newsnextone.com | নগাঁওঃ অসমৰ একাংশ জাতীয় সংগঠন নিমাত হৈ থকাত অসমৰ হাজাৰ হাজাৰ লোকে ফেচবুকৰ জৰিয়তে ৰহাত বহুওৱা টোলগে’টৰ বিৰুদ্ধে মত পোষণ কৰিছিল। কৃষক মুক্তি সংগ্ৰাম সমিতি আৰু কৃষক নেতা অখিল গগৈয়ে কেন্দ্ৰ-ৰাজ্য চৰকাৰক আৰু জাতীয় দল-সংগঠনক তীব্ৰ আক্ৰমণ কৰিছিল টোলগে'টৰ বিৰুদ্ধে মাত নিদিয়াত৷ নিত্য ব্যৱহাৰ্য সামগ্ৰীৰ মূল্য বৃদ্ধি হোৱাৰ লগতে জিএছটিৰ জৰিয়তে দেশৰ নাগৰিকক মাধমাৰ শোধোৱাৰ সময়তে টোলগে’ট বহুওৱা কাণ্ডই সকলোকে ক্ষোভিত কৰিছিল।মুম্বাইৰ ইণ্ডাৰদ্বীপ কনষ্ট্ৰাকচনে যোৱা ১২ জুলাইৰ পুৱাৰে পৰা কৰ লবলৈ আৰম্ভ কৰিছে ৰ’হাৰ টোলগে’টত৷
যোৱা ১৫ জুলাইত কৃষক মুক্তি সংগ্ৰাম সমিতিৰ মুখ্য উপদেষ্টা অখিল গগৈয়ে কৃষক মুক্তিৰ গান্ধী বস্তীৰ কাৰ্যালয়ত এখন সংবাদ মেল অনুষ্ঠিত কৰি ৰাজ্য চৰকাৰৰ লগতে অসমৰ জাতীয়-জনগোষ্ঠীয় সংগঠনক তীব্ৰ সমালোচনা কৰে৷ অখিলে কয় যে আমি যেতিয়া যোৱা তিনি বছৰে ৪ খন টোলগে’ট বন্ধ কৰি দিছিলোঁ তেতিয়া আমাক কোনে ক্ৰেডিত দিয়া নাছিল৷ আমাক কোনেও ধন্যবাদোঁ জনোৱা নাছিল বুলি কৈ প্ৰতিবাদ কৰাৰ বাবে ২২ জুলাইৰ দিন ঘোষণা কৰিছিল। কৃষক মুক্তি সংগ্ৰাম সমিতি, অসম জাতীয়তাবাদী যুৱ-ছাত্ৰ পৰিষদ, কোচ ৰাজবংশী ছাত্ৰ সন্থা, অসমীয়া যুৱ মঞ্চ আদিকে ধৰি অখিল গগৈৰ নেতৃত্বত ২৯টা সংগঠনে উত্তাল প্ৰতিবাদ সাব্যস্ত কৰে। ফলত ব্যাহত হৈ পৰিছিল যান-বাহনৰ চলাচল। পূৰ্বে ঘোষণা কৰা কাৰ্যসূচী অনুসৰি দেওবাৰে ৰহাত উত্তাল প্ৰতিবাদ সাব্যস্ত কৰে সংগঠন কেইটাই।
উল্লেখ্য যে, পুৱাই বিভিন্ন ঠাইত প্ৰতিবাদকাৰীক আবদ্ধ কৰাৰ লগতে আৰক্ষী প্ৰশাসনে প্ৰতিবাদত বাধা দিবলৈ সম্পৰ্ণ চেষ্টা কৰে যদিও বিফল হয় প্ৰশাসন। ইপিনে কৃষক নেতা অখিল গগৈয়ে কোনো লোকক শিলগুটি নামৰিবলৈ আৰু কোনো লোকে শিল দলিয়ালে ধৰি আৰক্ষীক গতাই দিবলৈ আহ্বান জনায় প্ৰতিবাদকাৰীক। আনহাতে প্ৰশাসনেহে প্ৰতিবাদকাৰীৰ মাজত সোমাই শিলগুটি নিক্ষেপ কৰিব পাৰে অভিযোগ উত্থাপন কৰে অখিলে। পুৱাৰে পৰা নগাঁও প্ৰশাসনে ৰহাত ১৪৪ ধাৰা জাৰি কৰি আৰক্ষীৰ সমৰসজ্জা গঢ়ি তোলা দেখা যায়।
