কলকাতাঃ দীপাৱলীৰ কেইদিনমান আগৰেপৰা কলকাতাৰ আকাশত ধৰা পৰিছে কেতবোৰ অচিনাক্ত ৰেডিঅ’ ছিগনেল। অপেচাগত 'হাম ৰেডিঅ’ অপাৰেটৰ’ৰ বেতাঁৰ যন্ত্ৰত প্ৰথমে ধৰা পৰা এই ৰহস্যজনক সংকেতৰ ওপৰত নিৰাপত্তাসংস্থাসমূহে দিনে-ৰাতিয়ে তীক্ষ্ন নজৰ দি আছে।
পশ্চিম বংগৰ উত্তৰ ২৪ পৰগনা জিলাৰ ছোদেপুৰ অঞ্চলত প্ৰথমে সাংকেতিক ভাষাত কথা পতা তথা অচিনাকি এই ছিগনেল ধৰা পৰে আৰু পৰৱৰ্তী সময়ত নিশা নিশা হুগলী জিলাৰ চুচুৰা আৰু কলকাতাৰ ছিয়ালদাহৰ আকাশত এই ৰেডিঅ’ সংকেট ধৰা পৰি আহিছে।
কলকাতা অঞ্চলৰ ভিতৰত ২৫ ৰপৰা ৩০ কিল’মিটাৰৰ ব্যাসাৰ্ধত এই ছিগনেল ধৰা পৰিছে। বেংগল এমেছাৰ ৰেডিঅ’ ক্লাবৰ সচিব অম্বৰিশ নাগ বিশ্বাসে কয় যে এই ৰহস্যজনক ছিগনেলৰ সন্দৰ্ভত নিৰাপত্তা সংস্থাৰ লগতে তথ্য সম্প্ৰচাৰ মন্ত্ৰালয়ক অবগত কৰা হৈছে।
তেওঁ লগতে কয় যে এই গোপন বাৰ্তালাপৰ আঁৰত থকা সকলৰ লগত যোগাযোগ কৰিলে বা তেওঁলোকৰ পৰিচয় সুধিলে সিমূৰৰপৰা কোনো উত্তৰ নাহে।
ৰহস্যজনক ছিগনেলেৰে আফগানিস্তানৰ 'পাস্তো’ ভাষত কথা পতা বুলি সন্দেহ কৰা হৈছে যদিও কি ভাষাত আৰু কোনে এনেদৰে নিশা নিশা কথা পাতি আছে সেয়া এতিয়াও নিশ্চিত হ’ব পৰা হোৱা নাই।
আন্তঃৰাষ্ট্ৰীয় ৱায়াৰলেছ নিৰীক্ষণ কেন্দ্ৰৰ পূব মণ্ডলৰ কাৰ্যলয়ে এই সন্দৰ্ভত কয় যে তেওঁলোকে বিষয়টো তদন্ত কৰি আছে। ম’বাইল আৰু ইণ্টাৰনেটৰ যোগাযোগৰ ক্ষেত্ৰত চৰকাৰী নিৰীক্ষণ হৈ থকাৰ পৰিপ্ৰেক্ষিতত সন্ত্ৰাসবাদী সংগঠনে এনেদৰে অচিনাক্ত ৰেডিআ’ ছিগনেল ব্যৱহাৰ কৰিব পৰে বুলি চোৰাংচেৱা সংস্থাসমূহে সন্দহ প্ৰকাশ কৰিছে।