কাজিৰঙাঃ কৃষক মুক্তি সংগ্ৰাম সমিতিৰ উদ্যোগত কাজিৰঙাত ৭ জুলাইৰ পৰা তিনিদিনীয়াকৈ অনুষ্ঠিত হ’ব ‘ন’ ভূঁই উৎসৱ’।

কৃষক মুক্তি সংগ্ৰাম সমিতিয়ে স্থাপন কৰা কাজিৰঙা জাতীয় অৰ্কিড আৰু জৈৱ বৈচিত্ৰ উদ্যানত সংৰক্ষণ কৰা ২৫০ বিধ থলুৱা আৰু পূৰণি ধানৰ সৈতে নতুন প্ৰজন্মক চিনাকি কৰাই কৃষি কৰ্মত ব্যৱহৃত সামগ্ৰী আৰু খেতি কৰাৰ পদ্ধতিৰ সৈতে পৰিচয় কৰাই দিবৰ বাবে এই পদক্ষেপ গ্ৰহণ কৰিছে সংগঠনটোৱে।

কৃষি পদ্ধতিৰ সৈতে নৱ প্ৰজন্মক পৰিচয় কৰাৰ লগতে খেতিক জনমুখী কৰাৰ বাবে এই উৎসৱ আয়োজন কৰা হৈছে। নিতৌ পুৱা ৬ বজাৰ পৰা এই উৎসৱ আৰম্ভ হ'ব।  উৎসৱত অংশগ্ৰহণ কৰিব বিচাৰে তেওঁলোকক পথাৰৰ সাজ পোছাক লৈ আহিব লাগিব বুলি সংগঠনটোৱে জানিবলৈ দিছে। উৎসৱত যোগদানৰ মাচুল ৫০০ টকা ধার্য্য কৰা হৈছে।

এই মাচুলৰ বিনিময়ত পুৱা চাহ-পিঠা, দুপৰীয়া থলুৱা অসমীয়া খাদ্য যোগান ধৰা হ'ব। কোনো পৰ্যটকে সেই দিনকেইটাত কাজিৰঙাত থাকিবলৈ ইচ্ছা কৰিলে ৰেহাই মূল্যত কাজিৰঙাৰ হোটেলসমূহত থাকিবলৈ অৰ্কিড উদ্যানৰ তৰফৰ পৰা ব্যৱস্থা কৰি দিয়া হ'ব বুলিও জনায় সংগঠনটোৱে।

উক্ত তিনিও দিনা অসমৰ অভিজ্ঞ কৃষকসকলৰ লগতে অখিল গগৈ উপস্থিত থাকিব আৰু ধান খেতিৰ বিষয়ে ব্যৱহাৰিক বিষয়ৰ ওপৰত আলোচনা কৰা হ’ব। এই উৎসৱত অংশগ্ৰহণ কৰিব বিচৰা ইচ্ছুক পৰ্যটকসকলক admin@kmss.in, saikiabhasco@gmail.com, secretarykmss@gmail.com নতুবা 9435499733, 9854056833, 9678413409, 9859503149 মোবাইল নম্বৰত যোগাযোগ কৰিবলৈ অনুৰোধ জনাইছে কৃষক মুক্তি সংগ্ৰাম সমিতিয়ে।