। তেওঁৰ এই অভিযোগৰ সৈতে তেওঁ উচ্চ ন্যায়ালয়ৰ কাষ চাপিছে যে গুগলে তেওঁৰ ব্যক্তিগত অধিকাৰ খৰ্ব কৰিছে। তেওঁ আবেদনখনত উল্লেখ কৰিছে যে গুগলে পাঁচটা দিশত তেওঁৰ অধিকাৰ খৰ্ব কৰিছে। সেয়া হৈছে- তেওঁৰ পক্ষৰ কথা নুশুনাকৈ তেওঁৰ একাউণ্ট ব্লক কৰিছে। তেওঁলোকৰ অধিকাৰ খৰ্ব কৰাৰ এই সিদ্ধান্ত সম্পূৰ্ণৰূপে প্ৰযুক্তিৰ দ্বাৰাহে লোৱা হৈছিল, মানুহে নহয়।

গুগলৰ সেৱাৰ চৰ্তসমূহে চি এছ এ এম (গুগলে পৰ্ণগ্ৰাফিক বিষয়বস্তু ধৰা পেলাবলৈ ব্যৱহাৰ কৰা কৃত্ৰিম বুদ্ধিমত্তা প্ৰগ্ৰেম) সমৰ্থন কৰে যিটো অন্যায়। অৱশ্যে চি এছ এ এমৰ এই সিদ্ধান্তই সমগ্ৰ বিশ্বৰ ব্যৱহাৰকাৰীক প্ৰভাৱিত কৰে। এই কাৰ্যসূচীত বিভিন্ন জাতিৰ লোকৰ প্ৰতি হোৱা নিৰ্যাতন আৰু বৈষম্যমূলক মনোভাৱৰ তথ্যৰ ওপৰত প্ৰশিক্ষণ দিয়া হৈছে। শিশুৰ শৰীৰক শিশুৰ অধিকাৰ খৰ্ব কৰা বুলি দেখুওৱা সকলো সামগ্ৰীকে শিশু অৱস্থাত নীলৰ আইতাকে গা ধুৱাই থকা ফটোকে ধৰি সকলো সামগ্ৰী বিবেচনা কৰিবলৈ চি এছ এ এম প্ৰশিক্ষণ দিয়া হৈছে।

আবেদনখনত কোৱা হৈছে যে এই ফটোসমূহ ১৯৯৯-২০০০ চনৰ ভিতৰত তোলা হৈছিল। সেই সময়ত কোনেও কল্পনা কৰিব পৰা নাছিল যে তদাৰকী নোহোৱা প্ৰযুক্তিয়ে জীৱন সলনি কৰা সিদ্ধান্ত ল’ব। নীলে কয়, “গুগলৰ চৰ্ত অনুসৰি মই সেই ফটোখন মোৰ ষ্ট’ৰেজৰ পৰা আঁতৰাই দিম, কিন্তু মোৰ হাতত তেনে কৰাৰ বিকল্প নাই।”

কি কয় গুগলে?

গুগলে বিবিচিৰ সংবাদদাতা পৰস ঝাক ইমেইলযোগে জনাইছে যে এই বিষয়টো সন্মানীয় উচ্চ ন্যায়ালয়ৰ সন্মুখত বিচাৰাধীন হৈ থকাৰ বাবে আমি এই বিষয়ত প্ৰশ্নৰ উত্তৰ দিব নোৱাৰো, কিন্তু চি এছ এ এমৰ বিষয়বস্তুৰ সন্দৰ্ভত আমাৰ নীতি আৰু কাৰ্যসূচীসমূহ আমি ব্যাখ্যা কৰিব পাৰো।

গুগলে বিবিচিক জনাইছে যে, "আমি শিশু যৌন শোষণৰ সামগ্ৰী আমাৰ কোনো প্লেটফৰ্মত শ্বেয়াৰ হোৱাত বাধা দিওঁ। আমি শিশুক শোষণৰ পৰা ৰক্ষা কৰিবলৈ প্ৰতিশ্ৰুতিবদ্ধ। যেতিয়াই আমি চি এছ এ এম বা শিশুৰ সৈতে জড়িত যৌন বিষয়বস্তু বিচাৰি পাওঁ, আমি ইয়াক তৎক্ষণাত আঁতৰাই পেলাওঁ আৰু আনকি একাউণ্টটোও বন্ধ কৰিব পাৰো।"

গুগলে কয় যে যদিও আমাৰ প্লেটফৰ্মত আপলোড বা শ্বেয়াৰ কৰা কন্টেন্টত চি এছ এ এম কন্টেন্টৰ পৰিমাণ অতি কম, তথাপিও আমি এই ক্ষেত্ৰত অতি সতৰ্ক। গুগলে এইটোও জনাইছে যে কোম্পানীয়ে এটা অনন্য প্ৰযুক্তি বিকশিত কৰিছে, যিয়ে আমাৰ চি এছ এ এম কন্টেন্ট সংজ্ঞা পূৰণ কৰা যিকোনো আপলোড কৰা কন্টেন্ট তৎক্ষণাত চিনাক্ত কৰি আঁতৰাই পেলায়।

