জাজৰিঃ শংকৰদেৱ বঁটা প্ৰাপক, বিশিষ্ট বৈষ্ণৱ পণ্ডিত, আচাৰ্য প্ৰয়াত ইলাৰাম দাসে প্ৰচাৰ কৰা অসমৰ বৃহৎ ধৰ্মীয় অনুষ্ঠান এক শৰণ ভাগৱতী সমাজৰ বটদ্ৰৱা আঞ্চলিক শাখাৰ ৩৮ সংখ্যক মহাপালনাম আৰু বাৰ্ষিক অধিৱেশনখনি অহা ২৯ আৰু ৩০ মাৰ্চত দুদিনীয়া কাৰ্যসূচীৰে আঞ্চলিকখনৰ অন্তৰ্গত বোৱালগুৰি আদৰ্শগাঁও বৰনামঘৰ প্ৰাংগনত আয়োজন কৰা হৈছে।
কাৰ্যসূচী অনুসৰি প্ৰথমদিনা পুৱা ৮ বজাত ধৰ্মধ্বজা উত্তোলনেৰে দুদিনীয়া কাৰ্যসূচীৰ আৰম্ভণি কৰিব আঞ্চলিকৰ সভাপতি পূৰ্ণকান্ত দাসবাপে। পুৱা ৯ বজাত তৰুণ বিদ্যাৰ্থী সমাজৰ প্ৰাৰ্থনা সভা, ১০ বজাত দুৰণিবটীয়া ভকতসকলক আদৰণি, ১১ বজাত খোল-প্ৰসংগ, নাম-প্ৰসংগ আৰু বিয়লি ২ বজাত ধৰ্মালোচনী সভা।
উক্ত ধৰ্মালোচনী সভাত সভাপতিত্ব কৰিব এক শৰণ ভাগৱতী সমাজ অসমৰ উপাচাৰ্য অনুৰাম দাসবাপে। আচাৰ্য প্ৰণাম অনুষ্ঠানৰ আঁত ধৰিব ভাগৱতী সমাজ অসমৰ তত্ব পৰিষদৰ সদস্য মুহিধৰ আতাই। ভাগৱতী সমাজৰ নগাঁও জিলাৰ সভাপতি ভুবনেশ্বৰ দাসে উদ্বোধন কৰিবলগীয়া ধৰ্মালোচনী সভাত নিদ্দিষ্ট বক্তাৰ ভাষণ প্ৰদান কৰিব ভাগৱতী সমাজ অসমৰ প্ৰধান সচিব জীৱন চন্দ্ৰ কাকতি আৰু মোলান চন্দ্ৰ দাসে।
সন্ধ্যা বন্তি প্ৰজ্বলনৰ পাছত নিশা ৮ বজাত গুণমালা কীৰ্তন আৰু নিশা ১০ বজাৰপৰা ৩০ মাৰ্চৰ পুৱা ৮ বজালৈ মহা পালনাম কীৰ্তন চলি থাকিব। তাৰ পাছতেই ভাগৱত শোভাযাত্রা আৰু দুপৰীয়া নাম-প্ৰসংগ অনুষ্ঠিত হ’ব। এই ধৰ্মীয় কাৰ্যসূচীলৈ সকলো ভক্তপ্ৰাণ ৰাইজৰ উপস্থিতি কামনা কৰিছে বটদ্ৰৱা আঞ্চলিকৰ সম্পাদক শংকৰ দাসে।