দীঘলীয়া কাৰাবন্দিত্ব আৰু একাধিকবাৰ অলেখ প্ৰকাৰে বাতৰিৰ শিৰোনাম দখলৰ অন্তত অৱশেষত বেলমাৰ্চ কাৰাগাৰৰ পৰা মুকলি হ’ল ৱিকিলিকছৰ প্ৰতিষ্ঠাপক জুলিয়ান আছাঞ্জে। বৰ্তমান বীৰত্ব আৰু বিতৰ্ক দুয়োটাৰে প্ৰতীক আছাঞ্জে আমেৰিকাৰ ফেডাৰেল প্ৰচিকিউটৰৰ সৈতে সম্পন্ন কৰা চুক্তিৰ ওপৰত দৃষ্টি নিৱদ্ধ আছিল সমগ্ৰ বিশ্বৰ। এতিয়া চোৰাংচোৱা আইনৰ অধীনত থকা অভিযোগত দোষ স্বীকাৰ কৰা এই স্বীকাৰোক্তি চুক্তিয়ে অন্ত পেলালে আছাঞ্জেৰ জীৱনৰ এক নাটকীয় অধ্যায়ৰ। 

সুদীৰ্ঘ ৫ বছৰ সময় ব্ৰিটিছ কাৰাগাৰত কাৰাবন্দী হৈ থকাৰ পিছত আমেৰিকাৰ সৈতে চুক্তি সম্পন্ন কৰি ব্ৰিটেইনৰ পৰা আমেৰিকালৈ ৰাওনা হৈছে আছাঞ্জে। আমেৰিকাৰ সৈতে হোৱা চুক্তি অনুসৰি, আছাঞ্জেই আদালতত চোৰাংচোৱাগিৰিৰ গোচৰত নিজৰ দোষ স্বীকাৰ কৰিব। ইয়াৰ বাবে তেওঁ বুধবাৰে দক্ষিণ প্ৰশান্ত মহাসাগৰত অৱস্থিত উত্তৰ মাৰিয়ানা দ্বীপপুঞ্জৰ আদালতত হাজিৰ হ’ব। আমেৰিকাৰ ন্যায়িক পক্ষই প্ৰথমে আছাঞ্জেৰ বিৰুদ্ধে ১৮টা গোচৰত বিচাৰ বিচাৰিছিল। এই গোচৰসমূহৰ অধিকাংশই ইৰাক আৰু আফগানিস্তানৰ যুদ্ধৰ সৈতে জড়িত নথি-পত্ৰ ফাদিল হোৱাৰ সৈতে জড়িত আছিল।

২০১৯ চনত আমেৰিকা চৰকাৰে ৱিকিলিকছৰ প্ৰতিষ্ঠাপক সন্দৰ্ভত এক বিবৃতি প্ৰকাশ কৰিছিল য’ত ১৮টা অভিযোগৰ কথা উল্লেখ কৰা হৈছিল। অৱশ্যে আছাঞ্জেই এই অভিযোগসমূহ তেওঁৰ সাংবাদিকতাৰ অংশ বুলি নাকচ কৰিছিল। কিন্তু বুধবাৰে তেওঁ মাত্ৰ এটা অভিযোগৰহে উত্তৰ দিব। 

ইফালে আন্তঃৰাষ্ট্ৰীয় সংবাদ মাধ্যমৰ প্ৰতিবেদন অনুসৰি ন্যায় বিভাগৰ বিষয়াসকলে আছাঞ্জেই দোষ স্বীকাৰ কৰিলে তেওঁক ৬২ মাহৰ কাৰাদণ্ড বিহাৰ পৰামৰ্শ আগবঢ়াইছে। যদি এনেকুৱা হয় তেন্তে আমেৰিকাৰ কাৰাগাৰলৈ যোৱাৰ পৰা ৰক্ষা পৰিব ৱিকিলিকছৰ প্ৰতিষ্ঠাপক জুলিয়ান আছাঞ্জে। কিয়নো তেওঁ ইতিমধ্যেই ব্ৰিটিছ কাৰাগাৰত ইমান সময় কটাবলগীয়া হৈছে।