গুগলে চি এছ এ এমৰ বিষয়বস্তু চিনাক্ত কৰিবলৈ কৃত্ৰিম বুদ্ধিমত্তা আৰু হেচ-মেচিং প্ৰযুক্তি ব্যৱহাৰ কৰে। গুগলে কয় যে, “আমাৰ প্ৰযুক্তিটো এনেদৰে ডিজাইন কৰা হৈছে যাতে এই ধৰণৰ ঘৃণনীয় বিষয়বস্তু দুৰ্ভাগ্যজনকভাৱে বিশ্বৰ বিভিন্ন প্ৰান্তৰ পৰা আপলোড কৰা হৈছে, তাৰ পৰিসৰ আৰু গতি নিয়ন্ত্ৰণ কৰিব পৰা যায়।”

'আইতাকে শিশুক গা ধুৱাই দিয়াটো শিশু পৰ্ণগ্ৰাফী নহয়'

নীলৰ পিতৃ সমীৰ শুক্লা পেছাত এগৰাকী স্থপতিবিদ। তেওঁ আইনৰ শিক্ষাও লৈছে। তেওঁ কয়, ‘গুগল ইমান ডাঙৰ কোম্পানী হৈ পৰিছে যে ভাৰতীয় সংস্কৃতি, ভাৰতীয়ৰ আৱেগক বুজিবলৈ সাজু নহয়? ভাৰতীয় সংস্কৃতিত আইতাকে নাতিয়েকক গা ধোৱাই দিয়াটো কেতিয়াও শিশু পৰ্ণগ্ৰাফী নহয়, কিন্তু কোম্পানীয়ে নিজাববীয়াকৈ সিদ্ধান্ত লৈছে।"

তেওঁ কয়, ‘আন এটা ডাঙৰ সমস্যা হ’ল তথ্য প্ৰযুক্তি আইনৰ অধীনত এনে গোচৰত ব্যৱস্থা লোৱাৰ অধিকাৰ দেৱানী আদালতৰ নাই। এই ব্যৱস্থা ২০০০ চনত কৰা নতুন নিয়ম অনুসৰি চাইবাৰ আপীল ন্যায়াধিকৰণক দিয়া হৈছে। তাতো আবেদন কৰিছিল যদিও কোনো ব্যৱস্থা লোৱা হোৱা নাছিল।'

তথ্য প্ৰযুক্তি আইনৰ বাবে নিৰ্ধাৰিত নিয়ম অনুসৰি এনে গোচৰৰ অপৰাধমূলক অভিযোগৰ তদন্ত আৰক্ষীৰ চাইবাৰ অপৰাধ শাখাই কৰিব আৰু বিবাদৰ শুনানি গ্ৰহণ কৰিব ৰাজ্যিক বিজ্ঞান আৰু প্ৰযুক্তি বিভাগৰ সচিবে। এই বিষয়ত নীল শুক্লাই গুজৰাটৰ বিজ্ঞান আৰু প্ৰযুক্তি বিভাগৰ প্ৰধান সচিব মোনা খন্ধাৰৰ ওচৰতো আবেদন জনাইছিল। এই বিষয়ত মোনা খন্ধাৰে কয়, “আমাৰ বিভাগে তথ্য প্ৰযুক্তি আইনৰ অধীনত এনে অভিযোগ লাভ কৰে।” অৱশ্যে কোনো ব্যক্তিগত গোচৰৰ সবিশেষ পৰীক্ষা নকৰাকৈ তেওঁ কোনো মন্তব্য দিবলৈ অস্বীকাৰ কৰে।

কেন্দ্ৰীয় চৰকাৰৰ আই টি আইনত কি ব্যৱস্থা আছে?

গুজৰাট চৰকাৰৰ বিজ্ঞান আৰু প্ৰযুক্তি বিভাগৰ এই আইনখনৰ সৈতে পৰিচিত এজন বিষয়াই নাম প্ৰকাশ নকৰাকৈয়ে কয় যে আই টি আইনখনৰ ৯ নং অধ্যায়ৰ পূৰ্বে ৪৩ আৰু ৪৩ (ক) ধাৰা আছিল। তেওঁ কয় যে ধাৰা ৪৩ (ক)ৰ অধীনত এই বিষয়ত বৃহৎ কৰ্পৰেট কোম্পানীসমূহৰ পৰা উত্তৰ বিচাৰিব পাৰি, কিন্তু ডিজিটেল পাৰ্চনেল ডাটা প্ৰটেকচন এক্ট, ২০২৩ (ডি পি ডি পি এক্ট, ২০২৩)ৰ পিছত কেন্দ্ৰীয় চৰকাৰে ৪৩ (ক) ধাৰা আঁতৰাই পেলোৱা হৈছে। গতিকে এই ঘটনা সন্দৰ্ভত কি ব্যৱস্থা গ্ৰহণ কৰিব পাৰি সেই সন্দৰ্ভত কোনো স্পষ্টতা নাই।

