পলিমা চেতিয়া বসুমতাৰী, কাজিৰঙাঃ অব্যাহত আছে কাজিৰঙাত বানৰ কালৰূপ৷ পূৰ্বতকৈ অধিক হাৰত বৃদ্ধি পাইছে পানীৰ স্তৰ৷ ৩৭ নং ৰাষ্ট্ৰীয় ঘাইপথৰ ওপৰেদি বাগৰিছে একঁকাল পানী৷ কাজিৰঙা ৰাষ্ট্ৰীয় উদ্যানৰ মাজেৰে অহা ৩৭ নং ৰাষ্ট্ৰীয় ঘাইপথটো বহু ঠাইত জলমগ্ন হোৱাৰ প্ৰতি লক্ষ্য ৰাখি সকলোধৰণৰ বাহনৰ চলাচল সম্পূৰ্ণভাৱে বন্ধ ৰখা হৈছে৷
জখলাবন্ধা আৰু বোকাখাতত গাড়ী সমূহ ৰখাবলৈ নিৰ্দেশনা জাৰী কৰা হৈছে বুলি জনাইছে বোকাখাত মহকুমাৰ মহকুমাধিপতি বিবেক শ্যামে৷ মাজলাইন, হালধিবাৰীৰ একাধিক স্থানত হোৱা বানৰ পানীয়ে সম্পূৰ্ণভাৱে বুৰাই পেলাইছে ৰাষ্ট্ৰীয় ঘাইপথ৷ কাজিৰঙাৰ বানৰ কালৰূপত সম্প্ৰতি ত্ৰস্তমান হৈ পৰিছে কাজিৰঙাবাসী৷ বৰবিল, ভূঞাগাঁও, ৰঙাজান, হাতীখুলি, লুখুৰাখনীয়া, দ-গাঁও, বেজগাঁও, শ’লমৰা, আদিকে ধৰি কাজিৰঙাৰ বহু অঞ্চল প্লাবিত হৈ পৰাৰ ফলত গৃহহাৰা হ’বলগীয়া হৈছে এই অঞ্চলৰ ৰাইজ৷ এই অঞ্চলসমুহৰ ৰাইজে সম্প্ৰতি অন্ন-বস্ত্ৰ আৰু অকনমান আশ্ৰয়ৰ বাবে হাহাকাৰ কৰিবলগীয়া অৱস্থাৰো সৃষ্টি হৈছে৷
উদ্যানখনৰ বন্যপ্ৰাণীৰ হাঁহাকাৰ এতিয়া কাজিৰঙাৰ চাৰিওদিশে৷ ভয়াৱহ বানৰ সংহাৰত পৰা কাজিৰঙা ৰাষ্ট্ৰীয় উদ্যানৰ হাতী, পহু, গঁড়কে ধৰি বহু বন্যপ্ৰাণীয়ে আশ্ৰয় আৰু খাদ্যৰ সন্ধানত গতি কৰিছে কাৰ্বি পাহাৰৰ দিশে৷ কাজিৰঙাৰ ৩৭ নং ৰাষ্ট্ৰীয় পথ অতিক্ৰম কৰি কাৰ্বি পাহাৰলৈ গতিকৰা বন্যপ্ৰাণীৰ নিৰাপত্তাৰ বাবে বন আৰু আৰক্ষী বিভাগ তথা প্ৰশাসনে যথেষ্ট সতৰ্কতা অৱলম্বন কৰিবলগীয়া হৈছে৷ বিশেষকৈ কৰিড’ৰ সমূহত জীৱ জন্ত সমূহ নিৰাপদে পাৰ কৰাৰ ক্ষেত্ৰত৷
ৰাষ্ট্ৰীয় উদ্যানৰ ৯৫ শতাংশতকৈ অধিক অংশ বানৰ কবলত পৰিছে বুলি সংবাদ মাধ্যমক জনাই কাজিৰঙা ৰাষ্ট্ৰীয় উদ্যানৰ সঞ্চালক শিৱকুমাৰ পেৰীয়াই৷ ইতিমধ্যে ৬ টা পশুৰ দ্ৰুত গতিৰ যানবাহনৰ খুন্দাত নিহত হোৱাৰ বাতৰি পোৱাৰ লগতে পৰৱৰ্তী সময়তহে আৰু কিমান ক্ষয়-ক্ষতি হৈছে তাৰ সঠিকভাৱে তথ্য পোৱা যাব৷
অসম ৰাজ্যিক ৱাইল্ড লাইফ বৰ্ডৰ সদস্য তথা খুমটাই সমষ্টিৰ বিজেপিৰ বিধায়ক মৃণাল শইকীয়াই সোমবাৰে নাঁৱৰে কাজিৰঙাৰ বানাক্ৰান্ত অঞ্চলৰসমুহৰ লগতে কাজিৰঙা ৰাষ্ট্ৰীয় উদ্যানখন তথা উদ্যানখনৰ হাইলেণ্ড সমূহ পৰিদৰ্শন কৰে ৷
উল্লেখযোগ্য যে, বিগত বৰ্ষত ৩৩ টাকৈ নিৰ্মাণ কৰা হাইলেণ্ডসমূহ সাম্প্ৰতিক সময়ত কাজিৰঙাৰ ৰাষ্ট্ৰীয় উদ্যানৰ বন্যপ্ৰাণীৰ বাবে আশীৰ্বাদ স্বৰূপ হৈ পৰিছে৷ এই হাইলেণ্ডসমূহ নিৰ্মাণকাৰ্য যথেষ্ট ফলপ্ৰসূ হৈছে বুলি সাংবাদিক সকলৰ বৰ্তমানৰ চৰজমিন তদন্তত প্ৰমাণিত হোৱা দেখা গৈছে৷ এই বৰ্ষৰ প্ৰথমটো বানত বিগত বৰ্ষসমূহৰ দৰে কাজিৰঙা ৰাষ্ট্ৰীয় উদ্যানৰ বন্যপ্ৰাণীৰ আশ্ৰয়ৰ বাবে হাহাকাৰৰ সংখ্যা যথেষ্ট কম হোৱা পৰিলক্ষিত হৈছে৷
বিগত বৰ্ষসমূহত বিশ্ব খ্যাত এশিঙিয়া গঁড়ৰ কাজিৰঙা ৰাষ্ট্ৰীয় উদ্যানৰপৰা ৩৭ নং ৰাষ্ট্ৰীয় ঘাইপথ অতিক্ৰম কৰি কাৰ্বি পাহাৰলৈ আশ্ৰয়ৰ বাবে ঢাপলি মেলাৰ সংখ্যা যি হাৰত আছিল তাৰ অনুপাতে এই বৰ্ষত একেবাৰেই নগণ্য বুলিব পাৰি৷ সাংবাদিক সকলে মটৰবোটেৰে ৰাষ্ট্ৰীয় উদ্যানৰ ভিতৰভাগ পৰিদৰ্শনৰ সময়চোৱাত এটা হাইলেণ্ডৰ ওপৰত প্ৰায় ২০-২৫টাকৈ মতা গঁড়ৰ লগতে মাক-পোৱালি থকা গঁড়ও প্ৰত্যক্ষ কৰে৷ বিগত বৰ্ষবোৰৰ দৰে এইবৰ্ষত বানত গঁড় পোৱালি উটি অহাৰ দৰে ঘটনাৰ সংখ্যা তেনেই তাকৰ৷