আছাঞ্জেৰ শাস্তি সন্দৰ্ভত তেওঁৰ অধিবক্তাই কয় যে যদি তেওঁক পূর্বে তেওঁৰ বিৰুদ্ধে উত্থাপিত ১৮টা অভিযোগত দোষী সাব্যস্ত কৰা হ’লহেঁতেন তেন্তে তেওঁক ১৭৫ বছৰৰ কাৰাদণ্ড বিহা হ’ব পাৰিলেহেঁতেন৷ কিন্তু আমেৰিকাত বিচাৰ বিভাগে কয় যে শাস্তি মাত্ৰ চাৰিৰ পৰা ছয় বছৰৰ ভিতৰত হ’ব।

আছাঞ্জেৰ বিৰুদ্ধে চলিছে হত্যাৰ ষড়যন্ত্ৰ!

জুলিয়ান আছাঞ্জেৰ বিচাৰৰ বাবে এক অনন্য উপায় বিচাৰি উলিওৱা হৈছে। আমেৰিকাৰ অংশ দক্ষিণ প্ৰশান্ত মহাসাগৰত অৱস্থিত উত্তৰ মাৰিয়ানা দ্বীপপুঞ্জৰ এখন আদালতক তেওঁৰ বিৰুদ্ধে গোচৰৰ শুনানিৰ বাবে নিৰ্বাচিত কৰা হৈছে।

ন্যায় বিভাগৰ এখন পত্ৰত লিখা আছে যে জুলিয়ান আছাঞ্জেই কৰা চুক্তি অনুসৰি তেওঁ আমেৰিকালৈ অহাতো বিশ্বাসযোগ্য বুলি নাভাবে। তেওঁ নিজৰ ইচ্ছামতে আমেৰিকালৈ আহিব বিচৰা নাই। আমেৰিকা চৰকাৰৰ ওপৰত তেওঁৰ একেবাৰেই আস্থা নাই, আনকি আমেৰিকাৰ বিষয়াসকলে তেওঁক হত্যা কৰাৰ ষড়যন্ত্ৰ ৰচিছে বুলিও অভিযোগ উত্থাপন কৰে আছাঞ্জেই। ইয়াৰ উপৰিও এই দ্বীপসমূহ অষ্ট্ৰেলিয়াৰ পৰা নিকটৱৰ্তী হোৱাৰ বাবে তেওঁ শুনানিৰ বাবে আদালতত উপস্থিত হৈ তাৰ পৰা পুনৰ অষ্ট্ৰেলিয়ালৈ উভতি যাব পাৰিব বুলিও মন্তব্য কৰে আছাঞ্জেই।

আছাঞ্জেক লৈ কি কয় ৱিকিলিকছে?

জুলিয়ান আছাঞ্জেৰ মুক্তিৰ খবৰ অহাৰ পিছতে ৱিকিলিকছে ছ’চিয়েল মিডিয়া প্লেটফৰ্ম এক্সত এটা পোষ্ট কৰে। য’ত ৱিকিলিকছে লিখিছে, “জুলিয়ান আছাঞ্জে মুক্ত। ১৯০১ দিনৰ কাৰাবাসৰ পিছত ২৪ জুনৰ পুৱাৰ ভাগত তেওঁ বেলমাৰ্চ জেলৰ পৰা ওলাই আহে। লণ্ডন উচ্চ ন্যায়ালয়ৰ পৰা জামিন লাভ কৰি ষ্টেনষ্টেড বিমানবন্দৰত মুকলি কৰি দিয়া হয় য’ৰ পৰা তেওঁ ব্ৰিটেইন এৰি যায়।’’

ৱিকিলিকছৰ মতে, কাৰামুক্তিৰ বাবে চলোৱা এক বিশ্বব্যাপী অভিযান আৰু ৰাষ্ট্ৰসংঘত এই কাৰাদণ্ডক লৈ প্ৰশ্নৰ উত্থাপন কৰা ৰাষ্ট্ৰনেতাসকলৰ বাবেও আজি মুক্তিলাভ কৰিবলৈ সক্ষম হৈছে জুলিয়ান আছাঞ্জেই। লগতে ৱিকিলিকছে এয়াও কয় যে আমেৰিকাৰ ন্যায় বিভাগৰ সৈতে আছাঞ্জেৰ চুক্তি হৈছে যদিও এই চুক্তি এতিয়াও চূড়ান্ত হোৱা নাই।

