বঙাইগাঁওঃ বঙাইগাঁও জিলাৰ কাকৈজানা অঞ্চলত অঞ্চলটোৰ সামাজিক উন্নয়নত দৃঢ়তাৰে কাম কৰি অহিছে "যুৱ সংস্কাৰ উন্নয়ন সমিতি,কাকৈজানা" নামৰ এটা বেচৰকাৰী সংস্থাই। বুধবাৰে সংস্থাটোৰ ২য় সংখ্যক প্ৰতিষ্ঠা দিৱস আৰু বাৰ্ষিক সভাখন কাকৈজানাৰ দেৱানপাৰাস্থিত চিলাৰায় শিশু নিকেতনত অনুষ্ঠিত হয়।
সমাজকৰ্মী লুৱন চন্দ্ৰ ৰায়ে গছপুলিৰোপণ কাৰ্যসূচীৰে আৰম্ভ কৰা অনুষ্ঠানৰ মুকলি সভাখনত সভাপতিত্ব কৰে কাকৈজানা অঞ্চলৰ প্ৰবীণ সাহিত্যিক,সমাজকৰ্মী অমৃতভূষণ ফৌজদাৰে। বন্তি প্ৰজ্বলন কৰে বয়োজ্যেষ্ঠ ব্যক্তি চণ্ডীচৰণ বৰ্মনে৷
অনুষ্ঠানটোত মুখ্য অতিথি ৰূপে উপস্থিত থাকি অসম সাহিত্য সভাৰ কেন্দ্ৰীয় কাৰ্যনিৰ্বাহক সদস্য কামাখ্যা প্ৰসাদ ৰায়ে সমাজ সংস্কাৰত যুৱ সমাজৰ ভূমিকা সম্পৰ্কত আলোকপাত কৰে। আন এগৰাকী বিশিষ্ট অতিথিৰূপে উপস্থিত থকা কাকৈজানা উচ্চ মাধ্যমিক বিদ্যালয়ৰ সহকাৰী শিক্ষক ভূপেন ৰায়ে অনুষ্ঠানৰ বিভিন্ন দিশ আৰু কিছু সমাজ কল্যাণমূলক কামৰ সম্পৰ্কে আলোচনা কৰে।
অনুষ্ঠানত সমিতিৰ সদস্যসকলেও অনাগত দিনত বিভিন্ন সমাজ গঠনমূলক কাম কৰিব বুলি দৃঢ়তাৰে মত পোষণ কৰে। এই অনুষ্ঠানতেই সংগঠনটোৰ সভাপতি নিপুঞ্জ বৰ্মনৰ পৰিচালনাত অঞ্চলটোৰ কেইগৰাকীমান কৃতী ছাত্ৰ-ছাত্ৰীক সম্বৰ্ধনা জনোৱা হয়। শেষত সম্পাদক ডিম্বু মেধিৰ শলাগৰ শৰাইৰে সভা ভংগ কৰা হয়।