কাজিৰঙাঃ ৰাজ্যৰ অন্যতম ব্যৰ্থ বিভাগটোৱে হৈছে বন বিভাগ৷ বন মন্ত্ৰীয়ে চমক সৃষ্টিৰ বাবে ন’ ন’ কথা কয় যদিও সকলো ফুটুকৰা ফেনত পৰিণত হয়৷ ব্যৰ্থ বন বিভাগটোৰ বাবে যোৱা ৩০ ঘন্টাৰ ভিতৰত ৰাজ্যত চাৰিটাকৈ বনৰীয়া হাতীৰ মৃত্যু হোৱাৰ লগতে চোৰাং চিকাৰীয়ে এটি গঁড় হত্যা কৰি খৰ্গ কাটি লৈ যায়৷ বন বিভাগৰ চৰম ব্যৰ্থতাৰ বাবে এতিয়া ৰাজ্যত প্ৰতিদিনে গঁড় হত্যা, হাতীয়ে অকালতে প্ৰাণ হেৰুৱাব লগা হৈছে৷ কাজিৰঙাৰ ষষ্ঠ সংযোজনত গঁড় হত্যা কৰি চোৰাং চিকাৰীয়ে খৰ্গ কাটি নিয়াৰ ২৪ ঘন্টা পাৰ নৌহওঁতেই পুনৰ এটি গঁড় হত্যা কৰি খৰ্গ কাটি নিয়াৰ চেষ্টা কৰাৰ ঘটনাই তীব্ৰ চাঞ্চল্যৰ সৃষ্টি কৰিছে৷
বিশ্বনাথ জিলাৰ বাঘমাৰীত গঁড় হত্যা কৰি খৰ্গ কাটি নিয়ে আৰু দেওবাৰে মৃতদেহ উদ্ধাৰ হোৱাৰ পিছত সোমবাৰে পুনৰ কাজিৰঙা ৰাষ্ট্ৰীয় উদ্যানত উদ্ধাৰ হয় এটি আহত গঁড়৷ কাজিৰঙা ৰাষ্ট্ৰীয় উদ্যানৰ কঁহৰা বনাঞ্চলত উদ্ধাৰ হয় গঁড়টো। জানিব পৰা মতে, কাজিৰঙা ৰাষ্ট্ৰীয় উদ্যানত সোমবাৰে কেইবাগৰাকী বিদেশী পৰ্যটকে উদ্যান খন ভ্ৰমণ কৰে৷ ভ্ৰমণ কালত কেইগৰাকীমান পৰ্যটকে গঁড়টো চটফটাই থকা প্ৰত্যক্ষ কৰে৷ ততাতৈয়াকৈ পৰ্যটক কেইগৰাকীয়ে বন বিভাগৰ লোকক খবৰ দিয়ে। চোৰাংচিকাৰীয়ে দেওবাৰে নিশা গড়টোক গুলীয়াই আহত কৰাৰ সন্দেহ কৰা হৈছে।
