জাগীৰোডঃ নেলীৰ গণহত্যাই ভৰি দিলে ৩৬ বছৰত৷ ১৯৮৩ চনৰ ১৮ ফ্ৰেব্ৰুৱাৰীত সংঘটিত হৈছিল এই নাৰকীয় কাণ্ড৷ এই ঘটনাত নিহত হৈছিল শিশু, পুৰুষ, মহিলাকে ধৰি প্ৰায় দুই সহস্ৰাধিক৷
কিন্তু আজিলৈকে কোনো সাহায্য নাপালে নিহতসকলৰ পৰিয়ালে৷ নেলীৰ এই নাৰকীয় গণহত্যাই আজিও ৰিঙিয়াই মাতে নেলীবাসীক৷ জুয়ে পুৰা ৮৩ৰ দিনটোক নেলীৰ মূলাধাৰীত স্মৰণ কৰিলে নেলীবাসীয়ে৷ নেলীৰ এনে ঘটনাৰ যাতে পুনৰাবৃত্তি নঘটে তাৰ কামনা কৰিলে সকলোৱে৷
দেওবাৰে নেলীৰ মূলাধাৰীত নেলী ডেভেলপমেন্ট কমিটীৰ উদ্যোগত আয়োজিত এক বিশেষ অনুষ্ঠানত আমছুৰ উপদেষ্টা আজিজুৰ ৰহমান উপস্থিত থাকি নেলীক লৈ যাতে ভৱিষ্যতে কোনেও ৰাজনীতি নকৰে তাক সকীয়াই দিয়ে৷
আনহাতে আমছুৰ সভাপতি ৰেজাউল কৰিম চৰকাৰে কয় যে ১৮ ফ্ৰেব্ৰুৱাৰীত নেলীৰ গণহত্যাৰ প্ৰতিবাদত ক’লা দিৱস কাৰ্যসূচী ৰূপায়ণ কৰিব৷ উক্ত অনুষ্ঠানতে "তেজে তিতা নেলীৰ বুকুত হওক জাতীয় ছহিদ মিনাৰ" আৰু "উদিত নেলী" নামৰ দুখন গ্ৰন্থ মুকলি কৰে৷