ৱিকিলিকছে পুনৰ কয়, “পাঁচ বছৰ ধৰি ২x৩ মিটাৰৰ এটা কোঠাত দিনটোৰ ২৩ ঘণ্টা সময় আৱদ্ধ হৈ পাৰ কৰাৰ পিছত এতিয়া আছাঞ্জেই তেওঁৰ পত্নী ষ্টেলা আছাঞ্জে আৰু সন্তানসকলৰ মাজলৈ উভতি যাব পাৰিব।”

আমি সকলো প্ৰকাৰে প্ৰয়াস কৰিছোঃ অষ্ট্ৰেলিয়াৰ প্ৰধানমন্ত্ৰী

আছাঞ্জেৰ মুক্তিৰ খবৰ লাভ কৰাৰ পিছতে প্ৰতিক্ৰিয়া প্ৰকাশ কৰে অষ্ট্ৰেলিয়াৰ প্ৰধানমন্ত্ৰী এণ্টনি আলবানিছেও। তেওঁ কয়, ''মই ইতিবাচক ফলাফলৰ বাবে সকলো সঠিক পথ অনুসৰণ কৰি অষ্ট্ৰেলিয়াৰ স্বাৰ্থৰ পোষকতা অব্যাহত ৰাখিছো আৰু প্ৰধানমন্ত্ৰী হিচাপে কাৰ্যভাৰ গ্ৰহণ কৰাৰ প্ৰথম দিনাৰ পৰাই মই এই কাম কৰি আহিছো। আইনী প্ৰক্ৰিয়া সম্পূৰ্ণ হোৱাৰ পিছত আৰু এই বিষয়ে কথা কম, যিটো অতি সোনকালে হ’ব বুলি মই ভাবো আৰু সঠিক সময়ত উপস্থিত থাকিম।’’

উল্লেখ্য যে, বছৰৰ আৰম্ভণিতে অষ্ট্ৰেলিয়াৰ সংসদে আলবানিজৰ সমৰ্থনত আছাঞ্জেক মুকলি কৰি দিয়াৰ আহ্বান জনাই এক ব্যৱস্থা গৃহীত কৰিছিল। অৱশ্যে এই বিষয়ত আমেৰিকাৰ ৰাষ্ট্ৰপতি জো বাইডেনে কোনো ধৰণৰ প্ৰতিক্ৰিয়া প্ৰকাশ কৰা নাই। কিন্তু এবাৰ তেওঁ কৈছিল যে তেওঁ অষ্ট্ৰেলিয়াৰ পৰা অহা অনুৰোধটো বিবেচনা কৰি আছে।

কিয় গ্ৰেপ্তাৰ কৰা হৈছিল জুলিয়ান আছাঞ্জেক?

ৱিকিলিকছৰ প্ৰতিষ্ঠাপক জুলিয়ান আছাঞ্জেই বিশ্ব ৰাজনীতি আৰু সাংবাদিকতাৰ মেৰুকৰণকাৰী ব্যক্তিত্ব হিচাপে কাম কৰি আহিছে। ১৯৭১ চনৰ ৩ জুলাইত অষ্ট্ৰেলিয়াৰ টাউনছভিলত জন্মগ্ৰহণ কৰা আছাঞ্জেই ২০০৬ চনত গোপনীয় আৰু স্পৰ্শকাতৰ তথ্য প্ৰকাশৰ বাবে গঠিত সংস্থা ৱিকিলিকছ প্ৰতিষ্ঠা কৰি প্ৰাধান্য লাভ কৰে। ২০১০ চনত আমেৰিকান সেনাৰ চোৰাংচোৱা বিশ্লেষক চেলচিয়া মেনিঙে প্ৰদান কৰা ধাৰাবাহিক লিক প্ৰকাশ কৰাৰ পিছত ৱিকিলিকছ বিশ্বজুৰি পৰিচিত হৈছিল। সেই সময়তে ৱিকিলিকছে বাগদাদত আমেৰিকাৰ সামৰিক হেলিকপ্টাৰ আক্ৰমণত ৰয়টাৰৰ দুগৰাকী সাংবাদিককে ধৰি কেইবাজনো লোকৰ মৃত্যু হোৱা কুখ্যাত "কলাটেৰেল মাৰ্ডাৰ" ভিডিঅ'ৰ প্ৰচাৰ কৰিছিল।

