লাহোৱালঃ আলোক অভিযান (অন্ধবিশ্বাস কুসংস্কাৰৰ বিৰুদ্ধে)ৰ প্ৰথমখন সাধাৰণ সভা ৩ মাৰ্চত ডিব্ৰুগড় হনুমানবক্স সুৰজমল কানৈ মহাবিদ্যালয়ৰ শ্ৰীমন্ত শংকৰদেৱ সভাকক্ষত অনুষ্ঠিত হয়।
১৩ খন জিলাৰপৰা মুঠ ১৩৫ গৰাকী প্ৰতিনিধিয়ে অংশগ্ৰহণ কৰা প্ৰথম অধিৱেশনৰ সভাপতিত্ব কৰে আলোক অভিযানৰ সভাপতি ফিলিপ জামান নেওগ, সদস্য ডঃ গীতিমল্লিকা গগৈ আৰু ভূষণজ্যোতি সন্দিকৈয়ে।
দ্বিতীয় অধিৱেশনৰ সভাপতিত্ব কৰে সভাপতি ফিলিপ জামান নেওগ, আলোক অভিযানৰ উপদেষ্টা সুদক্ষিণা দাস আৰু সদস্য ৰমাকান্ত ভক্তই। সাধাৰণ সম্পাদক অৰ্পনা বড়াই আঁত ধৰা অনুষ্ঠানটোত আদৰণি ভাষণ আগবঢ়াই মুখ্য উপদেষ্টা অঞ্জু বৰকটকীয়ে।
দ্বিতীয় অধিৱেশনৰ মুকলি আলোচনাত বহু ব্যক্তিয়ে বক্তব্য ৰাখে। স্ব-ৰচিত আৰু সুৰাৰোপিত দুটি সুন্দৰ গীতেৰে অনুষ্ঠানটি জীপাল কৰে শিল্পী দামোদৰ দত্তই। সভাত কেইবাটাও গুৰুত্বপূৰ্ণ সাংগঠনিক সিদ্ধান্তৰ লগতে বীৰুবালা ৰাভাক এটা মাহেকীয়া ভাট্টা দিবৰ বাবে চৰকাৰক দাবী জনোৱাৰ সিদ্ধান্ত গ্ৰহণ কৰা হয়।
কানৈ মহাবিদ্যালয়ৰ আধ্যক্ষ ডঃ শশীকান্ত শইকীয়াই মহাবিদ্যালয়ৰপৰা বীৰুবালা ৰাভালৈ মাহে দুহাজাৰ টকাকৈ দুবছৰৰ বাবে সাহায্য আগবঢ়োৱাৰ কথা ঘোষণা কৰে। লগতে সদৌ অসম নাৰ্ছ সন্থাৰ সম্পাদিকা জুনু দিহিংগীয়াই মাহে পাঁচশ টকাকৈ দুবছৰৰ বাবে সাহায্য আগবঢ়াব বুলি ঘোষণা কৰে।
আলোক অভিযানৰ তৰফৰপৰা এই ধনৰাশি বীৰুবালা ৰাভাৰ একাউণ্টত প্ৰতিমাহে জমা কৰাৰ বাবে কাৰ্যকৰী ব্যৱস্থা কৰাৰ সিদ্ধান্ত কৰা হয়। উপস্থিত প্ৰায় শতাধিক ব্যক্তিয়ে আলোকৰ সদস্য ভৰ্ত্তিৰ প্ৰ-পত্ৰ পূৰণ কৰি সদস্য ভৰ্তিৰ সন্মতি প্ৰকাশ কৰে।