কাজিৰঙাঃ আজি পুৱাৰে পৰা খেতিৰ পদ্ধতি শিকিবলৈ যোৱা যুৱক-যুৱতীৰে উখল মাখল হৈ পৰিছে কাজিৰঙা৷ কোনোৱে ভূঁই ৰুইছে, আন কোনোৱে কোৰ লৈ আলি দিছে৷ কোনোৱে থলুৱা চাহ জলপানেৰে যুৱক-যুৱতী সকলক আপ্যায়ন কৰিছে৷
খেতি বিনে অসহায় অসমীয়া জাতি বুলি কোৱা কথাষাৰক সত্য প্ৰমাণিত কৰি কৃষক মুক্তি সংগ্ৰাম সমিতিৰ উদ্যোগত কাজিৰঙাত তিনিদিনীয়া কাৰ্যসূচীৰে আৰম্ভ হোৱা ‘ন ভূঁই উৎসৱ’ত ৰাজ্যখনৰ ভিন্ন প্ৰন্তৰ যুৱক-যুৱতীয়ে অংশগ্ৰহণ কৰা দেখা গৈছে।
কৃষক মুক্তি সংগ্ৰাম সমিতিয়ে স্থাপন কৰা কাজিৰঙা জাতীয় অৰ্কিড আৰু জৈৱ বৈচিত্ৰ উদ্যানত সংৰক্ষণ কৰা ২৫০ বিধ থলুৱা আৰু পুৰণি ধানৰ সৈতে নতুন প্ৰজন্মক পৰিচয় কৰাই দিয়া, কৃষি কৰ্মত ব্যৱহৃত সামগ্ৰী আৰু খেতি কৰাৰ পদ্ধতিৰ সৈতে পৰিচয় কৰাই দিয়াৰ উদ্দেশ্যে ‘ন ভূঁই উৎসৱ’ অনুষ্ঠিত কৰিছে সংগঠনটোৱে৷
উৎসৱত কৃষি পদ্ধতিৰ বিষয়ে প্ৰশিক্ষণ দিয়াৰ লগতে খেতিক জনমুখী কৰাৰ বাবে এই উৎসৱ আয়োজন কৰা হৈছে বুলি কৃষক নেতা অখিল গগৈয়ে উল্লেখ কৰে। পুৱা ৬.০০ বজাৰ পৰা এই উৎসৱ আৰম্ভ হৈছে।
ন ভূঁই উৎসৱত অংশ গ্ৰহণ কৰা লোকসকলক থলুৱা অসমীয়া খাদ্যৰে আপ্যায়ন কৰাৰ উপৰিও অসমৰ অভিজ্ঞ কৃষকসকলৰ লগতে অখিল গগৈ উপস্থিত থাকি ধান খেতিৰ ব্যৱহাৰিক পদ্ধতিৰ বিষয়ে আলোচনা কৰে।