কৃষক মুক্তি সংগ্ৰাম সমিতি, অসম জাতীয়তাবাদী যুৱ-ছাত্ৰ পৰিষদৰ আহ্বান মৰ্মে দেওবাৰে উজনি-নামনিৰ পৰা বিভিন্ন বাহন যোগে নগাঁৱৰ ৰহালৈ আহে কেইবা হাজাৰ লোক। 'ৰহাৰ টোলগে'টলৈ যাও ব'লক' শীৰ্ষক কাৰ্যসূচীৰে টোলগে'ট বন্ধ কৰাৰ দাবীত ৰাজপথলৈ ওলাই আহিল হাজাৰ হাজাৰ লোক। পুৱাৰে পৰা ৰহাত আহি উপস্থিত হোৱা লোকসকলে চৰকাৰৰ বিৰুদ্ধে শ্ল'গান দিবলৈ আৰম্ভ কৰে। ৰহাৰ পৰা ২ কিঃ মিঃ নিলগৰ টোলগে'টলৈ ৰহাৰ পৰা সমদল কৰি অহাৰ সময়তে আদবাটতে আৰক্ষীৰ বাধা প্ৰদান কৰে। আৰক্ষীৰ বাধা নেওচি টোলগে'ট অভিমুখে আগবঢ়াৰ সময়তে প্ৰশাসনেৰ সৈতে যুক্তি যুদ্ধ লাগে অখিল গগৈৰ। প্ৰশাসনে অনুমতি নিদিয়াকৈ প্ৰতিবাদ কৰাৰ বাবে ১৪৪ ধাৰা ভংগ কাৰৰ অভিযোগ উত্থাপন কৰে।
তেতিয়া অসম জাতীয়তাবাদী যুৱ-ছাত্ৰপৰিষদৰ পেডত উপায়ুক্তৰ পৰা লোৱা অনুমতিৰ কথা প্ৰকাশ কৰাত অখিলৰ কথা মানি লবলৈ সাজু হোৱা নাছিল যদিও পেডৰ কপি দিয়াতহে ক্ষান্ত হয় প্ৰশাসনে। তাৰ লগে লগে অখিলে প্ৰতিবাদী কাৰ্যসূচীত বাধা দিবলৈ উপস্থিত থকা নগাঁৱৰ অতিৰিক্ত উপায়ুক্তক টোলগে'ট সন্দৰ্ভত কেইবাটাও প্ৰশ্ন সোধে যদিও উত্তৰ দিব নোৱাৰিলে অতিৰিক্ত উপায়ুক্তই। তাৰ পিছতে অখিলে ভাৰতৰ চৰকাৰৰ টোলগে'ট বহুওৱা নীতি সন্দৰ্ভত নগাঁও জিলা প্ৰশাসনক পাঠ পঢ়ায়।
ৰহাৰ টোলগেট বন্ধ কৰাৰ দাবীত কৃষক মুক্তি সংগ্ৰাম সমিতি আৰু অসম জাতীয়তাবাদী যুৱ-ছাত্ৰ পৰিষদৰ হাজাৰ হাজাৰ প্ৰতিবাদকাৰী ৰাজপথলৈ ওলাই অহাৰ পিছতে স্থানীয়ে নগাঁও জিলাৰ ৰহাত ১৪৪ ধাৰা জাৰি কৰিছে প্ৰশাসনে ৷ প্ৰতিবাদী কাৰ্যসূচীৰ পৰিপ্ৰেক্ষিততে কোনো অপ্ৰীতিকৰ পৰিস্থিতি নহবৰ বাবেই জিলা প্ৰশাসন এনে পদক্ষেপ লোৱা বুলি জানিব পৰা যায়।
