পলিমা চেতিয়া বসুমতাৰী, কাজিৰঙাঃ বোকাখাতৰ অন্যতম প্ৰকাশন গোষ্ঠী ‘অভিলাষ প্ৰকাশন’ৰ উদ্যোগত আৰু ‘আছাম ফাইন আৰ্টছ একাডেমি’ৰ সহযোগত গোলাঘাট জিলা ভিত্তিৰ ‘ৰঙৰ পৃথিৱী’ চিত্ৰাংকন প্ৰতিযোগিতাখন অলপতে অনুষ্ঠিত হৈ যায়৷
অভিলাষ বৰা (বু)ৰ ২৫ সংখ্যক জন্মদিন উপলক্ষে আয়োজন কৰা এই চিত্ৰাংকন প্ৰতিযোগিতাত মুঠ চাৰিটা শাখাত প্ৰায় ১২শ প্ৰতিযোগীয়ে অংশগ্ৰহণ কৰে৷ সত্য নাৰায়ণ সেৱা সদন বোকাখাতত অনুষ্ঠিত উক্ত প্ৰতিযোগিতাৰ আদৰণি ভাষণ আগবঢ়ায় অভিলাষ প্ৰকাশনৰ স্বত্বাধিকাৰী তথা বোকাখাত জেডিএছজি মহাবিদ্যালয়ৰ অসমীয়া বিভাগৰ অধ্যাপিকা ৰুবী বৰাই৷
বন্তি প্ৰজ্বলন কৰে অভিলাষ বৰাৰ আইতাক মাকণ বৰা, বোকাখাতৰ মহকুমাধিপতি বিবেক শ্যামে৷ জেডিএছজি মহাবিদ্যালয়ৰ অধ্যাপক ড° অৰুণ বৰা, বিশিষ্ট চিত্ৰ ভাস্কৰ্য শিল্পী শিৱপ্ৰসাদ মাৰাৰ আৰু হাতীখুলি চাহ বাগিচাৰ ড° বিমল কুমাৰ শৰ্মাই৷
উক্ত প্ৰতিযোগিতাখন শুভ উদ্বোধন কৰে মহকুমাধিপতি বিবেক শ্যামে৷ বিশিষ্ট অতিথি হিচাপে উপস্থিত থাকি বিশিষ্ট চিত্ৰ ভাস্কৰ্য শিল্পী শিৱপ্ৰসাদ মাৰাৰে কণ কণ শিশুসকলৰ প্ৰতিভা বিকাশত অগ্ৰণী ভূমিকা পালন কৰা অভিলাষ প্ৰকাশনৰ স্বত্বাধিকাৰী ড° ৰুবী বৰাৰ এই প্ৰচেষ্টাক ভূয়সী প্ৰশংসা কৰে৷
ড° ৰুবী বৰাই অনুষ্ঠিত হোৱা উক্ত অনুষ্ঠানত যোৱা তিনিটা বছৰৰ এই এই প্ৰতিযোগিতাৰ বিজয়ীসকলৰ এটা এলবাম প্ৰকাশ কৰাৰ কথা ঘোষণা কৰে। চাৰিটা শাখাৰ প্ৰতিযোগিতাসমূহৰ ফলাফল আৰু লগতে পুৰস্কাৰসমূহ অহা ২৬ জুনত একে স্থানতে প্ৰদান কৰা হ’ব বুলি জানিবলৈ দিয়ে ড° ৰুবী বৰাই৷
উক্ত অনুষ্ঠানত যোৰহাটৰ ডা° নিত্যানন্দ শইকীয়া, অসম ফাইন আৰ্ট একাডেমিৰ দিবাকৰ শৰ্মা, অধ্যক্ষ বিজয় তাঁতী, নন্দেশ্বৰ কুটুম, পদুমী গাজলু আদিকে ধৰি বহু সংখ্যক লোক উপস্থিত থাকে৷ অনুষ্ঠানটিৰ আঁত ধৰে ৰূপজ্যোতি ভৰালীয়ে৷
'ক’ শাখাৰ প্ৰথম, দ্বিতীয় আৰু তৃতীয় শ্ৰেষ্ঠ প্ৰতিযোগীলৈ পুৰস্কাৰৰ লগতে দহ গৰাকীলৈ বিশেষ পুৰস্কাৰ, 'খ’ শাখাত প্ৰথম, দ্বিতীয় আৰু তৃতীয় শ্ৰেষ্ঠ প্ৰতিযোগিলৈ পুৰস্কাৰৰ লগতে পাঁচ গৰাকীলৈ বিশেষ পুৰস্কাৰ আগবঢ়োৱা হয়৷ 'গ’ শাখাত তিনি হাজাৰ, দুই হাজাৰ আৰু এহেজাৰ টকাৰ পুৰস্কাৰৰ লগতে 'ঘ’ শাখাত পাঁচ, তিনি আৰু দুই হাজাৰ টকাৰ পুৰস্কাৰ ধাৰ্য কৰা হৈছে বুলি জানিবলৈ দিয়ে ৷ প্ৰতিযোগী সকলে এই এই প্ৰতিযোগিতাৰ সম্পৰ্কে অধিক জানিবলৈ ৯৪৩৫১-৫৪২৩৯, ৭৮৯৬৬-২২৯৫০ত যোগাযোগ কৰিব পাৰিব৷