ছান্টা কেটাৰিনাঃ ব্ৰাজিলৰ ছান্টা কেটাৰিনা প্ৰদেশৰ প্ৰায়া গ্ৰেণ্ডে চহৰত শনিবাৰে পুৱা হট এয়াৰ বেলুন দুৰ্ঘটনাত ৮ জন লোকে প্ৰাণ হেৰুৱায়। ২১ জন যাত্ৰী কঢ়িয়াই অনা বেলুনটো হঠাতে জুইৰ শিখাত বিস্ফোৰিত হৈ পৰে। ইতিমধ্যে ছ’চিয়েল মিডিয়াত এই দৃশ্যৰ ভিডিঅ’ বিয়পি পৰিছে। দুৰ্ঘটনাটোৰ পিছত সেনা অগ্নিনিৰ্বাপক বাহিনীয়ে প্ৰকাশ কৰা অনুসৰি ১৩ জন যাত্ৰী ৰক্ষা পৰে আৰু স্থানীয় চিকিৎসালয়ত ভৰ্তি কৰোৱা হয়।
লেফটেনেণ্ট কৰ্ণেল জে ভি চিপ্ৰিয়ানো জুনিয়ৰে জনোৱা মতে, বেলুন চালকজনকে ধৰি মুঠ ২১জন লোক বেলুনটোত আছিল। প্ৰাৰম্ভিক তদন্তত বেলুনটোৰ টোপোলাটোৰ ভিতৰতে জুইৰ সূত্ৰপাত হোৱা বুলি জানিব পৰা গৈছে। আৰক্ষীয়ে জনোৱা মতে, চালকজনে বেলুনটো তললৈ নমাই আনিবলৈ চেষ্টা কৰি যাত্ৰীসকলক মাটিৰ কাষ চাপি অহাৰ লগে লগে জপিয়াবলৈ কয়। যিসকলে ক্ষীপ্ৰতাৰে জপিয়াব পাৰিছিল, সেইসকলেই শেষত ৰক্ষা পৰে।
বাকীকেইজনক জ্বলি যোৱা অৱস্থাত উদ্ধাৰ কৰা হয়। প্ৰাইয়া গ্ৰেণ্ডেৰ আৰক্ষী অধীক্ষক টিয়াগো লুইজ লেমছে ফ’লহা ডি চাও পাওলো কাকতক জনোৱা মতে, “চালকে কয় যে জুই প্ৰথমে বাস্কেটৰ ভিতৰৰ পৰা আৰম্ভ হৈছিল। তেওঁ জুইয়ে বেলুনটো তললৈ নমাবলৈ আৰম্ভ কৰিছিল। যেতিয়া মাটি অতি ওচৰত আছিল, তেতিয়া তেওঁ সকলোকে জপিয়াবলৈ কয়। কোনেও জপিয়াব নোৱাৰিলে, জুই বিয়পি পৰিল, আৰু বেলুনটো ধ্বংস হৈ পৰে।”
বতৰ আৰু কাৰিকৰী বিসংগতি এই ঘটনাৰ মূল কাৰণ হিচাপে ওলাই পৰিছে। ছান্টা কেটাৰিনা আৰক্ষী অধীক্ষক উলিছেছ গেব্ৰিয়েলে কয় যে বেলুনটো অস্থিৰভাৱে দোল খাই থকাৰ বাবে মুকলি কৰি দিয়াৰ সময়ত কেইবাজনো লোকে ধৰিবলগীয়া হৈছিল। এই অগ্নিকাণ্ডৰ কাৰণ হ’ল বেলুনটোত গেছ নিৰ্গত হোৱাৰ প্ৰবল সম্ভাৱনা। বেলুনটো শিখা নিবাৰণকাৰী হ’লেও জুই অত্যন্ত তীব্ৰ আছিল বুলিও তেওঁ কয়। এতিয়াও তদন্ত অব্যাহত আছে। বতৰৰ অৱস্থা, কাৰিকৰী ভুল, মানুহৰ ভুলৰ তদন্ত চলি আছে।
