গোৰেশ্বৰঃ ৰঙালীৰ উছাহ এতিয়াও মাৰ যোৱা নাই। অসমীয়াৰ বাপতিসাহোন ৰঙালী বিহু উপলক্ষে এতিয়াও ৰাজ্যত অব্যাহত আছে বিভিন্ন অনুষ্ঠান।
যি সময়ত এফালে ব্যয়বহুলভাৱে মঞ্চ বিহু অনুষ্ঠিত কৰাৰ অঘোষিত প্ৰতিযোগিতা চলিছে সেই সময়তে কিন্তু ৰাজ্যৰ বহু গ্ৰামাঞ্চলত অনাড়ম্বৰভাৱে ৰঙালী বিহুৰ কাৰ্যসূচী আয়োজিত হৈ আছে। বাগসা জিলাৰ গোৰেশ্বৰৰ বৰফুকনখাত গাঁৱত চলি থকা বৰফুকনখাত ব'হাগী উৎসৱ উপলক্ষে তেনে এক নিদৰ্শন দেখা পোৱা গ'ল।
১৩ আৰু ১৪ মে'ত আয়োজিত চতুৰ্দশ বাৰ্ষিক ব'হাগী উৎসৱ উদযাপনৰ সৈতে সংগতি ৰাখি আয়োজকসকলে গ্লেমাৰ শিল্পীৰে মঞ্চ বিহু অনুষ্ঠিত কৰাৰ বিপৰীতে বিভিন্ন থলুৱা খেল-ধেমালিৰ লগতে গীত-মাত-সাহিত্য আদি প্ৰতিযোগিতাৰ আয়োজন কৰিছে।
আজি খেল প্ৰতিযোগিতাত শিশুসকলৰ পৰা আৰম্ভ কৰি কিশোৰ-কিশোৰী, যুৱক-যুৱতী, মহিলাসকলে উৎসাহেৰে ভাগ লয়। খেল-ধেমালিৰ ভিতৰত টেকেলি ভঙা খেল, মনোযোগী খেল, মহিলাসকলৰ বাবে বিস্কুট খাই দৌৰা প্ৰতিযোগিতা, ভেশচন, তেল সনা কলগছ বগোৱা আদি প্ৰতিযোগিতা আছিল খুবেই উপভোগ্য।
ভেশচন প্ৰতিযোগিতাত মহিলাসকলে কৰা অভিনয় আৰু প্ৰদৰ্শনে উপস্থিত সকলোকে তবধ মনাইছিল। হেৰাই যাবলৈ ধৰা কিছুমান খেল-ধেমালিয়ে সমগ্ৰ পৰিবেশ পুনৰ জীপাল কৰি তুলিছিল।
প্ৰতিভা বিকাশৰ বিহুতলীলৈ ৰূপান্তৰিত হোৱা বিহুস্থলীত সাহিত্য প্ৰতিযোগিতাতো প্ৰতিযোগীসকলে নিজৰ সুন্দৰ প্ৰতিভা প্ৰদৰ্শন কৰে। নিশালৈ বৰফুকনখাত বিহুতলীত সাংস্কৃতিক অনুষ্ঠানৰ আয়োজন কৰা হৈছে।