হোজাইঃ 'হিন্দু ধৰ্ম মানে এক ৰীতি নীতি পালন কৰা এচাম ব্যক্তি নহয়। হিন্দুত্বই বিশ্বক বন্দনা কৰে, হিন্দুত্বই সৰ্বদা বিশ্ব ব্ৰহ্মাণ্ডৰ কল্যাণৰ কথা কয় ।"-এই মন্তব্য অসমৰ বিত্ত,স্বাস্থ্য আৰু শিক্ষা মন্ত্ৰী ডঃ হিমন্ত বিশ্ব শৰ্মাৰ।

হোজাই গীতা আশ্ৰমত তিনিদিনীয়া বৰ্ণাঢ্য কার্যসূচীৰে আয়োজিত শ্ৰী শ্ৰী বিষ্ণু মন্দিৰ উদ্বোধন আৰু বিষ্ণু বিগ্ৰহৰ প্ৰাণ প্ৰতিষ্ঠা মহোৎসৱৰ আজি অন্তিম দিনাৰ বেদ পাঠ আৰু ধৰ্মালোচনা সভাত যোগদান কৰি মন্ত্ৰী জনে এই মন্তব্য কৰে।

জোতা পিন্ধি গীতা পাঠ কৰাক লৈ হোজাইত প্ৰতিক্ৰিয়া

নিজৰ ২০ মিনিটৰ ভাষণত মন্ত্ৰী জনে গীতা পাঠৰ উপকাৰিতাৰ বিষয়ে বহলাই কৈ যুৱ প্ৰজন্মক গীতা পাঠৰ আহ্বান জনায় আৰু অসমৰ সকলো সমষ্টিত বিধায়ক পুঁজিৰে এটাকৈ গীতা সংঘ স্থাপন কৰিবলৈ পৰামৰ্শ দিয়ে। তেওঁৰ আৰু কয়-  'গীতা কোনো ধৰ্ম গ্ৰন্থ নহয়। গীতাত কোনো ধর্মৰ কথা লিখা নাই । গীতত কাম ক্ৰোধ লোভ মোহ ৰিপুক দমন কৰি নিষ্কাম কৰ্মৰ কথাহে কৈছে।'

মন্ত্ৰী জনে নিজ ভাষণত অসমখন বৰ্তমান সংকটৰ গৰাহত বুলি কৈ এই অসমৰ ভেটি-মাটি ৰক্ষাৰ প্ৰচেষ্টা চলাই যাব বুলি দোহাৰে। মন্ত্ৰী জনে বৰ্তমান চৰকাৰখনে এফালে উন্নয়ন কৰিব আৰু আনফালে নিজ ধৰ্ম ৰক্ষা কৰাৰ চেষ্টা অব্যাহত ৰাখিব বুলিও স্পষ্ট মন্তব্য কৰে।

উৎসৱ উদযাপন সমিতিৰ সভাপতি চাৰছিল কাঠাৰে সভাপতিত্ব কৰা এই সভা খনৰ আৰম্ভতে গীতাৰ তৃতীয়,একাদশ আৰু পুৰুষোত্তম যোগ পাঠ কৰা হয়। সভাত উত্তৰাখণ্ডৰ জোনা আখৰাৰ মহামণ্ডলেশ্বৰ স্বামী শ্ৰী শ্ৰী যতীন্দ্ৰনানন্দ গিৰী মহাৰাজে ভাষণত কয় যে হিন্দু ধৰ্মাৱলম্বী একাংশই ভুল কৰি আন ধৰ্ম গ্ৰহণ কৰিছে । সেই সকলক মৰমেৰে পুনৰ ওভতাই অনাৰ চেষ্টা চলাব লাগে বুলিও তেওঁ তাৎপৰ্যপূৰ্ণ মন্তব্য কৰে।

সভাত বিশ্ব হিন্দু পৰিষদৰ সুৰেশ সুনীয়ে ভাষণ আগবঢ়াই গীতা আৰু মহাভাৰতৰ বিষয়ে ব্যাখ্যা কৰে। অনুষ্ঠানত নগাঁৱৰ সাংসদ তথা কেন্দ্ৰীয় ৰেল ৰাজ্য মন্ত্ৰী ৰাজেন গোহাইকে ধৰি  বিজেপিৰ বহুকেইজন মন্ত্ৰী বিধায়কে অংশগ্ৰহণ কৰে। আজি দিনৰ ভাগত মন্ত্ৰী হিমন্ত বিশ্ব শৰ্মা, ৰেল মন্ত্ৰী ৰাজেন গোহাঁই,পল্লব লোচন দাস আদি কৰি ইজনৰ পিছত সিজন বিজেপিৰ মন্ত্ৰী বিধায়কে গীতা আশ্ৰমত উপস্থিত হৈ প্ৰথমে নৱ-নিৰ্মিত বিষ্ণু মন্দিৰত সেৱা কৰে।

এই অনুষ্ঠানৰ মাজতে ৰেল ৰাজ্যিক মন্ত্ৰী ৰাজেন গোহাঁই আৰু বিধায়ক শিলাদিত্য দেৱক আঁতৰাই ৰাখি মন্ত্ৰী হিমন্ত বিশ্ব শৰ্মা আৰু তেওঁৰ লগত দুজন মান বিধায়কে সুদূৰ উত্তৰাখণ্ডৰ পৰা অহা মহাৰাজৰ লগত এটা বিশেষ কক্ষত বহু সময়লৈকে গোপন বৈঠকত মিলিত হোৱাটোৱে বিশেষ তাৎপৰ্য বহন কৰিছে।

উল্লেখ্য যে দুপৰীয়া অনুষ্ঠিত গীতা পাঠ অনুষ্ঠানত মন্ত্ৰী হিমন্ত বিশ্ব শৰ্মা  আৰু মহাৰাজৰ উপৰিও বিজেপিৰ বহু কেইজন মন্ত্ৰী বিধায়কে অংশ লৈছিল যদিও ইয়াৰ অধিকাংশই জোতা পিন্ধি গীতা পাঠ কৰাক লৈ একাংশৰ মাজত প্ৰতিক্ৰিয়াৰ সৃষ্টি হৈছে।