দীপাংকৰ দাস, গোৰেশ্বৰঃ এক ভয়ংকৰ দিনৰ পিনে আগুৱাই গৈছে ভাৰতবৰ্ষ। কিয়নো আগন্তুক দিনত সমগ্ৰ ভাৰত বৰ্ষক শাসন কৰিব মাথো কেইজনমান পুঁজিপতিয়ে। এই মন্তব্য নিখিল ভাৰত কৃষক সভাৰ গ্ৰাম্য কামৰূপ জিলাৰ নেতা বাসুদেৱ কলিতাৰ।

বাগসা জিলাৰ গোৰেশ্বৰত আজি মে'দিৱসৰ সৈতে সংগতি ৰাখি নিখিল ভাৰত কৃষক সভা,চিটু, ডিৱাইএফআই, এচএফআই, নিৰ্মাণ  শ্ৰমিক ইউনিয়নৰ গোৰেশ্বৰ আঞ্চলিক সমিতিৰ কেন্দ্ৰীয়ভাবে দিনজোৰা কাৰ্যসূচীৰে  শ্ৰমিক দিৱসৰ আলোচনা চক্ৰত নিজৰ আলোচনা আগবঢ়াই তেওঁ এনেদৰে কয়। তেওঁ আৰু কয় যে - আজি বেংকৰ কৰ্মচাৰীয়েও ৮ ঘন্টাতকৈ অধিক সময় শ্ৰম কৰিবলগীয়া হৈছে ভাৰতবৰ্ষত। চৰকাৰী কল কাৰখানাবোৰ কেৱল ব্যক্তিগত খণ্ডলৈ হস্তান্তৰ কৰি চৰকাৰে শ্ৰমিকক ভাতে মৰাৰ ব্যৱস্থা কৰিছে। অংগনবাড়ী, আশা কৰ্মীৰ ক্ষেত্ৰত ভয়ানক শোষণ চলি আছে বৰ্তমানে। সেয়েহে এওঁলোকৰ জীৱন জীৱিকা দুৰ্বিষহ হৈ পৰিছে।

কৰ্মচাৰীৰ নূন্যতম দৰমহা ১৮ হাজাৰ টকা হ'ব লাগে বুলি কোৱা হৈছে যদিও আজিলৈ সেয়া কৰা হোৱা নাই। ৰেল বিভাগ, শিক্ষা বিভাগ, বেংক সকলোতে এতিয়া চৰকাৰে স্থায়ী কৰ্মচাৰীৰ পদ হ্ৰাস কৰি ঠিকাভিত্তিক কৰ্মচাৰীৰ সংখ্যা বৃদ্ধি কৰিবলৈ লৈছে যিটো শ্ৰমিক নীতিৰ পৰিপন্থী। কৃষক সকলে আজি ফচলৰ দাম নাপায় আত্মহত্যা কৰিছে। বিজেপিৰ অচ্ছে দিন কিয় আহিব যদিহে কৃষকৰ ফচল চৰকাৰে ক্ৰয় নকৰে বুলি কৃষকসভাৰ নেতাজনে প্ৰশ্ন উত্থাপন কৰে।  বিগত দিনত কৃষকৰ আত্মহত্যা চল্লিশ শতাংশ বাঢ়িছে।  বিগত দিনকেইটাত ৪ কৌটি ৪০ লাখ শ্ৰমিক কামৰ পৰা আতৰি আহিব লগা হৈছে। সেয়েহে মে'দিৱস কেৱল জিৰণিৰ দিন নহয়, এনে সময়ত সকলো শ্ৰমিক সংঘবদ্ধ হৈ সজাগ হৈ নিজৰ প্ৰাপ্যৰ বাবে আন্দোলন কৰিব লাগিব বুলি তেওঁ আলোচনা আগবঢ়াই। 

স্থানীয় বিষ্ণুৰাভা ভৱনত আয়োজিত আলোচনা চক্ৰৰ সঞ্চালনা কৰে অৱসৰপ্ৰাপ্ত অধ্যাপক কবি সাহিত্যিক অজিত তালুকদাৰে। আলোচনা চক্ৰত আন এজন আলোচক তথা কোকৰাঝাৰ লোকসভা সমষ্টিৰ চিপিআইএম দলৰ প্ৰাৰ্থী বিৰাজ ডেকাই কয় যে- ১৩০ বছৰ পূৰ্বেই আৰম্ভ হৈছিল ইউৰোপত । শ্ৰমিকৰ আন্দোলন মষিমুৰ কৰাৰ চেষ্টাও চলি আহিছে প্ৰতিদিন। চৰকাৰে শ্ৰমিক বিৰোধী, কৰ্মচাৰী বিৰোধী নীতি লৈছে। শ্ৰমিক বিৰোধী চৰকাৰী নীতিৰ বাবেই এচাম পুঁজিপতিৰ কোম্পানীয়ে শ্ৰমিকক শোষণ কৰিবলৈ সুবিধা পাইছে। বিভিন্ন খণ্ডত আজিও শ্ৰমিক সকল সচেতন হৈ উঠা নাই। এইক্ষেত্ৰত কাম কৰা সংগঠনসমূহে শ্ৰমিকক সচেতন কৰাৰ লগতে উচিত বিচাৰ প্ৰদান কৰাৰ ভূমিকা পালন কৰিব লাগে বুলি আলোচক বিৰাজ ডেকাই আলোচনা আগবঢ়াই। 

আলোচনা চক্ৰৰ পূৰ্বে সমবেত সংগীত পৰিৱেশনৰ লগতে কেবাজনো কৃষক -শ্ৰমিক আৰু সংগঠনৰ নেতাক সম্বৰ্দ্ধনা জ্ঞাপন কৰা হয়।  ইপিনে পুৱাৰ ভাগত  মে' দিৱসৰ কাৰ্যসূচী মৰ্মে ১০ বজাত পতাকা উত্তোলন কৰে সদৌ অসম নিৰ্মাণ শ্ৰমিক সন্থাৰ কামৰূপ জিলা সমিতিৰ সম্পাদক খগেন ডেকাই। ইয়াৰ পিছতে মুকলি কৰাৰ পাছত স্মৃতি তৰ্পন কৰে বামপন্থী নেতা কৰুণা ভূঞা আৰু কঃষক নেতা ধৰণী বড়োই।  ইয়াৰ পিছতে গোৰেশ্বৰ চহৰৰ মাজ মজিয়াৰে এক শোভাযাত্ৰা উলিয়ায়।