গুৱাহাটীঃ যোৱা তিনিমাহে মেৰামতিৰ বাবে বন্ধ হৈ থকা শৰাইঘাটৰ পুৰণি দলঙেৰে বৃহস্পতিবাৰৰ দিনৰ ২.৩০ বজাৰপৰা পুনৰ আৰম্ভ হ'ল যান-বাহন চলাচলৰ।
উত্তৰ পূৱ সীমান্ত ৰে’লৱেৰ মহা প্ৰবন্ধক সঞ্জীৱ ৰয়ে মেৰামতি সম্পূৰ্ণ হোৱা দলংখনেৰে পুনৰ যান-বাহন চলাচল বৃহস্পতিবাৰে আনুষ্ঠানিকভাৱে মুকলি কৰে।
বিগত বর্ষৰ ২৩ মাৰ্চৰপৰা পুৰণি দলংখন মেৰামতিৰ বাবে দলংখনেৰে যাতায়ত সাময়িকভাৱে বন্ধ ৰখা হৈছিল। ফলত প্ৰতিদিনে শৰাইঘাটৰ নতুন দলঙত সৃষ্টি হৈছিল তীব্ৰ যান-জতৰ। আজিৰে পৰা মেৰামতি সম্পূৰ্ণ হোৱা শৰাইঘাটৰ পুৰণি দলংখন যাতায়তৰ বাবে পুনৰ মুকলি হোৱাত এতিয়াৰ পৰা হ্ৰাস পাব যান-জতৰ সমস্যা।
মেৰামতি বাবে কাম কৰিবলৈ নির্দেশ দিছিল ৰাজ্যৰ মুখ্যমন্ত্ৰী সৰ্বানন্দ সোণোৱালে। তাৰ ফলশ্ৰুতিতে তিনিমাহৰ ভিতৰত সম্পূৰ্ণ কৰা হয় দলংখনৰ মেৰামতিৰ কাম।
দলংখন মেৰামতিৰ বাবে মুঠ ৯ কোটি টকা ব্যয় কৰা হয় বুলি জানিবলৈ দিয়ে ৰে’লৱে মহা প্ৰৱন্ধক গৰাকীয়ে। লগতে তেওঁ কয় যে মেৰামতি সম্পূৰ্ণ কৰা দলংখনত প্ৰয়োগ কৰা হৈছে অত্যাধুনিক প্ৰযুক্তি যাৰ বাবে বহু বছৰলৈ দলংখনৰ মেৰামতিৰ প্ৰয়োজন নহ'ব।
১৯৬৩ চনৰ ৭ জুনতে আনুষ্ঠানিকভাৱে মুকলি হোৱা ব্ৰহ্মপুত্ৰৰ ওপৰৰ প্ৰথমখন দলং আছিল শৰাইঘাটৰ দলং। দলংখন নিৰ্মাণৰ পাছৰপৰা প্ৰথমবাৰৰ বাবে কৰা হয় মেৰামতিৰ কাম।
ইফালে, দলংখন মুকলি অনুষ্ঠানত উত্তৰ-পূব সীমান্ত ৰে’লৱে জনসম্পৰ্ক বিষয়া প্ৰণৱ জ্যোতি শৰ্মাই জানিবলৈ দিয়া মতে দৈনিক ৫০০ জন শ্ৰমিকে দলং মেৰামতিৰ কামত নিয়োজিত হৈছিল। দলংখনত ৫৪ খন শ্লেব নতুনকৈ নিৰ্মাণ কৰা হৈছে। লগতে নিৰ্মাণ কাৰ্য্যত ৫০০ টনৰো অধিক ষ্টীল প্লেট আৰু ৰিনফৰ্চমেণ্ট ৰ’ড ব্যৱহৃত হৈছিল বুলি তেওঁ উল্লেখ কৰে।
দলঙখন পুনৰ মুকলি হোৱা পাছতে এতিয়া দেখিবলৈ পোৱা গৈছে যোৱা তিনিমাহত জালুকবাৰীৰপৰা শৰাইঘাটৰ উত্তৰ পাৰলৈকে যি যান-জতৰ সমস্যা সৃষ্টি হৈছিল সেই সমস্যা বহু পৰিমানে হ্ৰাস পাইছে।