কাৰ্বি আংলং স্বায়ত্ত্বশাসিত পৰিষদৰ পৰা অ-জনজাতিৰ নাম কৰ্তনৰ বিৰুদ্ধে ঐক্যবদ্ধ ১৫ অ-জনজাতীয় সংগঠন

newsnextone.com | কাৰ্বি আংলংঃ ১৯৫১ চনৰ ১৭ নৱেম্বৰ তাৰিখে সংযুক্ত উত্তৰ কাছাৰ আৰু মিকিৰ পাহাৰ (বৰ্তমানৰ কাৰ্বি আংলং) জিলা গঠন হোৱাৰ পূৰ্বৰ পৰাই যুগ যুগ ধৰি এই পাহাৰীয়া জিলাখনত বসবাস কৰি থকা অ-জনজাতীয় লোকসকলৰ ষষ্ঠ অনুসূচীৰ অন্তৰ্গত পৰিষদীয় ভোটাৰ তালিকাৰ পৰা নাম কৰ্তনৰ বাবে গ্ৰহণ কৰা ব্যৱস্থাই জিলাখনৰ পৰিস্থিতি ক্ৰমাৎ উত্তপ্ত হোৱাৰ দিশে অগ্ৰসৰ হৈছে৷ 

উল্লেখ্য যে, গুৱাহাটী উচ্চ ন্যায়ালয়ত বিগত বৰ্ষতে ৰতন টেৰণে দাখিল কৰা ৰাজহুৱা স্বাৰ্থ জড়িত এক আবেদনৰ ভিত্তিত পঞ্জীভুক্ত ৯/১৭ নম্বৰৰ গোচৰ সন্দৰ্ভত যোৱা ১৭ জুলাই তাৰিখে জাৰি কৰা এনে এক অন্তৱৰ্তী ৰায়ৰ ভিত্তিত কাৰ্বি আংলং স্বায়ত্ব শাসিত পৰিষদৰ নিৰ্বাচনৰ বাবে সুকীয়া নিৰ্বাচনবিধি প্ৰস্তুতিৰ বাবে প্ৰক্ৰিয়া আৰম্ভ হৈছে৷ উক্ত ৰায়দানৰ ভিত্তিত কাৰ্বি আংলং স্বায়ত্ত্ব শাসিত পৰিষদে পাবৰ্ত্য জিলাখনত বসবাস কৰা অ-জনজাতিৰ লোক সকলৰ নাম পৰিষদৰ ভোটাৰ তালিকাৰ পৰা কৰ্তন কৰাৰ প্ৰস্তাৱক লৈ জিলাখনত প্ৰায় দুমাহ ধৰি চলি আহিছিল এক চেপা উত্তেজনা।