টোলগেটস্থলীত আৰক্ষীয়ে সমৰসজ্জা গঢ়ি তোলা পৰিলক্ষিত হয় ৷ অৰ্ধ সামৰিক বাহিনীৰ সহযোগত প্ৰতিবাদকাৰীক ভেটিবৰ বাবে আৰক্ষীৰ যুদ্ধকালীন তৎপৰতা দেখা যায় পুৱাৰে পৰা ৷ যান-বাহনৰ চলাচল কৰাৰ পথ সলনি কৰা হয়। এম্বুলেন্স, অগ্নিনিৰ্বাপক বাহিনীৰ গাড়ী সাজু কৰি ৰাখিছে প্ৰশাসনে ৷ সাময়িকভাবে দেওবাৰে বন্ধ ৰখা হয় টোলগে'টত কৰ সংগ্ৰহ কাৰ্য ৷
ৰাজ্যৰ বিভিন্ন প্ৰান্তৰ পৰা অহা প্ৰতিবাদকাৰীক কাজিৰঙাৰ বাগৰি, কামপুৰ, উৰিয়াগাঁও, বৰঘাট আৰু মৰিগাঁৱৰ থেকেৰাগেটত বাধা প্ৰদান কৰে নগাঁও জিলা প্ৰশাসনে। ৰহালৈ অহা নগাঁৱৰ সকলো পথতে আৰক্ষী মোতায়েন কৰে ৷
প্ৰতিবাদী কাৰ্য্যসূচীলৈ অহা যুৱ-ছাত্ৰ পৰিষদ আৰু কৃষক মুক্তিৰ নেতা-কৰ্মীক আৰক্ষীৰ বাধা প্ৰদান কৰা বুলি কৈ অসম জাতীয়তাবাদী যুৱ-ছাত্ৰ পৰিষদৰ নেতা পলাশ চাংমায়ে তীব্ৰ ভাষাৰে গৰিহণা দিয়ে। বহু নেতা-কৰ্মীক নিৰ্যাতন আৰু গ্ৰেপ্তাৰ কৰা বুলি তীব্ৰ প্ৰতিক্ৰিয়া প্ৰকাশ কৰি যুৱ-ছাত্ৰ পৰিষদৰ কেন্দ্ৰীয় সাধাৰণ সম্পাদক পলাশ চাংমায়ে চৰকাৰক ফেচিবাদী আৰু গণতন্ত্ৰৰ হত্যাকাৰী আখ্যা দিয়ে।
প্ৰয়া ৫ ঘণ্টা প্ৰতিবাদ কৰাৰ অন্তত নগাঁও প্ৰশাসনে ৰাষ্ট্ৰীয় ঘাইপথ প্ৰাধিকৰণৰ সৈতে কথা পাতে। নগাঁও প্ৰশাসনে ৰাষ্ট্ৰীয় ঘাইপথ প্ৰাধিকৰণৰ সৈতে কথা পাতি এটি সিদ্ধান্তৰ বিষয়ে অৱগক কৰে প্ৰতিবাদকাৰীক। ৰাষ্ট্ৰীয় ঘাইপথ প্ৰাধিকৰণে ২৪ ঘণ্টাৰ বাবে ৰহা টোলগে’ট বন্ধ থাকিব বুলি ঘোষণা কৰে। ৰাইজে প্ৰবল প্ৰতিবাদ সাব্যস্ত কৰাত স্থানীয়ে প্ৰশাসন আৰু ৰাষ্ট্ৰীয় ঘাইপথ প্ৰাধিকৰণে এই ঘোষণা কৰে। আনহাতে ৰাষ্ট্ৰীয় ঘাইপথ প্ৰাধিকৰণে নগাঁও জিলাৰ প্ৰশাসনৰ উপস্থিতিত অখিল গগৈৰ সৈতে মিলিত হোৱাৰ কথা ঘোষণা কৰে সোমবাৰে।