২০১০ চনত আছাঞ্জেৰ আইনী সমস্যা আৰম্ভ হয়, যেতিয়া ছুইডেনৰ কৰ্তৃপক্ষই ধৰ্ষণ আৰু নিৰ্যাতনকে ধৰি যৌন অসৎ আচৰণৰ অভিযোগৰ ভিত্তিত তেওঁৰ বিৰুদ্ধে গ্ৰেপ্তাৰী পৰোৱানা জাৰি কৰে। কিন্তু এয়া ৰাজনৈতিক উদ্দেশ্যপ্ৰণোদিত বুলি দাবী কৰি আছাঞ্জেই এই অভিযোগ অস্বীকাৰ কৰে। কিন্তু তেওঁ অস্বীকাৰ কৰাৰ পিছতো ছুইডেনৰ কৰ্তৃপক্ষই গোচৰটো আগবঢ়াই নিয়ে আৰু পৰিণামস্বৰূপে ২০১০ চনৰ নৱেম্বৰ মাহত আন্তঃৰাষ্ট্ৰীয় গ্ৰেপ্তাৰী পৰোৱানা জাৰি কৰা হয়। ২০১০ চনৰ ডিচেম্বৰ মাহত লণ্ডনত আছাঞ্জেক গ্ৰেপ্তাৰ কৰা হৈছিল যদিও ছুইডেনলৈ প্ৰত্যাৰ্পণৰ বাবে যুঁজি থকাৰ সময়তে তেওঁক জামিনত মুকলি কৰি দিয়া হয়।

২০১২ চনৰ জুন মাহত ব্ৰিটেইনত নিজৰ আইনী বিকল্প শেষ কৰাৰ পিছত আছাঞ্জেই ছুইডেনক প্ৰত্যাৰ্পণৰ পৰা হাত সাৰিবলৈ লণ্ডনত থকা ইকুৱেডৰৰ দূতাবাসত আশ্ৰয় বিচাৰিছিল। প্ৰায় সাত বছৰ তেওঁ দূতাবাসত আছিল, এই সময়ছোৱাত তেওঁ ৱিকিলিকছ চলাইছিল আৰু স্পৰ্শকাতৰ নথি-পত্ৰ প্ৰকাশ কৰিছিল। ইকুৱেডৰে তেওঁৰ আশ্ৰয় প্ৰদান কৰিছিল, যাৰ ফলত তেওঁক দূতাবাস ঘেৰি ৰখা ব্ৰিটিছ কৰ্তৃপক্ষই গ্ৰেপ্তাৰৰ পৰা হাত সাৰিব পাৰিছিল।

২০১৯ চনৰ ১১ এপ্ৰিলত ইকুৱেডৰে আছাঞ্জেৰ আশ্ৰয় বাতিল কৰাৰ পিছতে তেওঁৰ পৰিস্থিতিয়ে নাটকীয় ৰূপ ধাৰণ কৰে। ইয়াৰ পিছতে ২০১২ চনত তেওঁক প্ৰদান কৰা জামিন চৰ্তৰ সৈতে জড়িত বিষয়ত আদালতত হাজিৰ নোহোৱাৰ বাবে গ্ৰেপ্তাৰ কৰা হয়। গ্ৰেপ্তাৰ হোৱাৰ পিছত তেওঁক জামিন আইন উলংঘা কৰাৰ অপৰাধত দোষী সাব্যস্ত কৰা হয় আৰু ৫০ সপ্তাহৰ কাৰাদণ্ড বিহা হয়। এই গ্ৰেপ্তাৰৰ ফলত তেওঁক আমেৰিকালৈ প্ৰত্যাৰ্পণৰ পথো মুকলি কৰা হয়, য’ত তেওঁ চোৰাংচোৱা আইনৰ অধীনত একাধিক অভিযোগৰ সন্মুখীন হ’বলগীয়া হয়।

