জাজৰিঃ কিছুদিনৰেপৰা নগাঁও জিলাৰ জাজৰি থানা, বটদ্ৰৱা থানা আৰু মিকিৰভেটা থানা এলেকাত সঘনে গৰু চুৰি কাৰ্য সংঘটিত হৈ থকাৰ সময়তে বৃহস্পতিবাৰে পুৱতি নিশা প্ৰায় ২ বজাত জাজৰি আৰক্ষী থানাৰ নৈশ তহলদাৰী বাহিনীয়ে ৪ টা গভাইত চোৰক কৰায়ত্ব কৰে।
জাজৰি থানাৰ ভাৰপ্ৰাপ্ত বিষয়া অমল কুমাৰ আচাৰ্যীৰ ভাষ্য মতে, পুৱতি নিশা ২ বজাত জাজৰি থানাৰ অন্তৰ্গত কাকমাৰীত এখন মেক্সিম মিনি ভেন এএছ০২এচি৭৫৩৩ (ভিএক্স)ক সন্দেহবসত ধৰাত গাড়ীখনত বহু আপত্তিজনক বস্তু পোৱাৰ লগতে এখন চুৰী, ৰছী আদি উদ্ধাৰ কৰে।
উল্লেখ্য যে কৰায়ত্ব হোৱা চেলিম জাবেদ (২৪), জুৱেল হক (২৪), ৰাহুল আমিন (২২), আজাহাৰউদ্দিন (২২)ৰ ঘৰ মিকিৰভেটা থানাৰ অন্তৰ্গত বড়িবজাৰ, চমকা আৰু শিলপুখুৰীত। আৰক্ষীৰ আগত গৰু চুৰিকে ধৰি বিভিন্ন অসামাজিক কাৰ্যত জড়িত থকাৰ কথা স্বীকাৰ কৰিছে দলটোৱে। ধৃত চাৰিজনকে ৰঙাঘৰলৈ প্ৰেৰণ কৰিছে আদালতে।
টেম্পোসহ ছাগলী চোৰ আটক
ইফালে, জাজৰি থানাৰ আৰক্ষীয়ে শুকুৰবাৰে দিনৰ ১ মান বজাত ৰাইজৰ সহযোগত ২ টা ছাগলী চোৰক হাতে-লুটে আটক কৰে।
জানিব পৰা মতে, মিকিৰভেটা থানাৰ অন্তৰ্গত চাহখোৱা পুখুৰীৰ হেমপেটি আলি আৰু এএছ০২ই৯৬৩৮ নম্বৰৰ টেম্পোখনৰ চালক ইক্ৰামূল হকে জাজৰি আৰক্ষী থানাৰ অন্তৰ্গত হাতীচোং বেজৰচুকৰপৰা এটা ছাগলী চুৰি কৰি টেম্পোখনত লৈ গোসাঁইবড়ি-জাজৰি পথেৰে তীব্ৰ বেগেৰে আহি থকাত স্থানীয় প্ৰত্যক্ষদৰ্শীয়ে সন্দেহ কৰি গাড়ীখন ৰখাবলৈ কয়। টেম্পো চালকজনে পলাবলৈ চেষ্টা কৰোতে পথৰ কাষত টেম্পোখন বাগৰি পৰে আৰু ছাগলীসহ চালকজনক ৰাইজে ধৰি জাজৰি আৰক্ষীক চমজি দিয়ে।