কিন্তু চাইবাৰ আইন বিশেষজ্ঞ তথা উচ্চতম ন্যায়ালয়ৰ অধিবক্তা ড০ পৱন ডুগলৰ মতে এই গোচৰত আই টি আইনৰ ৪৩ (ক) ধাৰা এতিয়াও প্ৰয়োগ কৰিব পাৰি আৰু আইনী ব্যৱস্থাত ব্যৱহাৰ কৰিব পাৰি। তেওঁ কয়, ‘আই টি আইন সংশোধন কৰি চৰকাৰে ৪৩(ক) ধাৰা আঁতৰাইছে, কিন্তু ডি পি ডি পি আইন-২০২৩ এতিয়াও কাৰ্যকৰী হৈ আছে, গতিকে আজিলৈকে ৪৩(ক)ৰ বিধান প্ৰক্ৰিয়া বাকী আছে আৰু ইয়াক ব্যৱহাৰ কৰিব পাৰি।"

গুজৰাট উচ্চ ন্যায়ালয়ত নীল শুক্লাৰ অধিবক্তা দীপেন দেশাইয়ে কয় যে উচ্চ ন্যায়ালয়ে কেন্দ্ৰীয় চৰকাৰৰ চাইবাৰ আপীল ন্যায়াধিকৰণ, গুজৰাট চৰকাৰৰ বিজ্ঞান আৰু প্ৰযুক্তি বিভাগক জাননী জাৰি কৰিছে । পৰৱৰ্তী শুনানি পৰ্যন্ত গুগলে যাতে নীল শুক্লাৰ একাউণ্ট ডিলিট নকৰে, তাৰ বাবেও আদালতে নিৰ্দেশ দিছে। গোচৰৰ পৰৱৰ্তী শুনানি ৩০ এপ্ৰিলত হ'ব।"

কৃত্তিম বুদ্ধিমত্তাৰ পৰা কি বিপদ আৰু আইনৰ সুৰক্ষা কি?

গুগলৰ দৰে বিশ্বব্যাপী প্ৰযুক্তি কোম্পানীয়ে কৃত্ৰিম বুদ্ধিমত্তাৰ ব্যৱহাৰ আৰু ইয়াৰ বিপদ সন্দৰ্ভত ড০ পৱন ডুগলে কয়, “যেতিয়া প্ৰযুক্তিয়ে মানৱ বিষয়ৰ বাবে সিদ্ধান্ত ল’বলৈ আৰম্ভ কৰে, তেতিয়া ভুল কৰাটো স্বাভাৱিক, কাৰণ এই প্ৰযুক্তি এতিয়াও মানুহৰ বাবে যথেষ্ট পৰিপক্ক হোৱা নাই যে সংস্কৃতি, মানুহৰ আৱেগ আৰু মানুহৰ আচৰণৰ সূক্ষ্মতা বুজিব পাৰে।"

তেওঁ কয়, "সেইবাবেই প্ৰযুক্তিয়ে ছবিখনত থকা মানুহজনক কেৱল এক প্ৰকাৰৰ তথ্য হিচাপে চায় আৰু তাৰ পিছত সেই তথ্যক চি এছ এ এম (শিশু যৌন নিৰ্যাতনৰ সামগ্ৰী) নিয়মৰ সৈতে তুলনা কৰে। এ আই প্ৰযুক্তিৰ সলনি মানুহে নিজাববীয়াকৈ এনে ফটোসমূহৰ পৰীক্ষা কৰা হ'লে তেতিয়া হয়তো এনেকুৱা নহ’লহেঁতেন।” ড০ ডুগলে এই ঘটনাক এক সতৰ্কবাণী হিচাপে অভিহিত কৰে। তেওঁ কয় যে এইটো সতৰ্কবাণীৰ বিষয়। গুগলৰ দৰে কোম্পানীয়ে যাতে পুনৰ এনেকুৱা ভুল নকৰে, তাৰ প্ৰতি লক্ষ্য ৰাখিব লাগিব।

তেওঁ কয়, 'এই বিষয়টোৱে এই বৃহত্তৰ প্ৰশ্নটোলৈ আঙুলিয়াই দিয়ে যে গুগলৰ দৰে মধ্যস্থতাকাৰীয়ে নিজৰ কাম আৰু উদ্দেশ্যৰ বাবে এ আই ব্যৱহাৰ কৰিবলৈ আৰম্ভ কৰাৰ সময়ত মানৱ নিয়ন্ত্ৰণৰ যুক্তিসংগত স্তৰ বজাই ৰখাৰ প্ৰয়োজন আছে নেকি। কৃত্তিম বুদ্ধিমত্তাক সম্পূৰ্ণ অক্ষাংশ আৰু অধিকাৰ দিয়াটো উপযুক্ত নহয়।'