আছাঞ্জেৰ বিৰুদ্ধে আমেৰিকাৰ অভিযোগৰ মূলতে হৈছে ৱিকিলিকছে সামৰিক আৰু কূটনৈতিক কেবলকে ধৰি গোপনীয় নথি-পত্ৰ প্ৰকাশ কৰা। আমেৰিকা চৰকাৰে আছাঞ্জেই চেলচিয়া মেনিঙৰ সৈতে পেন্টাগনৰ কম্পিউটাৰ নেটৱৰ্কত হেক কৰি গোপনীয় তথ্য লাভ কৰাৰ ষড়যন্ত্ৰ কৰাৰ অভিযোগ উত্থাপন কৰে। এই অভিযোগত চোৰাংচোৱা আইন উলংঘা কৰাৰ ১৭টা আৰু কম্পিউটাৰ হেকিঙৰ ষড়যন্ত্ৰৰ এটা গোচৰ আছিল। এই অভিযোগে সংবাদ মাধ্যমৰ স্বাধীনতা আৰু গোপনীয় তথ্য প্ৰকাশৰ ক্ষেত্ৰত সাংবাদিকৰ ভূমিকা সম্পৰ্কে এক উল্লেখযোগ্য বিতৰ্কৰ সৃষ্টি কৰে।

অন্যহাতে বছৰ বছৰ ধৰি অব্যাহত আছে আছাঞ্জেৰ আইনী যুদ্ধ। আদালতত তেওঁৰ পক্ষই যুক্তি দিয়ে যে তেওঁক আমেৰিকালৈ প্ৰত্যাৰ্পণ কৰাটো সংবাদ মাধ্যমৰ স্বাধীনতাৰ প্ৰতি ভাবুকি হ’ব আৰু ই বিশ্বজুৰি সাংবাদিকসকলৰ বাবে এক বিপজ্জনক নজিৰ গঢ়ি তুলিব পাৰে। ২০২১ চনৰ জানুৱাৰী মাহত ব্ৰিটেইনৰ এখন আদালতে তেওঁৰ মানসিক স্বাস্থ্য আৰু আমেৰিকাত কঠোৰ কাৰাগাৰৰ পৰিস্থিতিত ৰখা হ’লে আত্মহত্যাৰ আশংকাৰ উদ্বেগ প্ৰকাশ কৰি স্বাস্থ্যৰ ভিত্তিত তেওঁক আমেৰিকালৈ প্ৰত্যাৰ্পণৰ বিৰুদ্ধে ৰায় দিয়ে। অৱশ্যে এই সিদ্ধান্তৰ পিছত আমেৰিকা চৰকাৰে আবেদন জনায়।

পৰৱৰ্তী সময়ত ২০২৪ চনৰ জুন মাহলৈকে আমেৰিকাৰ ফেডাৰেল প্ৰচিকিউটৰৰ সৈতে আবেদন চুক্তিত উপনীত হোৱাৰ পিছত আছাঞ্জেক লণ্ডনৰ বেলমাৰ্চ কাৰাগাৰৰ পৰা মুকলি কৰি দিয়া হৈছে। এই চুক্তিয়ে তেওঁক নিজৰ স্বাধীনতাৰ বিনিময়ত চোৰাংচোৱা আইনৰ অধীনত একক অভিযোগত দোষ স্বীকাৰ কৰিবলৈ অনুমতি দিয়ে, যাৰ ফলত একাধিক মহাদেশক সামৰি লোৱা দীৰ্ঘদিনীয়া আইনী কাহিনীৰ অন্ত পৰে আৰু ৰাষ্ট্ৰীয় নিৰাপত্তা আৰু সংবাদ মাধ্যমৰ স্বাধীনতাৰ মাজৰ ভাৰসাম্যৰ ওপৰত গুৰুত্বপূৰ্ণ প্ৰশ্ন উত্থাপন হয়।

আছাঞ্জেৰ প্ৰত্যাৰ্পণ কিয় বিচাৰিছিল আমেৰিকাই?

২০১০ চনত ইৰাকত আমেৰিকান সৈন্যই হেলিকপ্টাৰৰ পৰা সাধাৰণ নাগৰিকক হত্যা কৰা এটা ফুটেজ প্ৰকাশ কৰাৰ সময়ত ৱিকিলিকছে শিৰোনাম দখল কৰিছিল। এই ভিডিঅ’টো প্ৰকাশ পোৱাৰ পিছত তেওঁক সমৰ্থন কৰা আমেৰিকান বিশ্লেষক চেলচিয়া মেনিঙক ২০১০ চনত আমেৰিকাত গ্ৰেপ্তাৰ কৰা হয়। মেনিঙে গোপনীয়তা বিৰোধী ৱেবছাইটৰ সহযোগত ৭ লাখ গোপনীয় নথি-পত্ৰ, ভিডিঅ’ আৰু কূটনৈতিক কেবল উদঙাই দিয়াৰ অভিযোগ উত্থাপন হৈছিল। চেলচিয়াৰ মতে, আমেৰিকাৰ বৈদেশিক নীতিৰ ওপৰত বিতৰ্ক আৰম্ভ কৰিবলৈ তেওঁ এই কাম কৰিছিল যদিও আমেৰিকাই কয় যে এই কাম কৰি তেওঁ বহুতৰে জীৱন বিপদত পেলাইছে।

