ডিজিটেল ডেস্কঃ কাশ্মীৰৰ কাথুৱাৰ পৰা আৰম্ভ কৰি উত্তৰ প্ৰদেশৰ উন্নাওলৈ যি গণধৰ্ষণৰ কাণ্ড, সেই লৈ দেশত কি নাৰী, কি শিশু, সকলোৰে সুৰক্ষা আৰু নিৰাপত্তাক লৈ শংকাত ডুব যোৱা জনতাই ৰাজপথলৈ আহি গণতান্ত্ৰিক প্ৰতিবাদ সাব্যস্ত কৰিছে।
ছ’চিয়েল মিডিয়াৰ যোগেদি ৰাজনৈতিক দল-সংগঠন, বলিউড তাৰকা, সমাজকৰ্মীৰ পৰা সাধাৰণজনলৈকে সমস্বৰে বিচাৰিছে ন্যায় আৰু নিৰাপত্তা।
কাশ্মীৰৰ কাঠুৱাৰ পখিলা খেদা বয়সৰ শিশুগৰাকীৰ অপহৰণ, ধৰ্ষণ আৰু হত্যাৰ গোচৰ সংক্ৰান্তত জম্মু-কাশ্মীৰ আৰক্ষীৰ অপৰাধ শাখাই অভিযোগনামা দাখিল কৰাৰ পিছতে শিহৰণকাৰী তথ্য পোহৰলৈ অহাৰ সময়ত শিশুগৰাকীৰ মাতৃয়ে কৈছে- 'এনে ঘৃণনীয় অপৰাধ সংঘটিত কৰাসকলক ফাঁচীকাঠত ওলমাব লাগে’।
বাকাৰৱাল নামৰ এক যাযাবৰ সম্প্ৰদায়ৰ ৩৫ বৰ্ষীয় মহিলাগৰাকীয়ে তেওঁৰ সন্তানৰ মৃত্যুৰ এদিন পূৰ্বে সপোনত দেখিছিল সন্তানটোক। পিছদিনা পুৱা দেখিছিল সমীপৰে ৰাসানা হাবিত তাইৰ নিঠৰ দেহ। 'মই ভাবো তাই ন্যায়ৰ বাবে অপেক্ষা কৰি আছে। নীৰৱে।’- মাতৃগৰাকীৰ মন্তব্য।