কোকৰাঝাৰঃ  বি টি এ ডি বিধান পৰিষদীয় ভৱনত মঙলবাৰৰেপৰা দুদিনীয়া কাৰ্যসূচীৰে আৰম্ভ হোৱা বি টি এ ডিৰ বাজেট অধিৱেশনৰ বুধবাৰে সামৰণি পৰে৷

উল্লেখ্য যে বি টি চিৰ বিত্ত বিভাগৰো দায়িত্বত থকা মুখ্য কাৰ্যবাহী হাগ্ৰামা মহিলাৰীয়ে দাখিল কৰা ২০১৯-২০ বিত্তীয় বৰ্ষৰ ৪৬৬৭.৭৬২ কোটি টকাৰ বাজেটখন বুধবাৰে সদনৰ সৰ্বসন্মতিমৰ্মে গৃহীত হয়৷

অৱশ্যে বাজেট গৃহীতকৰণৰ পূৰ্বে বিৰোধীৰ দলপতি ৰণগৌৰা নাৰ্জাৰীয়ে বি টি এ ডিৰ ৮০ শতাংশ লোক কৃষিৰ ওপৰত নিৰ্ভৰশীল হোৱা বুলি উল্লেখ কৰি বাজেটত কৃষি আৰু জলসিঞ্চন বিভাগক অধিক পুঁজি দিয়াৰ পৰামৰ্শ আগবঢ়ায়৷ তেওঁ বি টি চিৰ বাজেটখন ৰেডিমেড তৈয়াৰ নকৰি পলিচীৰ আধাৰত বাজেট গ্ৰহণ কৰাৰ আহ্বান জনায়৷

পৰিষদীয় সদস্য নাৰ্জাৰীয়ে লগতে কয় যে বি টি এ ডিত যিহেতু ৰাজহ সংগ্ৰহৰ বহু উৎস আছে তেনে ক্ষেত্ৰত বি টি চিৰ শাসকীয় নেতাসকলে ৰাজহ সংগ্ৰহৰ দিশত সদিচ্ছাৰ অভাৱ হোৱা বুলি আন এক গুৰুতৰ অভিযোগ তোলে৷ 

একেদৰে, বিৰোধী দলৰ পৰিষদীয় সদস্য জিৰণ বসুমতাৰী আৰু মাউথি ব্ৰহ্ম হাজোৱাৰীও বি টি এ ডিৰ জনতাৰ স্বাৰ্থত শিক্ষা, কৃষি, জলসম্পদ, ভৈয়াম জনজাতি আৰু পিছপৰা উন্নয়ন বিভাগৰ লগতে পঞ্চায়ত আৰু গ্ৰামোন্নয়ন বিভাগক বাজেটত অধিক পুঁজি আৱন্টন দিবলৈ বি টি চি কৰ্তৃপক্ষক পৰামৰ্শ আগবঢ়ায়৷ 

আনহাতে বি টি চিৰ মুখ্য কাৰ্যবাহী সদস্য তথা বিত্ত বিভাগৰ দায়িত্বত থকা হাগ্ৰামা মহিলাৰীয়ে বাজেট প্ৰসংগ দাঙি ধৰি কয় যে অসম চৰকাৰে বি টি চিৰ জনসংখ্যা অনুপাতে পুঁজি মোকলাই নিদিয়াক লৈ বি টি চিৰ বাজেট প্ৰস্তুতত বেমেজালিৰ সৃষ্টি হয়৷ 

মহিলাৰীয়ে বি টি চিয়ে বাজেট তৈয়াৰ কৰা নিজস্ব ক্ষমতা পাইছে যদিও বাজেটৰ পুঁজি ধাৰ্য কৰাক লৈ বিপাঙত পৰাটো একপ্ৰকাৰ নিসন্দেহে স্বীকাৰ কৰিবলৈ বাধ্য হয়৷ বি টি চিৰ বাজেট অধিৱেশনৰ সামৰণিৰ দিনা সদনত বি টি চিৰ উপমুখ্য কাৰ্যবাহী সদস্য খাম্ফা বৰগয়াৰী আৰু শাসকীয় দলৰ কাৰ্যবাহী সদস্যসকলৰ লগতে প্ৰায়ভাগ পৰিষদীয় সদস্য উপস্থিত থাকে৷