ডিজিটেল ডেস্কঃ পাকিস্তানৰ ৩০টাকৈ চৰকাৰী ৱেবছাইটত ছাৰ্জিকেল ষ্ট্ৰাইক চলালে ভাৰতীয় হেকাৰে। প্ৰাক্তন নৌসেনা বিষয়া কুলভূষণ যাদৱক 'ভুৱা অভিযোগত, ভুৱা গোচৰত’ মৃত্যুদণ্ড দিয়াৰ প্ৰতিশোধ হিচাপে এই হেকিং কৰা হৈছে বুলি জনাইছে লুলজছেক ইণ্ডিয়া নামৰ হেকাৰ গোষ্ঠাটোৱে।
হেকিঙৰ ফলত চুবুৰীয়া দেশখনৰ ৩০টাকৈ গুৰুত্বপূৰ্ণ ৱেবছাইট সম্পূৰ্ণৰূপে বিধ্বস্ত হৈ পৰিছে। প্ৰত্যেকটো ৱেবছাইটত এতিয়া কেৱল ৩ টা বাক্যই জিলিকি থাকে। সেয়া হৈছে- 'কুলভূষণ যাদৱৰ বিৰুদ্ধে উত্থাপন কৰা সমস্ত অভিযোগ ভুৱা, কাল্পনিক আৰু উদ্দেশ্যপ্ৰণোদিত। তেওঁৰ বিৰুদ্ধে ষড়যন্ত্ৰ কৰাৰ কোনো প্ৰমাণ পাকিস্তানৰ ওচৰত নাই। এয়া শীতল মস্তিষ্কৰ এক পৰিকল্পিত হত্যাকাণ্ড।’’
উল্লেখ্য যে বিশ্বৰ প্ৰায় সকলো দেশতে হেকিং অপৰাধ হিচাপে গণ্য হ’লেও পাকিস্তান, চীন, ইৰাণ আৰু উত্তৰ কোৰিয়াত হেকাৰসকলক চৰকাৰী সাহায্য আগবঢ়োৱা হয় যাতে তেওঁলোকে শত্ৰু ৰাষ্ট্ৰৰ বিভিন্ন ৱেবছাইটত আক্ৰমণ চলাই গোপন তথ্য হৰলুকি কৰাৰ লগতে ৱেবছাইট বিকল কৰি পেলাব পাৰে। কিন্তু ভাৰতত এনে নহয়। এতিয়া দায়িত্ব স্বীকাৰ কৰাৰ পিছত লুলজছেক ইণ্ডিয়াৰ বিৰুদ্ধে কোনো ব্যৱস্থা গ্ৰহণ কৰা হয় নে নহয় সেয়া লক্ষণীয় হ’ব।
ইয়াৰ লগতে তেলেংগানা চাইবাৰ ৱাৰিয়ৰ্ছ আৰু কেৰালা চাইবাৰ ৱেৰিয়ৰ্ছ নামৰ আৰু দুটা হেকিং গোষ্ঠীয়েও পাকিস্তানৰ আৰু দুটা গুৰুত্বপূৰ্ণ ৱেবছাইট হেক কৰা বুলি জানিব পৰা গৈছে। এই ঘটনাৰ পিছত পাকিস্তানী হেকাৰসকলেও সক্ৰিয় হৈ ভাৰতৰ বিভিন্ন গুৰুত্বপূৰ্ণ ৱেবছাইট হেক কৰাৰ চেষ্ট চলাব পাৰে বুলি আশংকা ব্যক্ত কৰিছে চাইবাৰ বিশেষজ্ঞসকলে। সেয়ে এনে আক্ৰমণ ৰোধ কৰিবলৈ চাইবাৰ সুৰক্ষা আৰু অধিক শক্তিশালী কৰাৰ পৰামৰ্শ আগবঢ়াইছে বিশেষজ্ঞসকলে।