ইফালে ২০১৮ চনত আমেৰিকাৰ ভাৰ্জিনিয়া ৰাজ্যত আছাঞ্জেৰ বিৰুদ্ধে জাৰি কৰা অভিযোগনামাত অভিযোগ কৰা হৈছে যে তেওঁ ২০১০ চনত মেনিঙৰ সৈতে ষড়যন্ত্ৰ কৰি প্ৰতিৰক্ষা বিভাগৰ গোপনীয় তথ্য লাভ কৰিছিল। অভিযোগনামা অনুসৰি ২০১০ চনৰ জানুৱাৰীৰ পৰা মে’ মাহৰ ভিতৰত মেনিঙে আমেৰিকাৰ বিভাগ আৰু সংস্থাসমূহৰ পৰা চাৰিটা ডাটাবেছ ডাউনলোড কৰি ৱিকিলিকছক প্ৰদান কৰিছিল। আমেৰিকাৰ ন্যায় বিভাগে ইয়াক “আমেৰিকাৰ ইতিহাসৰ আটাইতকৈ ডাঙৰ গোপনীয় তথ্যৰ ভংগ” বুলি অভিহিত কৰে।

আনফালে বিবিচিৰ এক প্ৰতিবেদন অনুসৰি জুলিয়ান আছাঞ্জেৰ গোচৰৰ সমাধানৰ বাবে আমেৰিকাৰ বাইডেন প্ৰশাসন দীৰ্ঘদিন ধৰি হেঁচাত পৰিছিল। খোদ এপ্ৰিল মাহত ৰাষ্ট্ৰপতি জো বাইডেনে কৈছিল যে তেওঁৰ ঘনিষ্ঠ মিত্ৰ অষ্ট্ৰেলিয়াই জুলিয়ান আছাঞ্জেৰ প্ৰত্যাৰ্পণৰ গোচৰ আৰু আইনী সমস্যাৰ অন্ত পেলাবলৈ অনুৰোধ জনাইছে।

২০১৯ চনত যেতিয়া ইকুৱেডৰৰ দূতাবাস এৰি ব্ৰিটেইনত জুলিয়ান আছাঞ্জেক গ্ৰেপ্তাৰ কৰা হৈছিল, তেতিয়া হিলাৰী ক্লিণ্টনকে ধৰি বহু ডেম’ক্ৰেট নেতাই কৈছিল যে “তেওঁ (আছাঞ্জেই) যি কৰিছে তাৰ উত্তৰ দিব লাগিব”। জুলিয়ান আছাঞ্জেই ২০১৬ চনৰ ৰাষ্ট্ৰপতি নিৰ্বাচনত ৰাছিয়াৰ সৈতে গোপন বুজাবুজি কৰাৰ অভিযোগ উত্থাপন কৰিছিল আমেৰিকাৰ প্ৰাক্তন বিদেশ মন্ত্ৰী আৰু আন বহু নেতাই।

কিন্তু ডেম’ক্ৰেটিক পাৰ্টিৰ ভিতৰৰ বহু প্ৰগতিশীল নেতাই ইয়াক বেলেগ দৃষ্টিভংগীৰে চাইছিল। তেওঁলোকে কয় যে অষ্ট্ৰেলিয়াৰ এজন নাগৰিকৰ বিৰুদ্ধে গোচৰ চলোৱাতো বাক স্বাধীনতাৰ উলংঘাৰ সমান হ’ব, যিটো সাংবাদিক হিচাপে আছাঞ্জেই লাভ কৰাৰ অধিকাৰ আছে।

জুলিয়ান আছাঞ্জে কোন?

