কংগ্ৰেছলৈ আহিল কৃষক মুক্তিৰ কমল, প্ৰত্যাহ্বান জনাব পাৰিবনে বিজেপিৰ কমলক?

 | by NNO Digital Desk  |  0
Printer-friendly version

newsnextone.com | গুৱাহাটীঃ এসময়ৰ অখিল গগৈৰ বিশ্বস্ত সহযোগী, কবি, তাৰ্কিক কমল কুমাৰ মেধীয়ে যোগ দিলে কংগ্ৰেছত৷ প্ৰায়ে ৰাষ্ট্ৰীয় ৰাজনৈতিক দলৰ বিৰুদ্ধে সোচ্চাৰ হৈ থকা মেধিয়ে মঙলবাৰে প্ৰাক্তন মুখ্যমন্ত্ৰী তৰুণ গগৈ, প্ৰদেশ কংগ্ৰেছৰ সভাপতি ৰিপুণ বৰাৰ উপস্থিতিত কংগ্ৰেছৰ পতাকাৰ তললৈ আহে।

ৰাজ্যৰ একালৰ আগশাৰীৰ কবি, আম আদমী পাৰ্টিৰ প্ৰাক্তন নেতা কমল কুমাৰ মেধীয়ে সোমবাৰে কংগ্ৰেছ দলত যোগদান কৰাৰ ঘোষণা কৰাৰ পিছতে মঙলবাৰে তেওঁ ৰাজীৱ ভৱনলৈ আহি কংগ্ৰেছত আনুষ্ঠানিকভাৱে যোগদান কৰে৷ 

কমল মেধীয়ে অসমত কবি হিচাপে জনপ্ৰিয়তা লাভ কৰাৰ মাজতে কৃষক নেতা অখিল গগৈৰ সৈতে কৃষক আন্দোলনত জপিয়াই পৰে। কৃষক মুক্তি সংগ্ৰাম সমিতিত প্ৰায় ৭টা বছৰ ৰাজ্যৰ দৰিদ্ৰ, খাতিখোৱা কৃষকৰ বাবে সংগ্ৰাম কৰে।

কেইবাটাও বছৰ তেওঁ অসমৰ কৃষকসকলৰ হকে যুঁজ দিয়াৰ পিছত ২০১৬ চনত অখিল গগৈৰ সৈতে মতবিৰোধ ঘটাত তেওঁ কৃষক মুক্তি সংগ্ৰাম সমিতি ত্যাগ কৰে৷

অখিল গগৈৰ সৈতে জেললৈও যাব লগা হৈছিল কমলে।কৃষক মুক্তি সংগ্ৰাম সমিতিৰ পৰা হঠাৎ ওলাই আহি দিল্লীত উপস্থিত হৈ আপত যোগদান কৰে মেধিয়ে৷

ইয়াৰ পূৰ্বে তেওঁ অৰবিন্দ কেজিৰৱাল নেতৃত্বাধীন আম আদমী পাৰ্টীৰ অসম প্ৰদেশতো যোগদান কৰিছিল যদিও দলৰ নীতি বহিৰ্ভূত কাৰ্যকলাপত বিতুষ্ট হৈ তেওঁ সেয়াও ত্যাগ কৰিছিল৷ ২০১৬ চনত কৃষক মুক্তিৰ পৰা স্ব-অব্যাহতি লোৱাৰ পিছত তেওঁ এগৰাকী ৰাজনৈতিক সমালোচক হিচাপে বিভিন্ন সংবাদসমাধ্যমযোগে ভুমুকি মৰা পৰিলক্ষিত হৈছিল৷ 

আনফালে শাসকীয় চৰকাৰখনৰ ধৰ্মীয় গোড়ামী, সাম্প্ৰদায়িক বিষবাষ্প চটিওৱাৰ প্ৰয়াস, জাতিগত মেৰু বিভাজনৰ আগ্ৰাসী ৰূপ তথা দেশৰ শূন্য উন্নয়নৰ বিৰুদ্ধে তেওঁ মাত মাতি অহা পৰিলক্ষিত হৈছিল৷ শেহতীয়াকৈ ৰাজ্যখনক বিজেপিৰ আগ্ৰাসনৰ পৰা মুক্ত কৰি শান্তি, সম্প্ৰীতি অটুত ৰখাৰ স্বাৰ্থতে তেওঁ কংগ্ৰেছ দলত যোগ দিয়াৰ কথা ঘোষণা কৰে৷

মঙলবাৰে ৰাজীৱ ভৱনত অনুষ্ঠিত কংগ্ৰেছ যোগদান কাৰ্যসূচীত কৃষক মুক্তিৰ প্ৰাক্তন নেতাগৰাকীৰ লগতে প্ৰাক্তন মন্ত্ৰী ৰাজেন্দ্ৰ মোচাহাৰী, প্ৰাক্তন কলেজ শিক্ষক সন্থাৰ সভাপতি নৰেন চাংমাই আৰু বিটিএডিৰ চাৰিখন জিলাৰ কেইবাশতাধিক বিপিএফ আৰু ইউডিএফৰ নেতাই কংগ্ৰেছত যোগদান কৰে৷

ইফালে, ৰাজ্যখনত প্ৰায় নিশ্চিহ্ন হবলৈ ধৰা কংগ্ৰেছ দলত কমল কুমাৰ মেধীৰ দৰে এগৰাকীয়ে অভিজ্ঞতাসম্পন্ন নেতাৰ যোগদানে দলটোৰ স্থিতি সবল কৰিব বুলি অনুমান কৰা হৈছে৷ মঙলবাৰে কংগ্ৰেছৰ সভাপতি ৰাহুল গান্ধীৰ জন্মদিন পালন কৰে ৰাজীৱ ভৱনত। উক্ত কাৰ্যসূচীকে বিভিন্ন দলৰ পৰা নেকা-কৰ্মীয়ে কংগ্ৰেছত যোগদান কৰে।

প্ৰশ্ন হৈছে ৰাষ্ট্ৰীয় ৰাজনীতিলৈ অহা অমল কুমাৰ মেধি আৰু কংগ্ৰেছ দলে বিজেপিক প্ৰত্যাহ্বান জনাব পাৰিবনে?