ওৰাংঃ ওৰাঙৰ বিশিষ্ট চিত্ৰশিল্পী জগত চন্দ্ৰ শইকীয়াৰ দেওবাৰে নিশা ৮-৩০ বজাত ৯৫ বছৰ বয়সত মৃত্যু হয়। বৃহত্তৰ ওৰাং অঞ্চলৰ চিৰ পৰিচিত শইকীয়াই শৈশৱৰে পৰা চিত্ৰশিল্পৰ সৈতে জড়িত হৈ পৰিছিল।
১৯৮৪ চনত শিক্ষকতাৰ পৰা অৱসৰ গ্ৰহণ কৰাৰ পিছতো তেওঁ চিত্ৰশিল্পৰ সাধনা অব্যাহত ৰাখিছিল। শিক্ষকতা আৰু চিত্ৰশিল্পৰ সমান্তৰালভাৱে সমাজ সেৱাৰে তেওঁ অঞ্চলবাসী ৰাইজৰ মাজৰ এজন হৈ পৰিছিল।
অনাথ শিশুসকলক শিক্ষা গ্ৰহণত সুবিধা কৰি দিয়াৰ লগতে কেবাগৰাকী অনাথ কিশোৰীক পঢ়াই-শুনাই বিয়া-বাৰুৰ দায়িত্বও লৈছিল শইকীয়াই।
ওৰাং সংগীত মহাবিদ্যালয়ৰ পৰিচালনা সমিতিৰ সভাপতি হিচাপে কাৰ্যনিৰ্বাহ কৰাৰ লগতে ওৰাং ৰাজহুৱা নামঘৰ, ওৰাং অঞ্চলৰ বিভিন্ন অনুষ্ঠান-প্ৰতিষ্ঠানৰ সৈতে তেওঁ ওতঃপ্ৰোত ভাৱে জড়িত আছিল। তেওঁৰ মৃত্যুত সমগ্ৰ ওৰাং অঞ্চলতে শোকৰ ছাঁ পৰিছে।
ওৰাং সাংবাদিক সন্থা, মাছ ওৰাং আঞ্চলিক, আপকু ওদালগুৰি জিলা, বিটিচি সাংবাদিক সন্থাৰ ওদালগুৰি জিলা সমিতি, ওৰাং সংগীত মহাবিদ্যালয়, অসম জাতীয়তাবাদী যুৱ-ছাত্ৰ পৰিষদৰ ওৰাং আঞ্চলিক সমিতিকে আদি কৰি একাধিক দল-সংগঠনে তেওঁৰ বিয়োগত শোক প্ৰকাশ কৰি পৰিয়ালবৰ্গলৈ সমবেদনা জ্ঞাপন কৰিছে।