ৱিকিলিকছৰ জৰিয়তে আমেৰিকাৰ নথি-পত্ৰ ৰাজহুৱা কৰি সমগ্ৰ বিশ্বতে বিখ্যাত হোৱা জুলিয়ান আছাঞ্জে এজন বিতৰ্কিত ব্যক্তিত্ব। সমগ্ৰ বিশ্বতে তেওঁৰ লাখ লাখ অনুৰাগী আছে আৰু বিশ্বৰ বহু দেশে তেওঁক এতিয়া তেওঁলোকৰ পথত বাধা হিচাপে গণ্য কৰে। জুলিয়ানৰ সহকৰ্মীসকলে তেওঁক কম্পিউটাৰ ক’ডিং মাষ্টাৰ বুলি কয় যিয়ে নিজৰ বুদ্ধিমত্তা আৰু নিষ্ঠাৰ দ্বাৰা এই পদ অৰ্জন কৰিছে।

আছাঞ্জেৰ সমালোচকসকলে কয় যে তেওঁ প্ৰচাৰৰ লোভী আৰু অনুৰাগীয়ে তেওঁক সত্যৰ সৈনিক বুলি গণ্য কৰে। ১৯৭১ চনত উত্তৰ অষ্ট্ৰেলিয়াত জন্মগ্ৰহণ কৰা আছাঞ্জেৰ পিতৃ-মাতৃ আছিল থিয়েটাৰৰ সৈতে জড়িত। সেয়েহে তেওঁৰ শৈশৱ বিভিন্ন ঠাইত বিভিন্ন পৰিৱেশত পাৰ হৈছিল। আনহাতে মাত্ৰ ১৮ বছৰ বয়সতে তেওঁ পিতৃ হোৱাৰ লগতে পত্নীৰ সৈতে বিচ্ছেদৰ পিছত সন্তানৰ আইনী তত্ত্বাৱধানৰ বাবে দীৰ্ঘদিনীয়া যুঁজত লিপ্ত হয়।

ইণ্টাৰনেটৰ বিকাশে তেওঁক গাণিতিক দক্ষতা পৰীক্ষা কৰিবলৈ অনুপ্ৰাণিত কৰিছিল। ১৯৯৬ চনত কম্পিউটাৰ হেক কৰিবলৈ চেষ্টা কৰি থকা অৱস্থাত ধৰা পৰিছিল যদিও তেওঁ কম্পিউটাৰৰ ক্ষেত্ৰত নিজৰ কাম আৰু গৱেষণা অব্যাহত ৰাখিছিল। ২০০৬ চনত আছাঞ্জেই ৱিকিলিকছ আৰম্ভ কৰিছিল যেতিয়া জুলিয়ানৰ লগত আন কিছুমান কম্পিউটাৰ ক’ডিং বিশেষজ্ঞই যোগদান কৰিছিল। তেওঁলোকৰ লক্ষ্য আছিল এনে এটা ৱেবছাইট তৈয়াৰ কৰা যিয়ে কম্পিউটাৰ হেক কৰি পোৱা সেই নথিপত্ৰসমূহ মুকলি কৰিব।

আইনী মেৰপেচত সোমাই পৰাৰ পূৰ্বে সংবাদ সংস্থা বিবিচিৰ সৈতে হোৱা এক বাৰ্তালাপত আছাঞ্জেই কৈছিল, “আমাৰ উৎসসমূহ সুৰক্ষিত ৰাখিবলৈ আমি বিভিন্ন দেশৰ সৈতে কাম কৰিবলগীয়া হৈছিল। আমি আমাৰ কাম-কাজ, তথ্যৰ লগতে আমাৰ টীমৰ সদস্যসকলকো বিভিন্ন ঠাইলৈ প্ৰেৰণ কৰিছিলো, যাতে আমি আইনগতভাৱে সুৰক্ষিত হৈ থাকিব পাৰো। এতিয়া আমি এই সকলোবোৰ কৰিবলৈ শিকিছো।’’

উল্লেখ্য যে, ২০১০ চনত ধৰ্ষণ আৰু মাৰ্কিন চোৰাংচোৱা তথ্য ৰাজহুৱা কৰাৰ অভিযোগ উত্থাপিত হোৱাৰ পিছতে সম্পূৰ্ণৰূপে সলনি হৈ পৰিছিল আছাঞ্জেৰ জীৱন।