লিডুঃ ৰাজ্যত অব্যাহত আছে অবৈধ সুৰাৰ ব্যৱসায় বন্ধৰ সমৰ্থনত তীব্ৰ প্ৰতিবাদ৷ অবৈধ চুলাই মদ সেৱন কৰি শতাধিক লোকে কৰুণ মৃত্যুক আঁকোৱালী লোৱাৰ সময়তে একাংশ অসাধু লালি গুৰৰ ব্যৱসায়ীয়ে প্ৰশাসনক বুঢ়া আঙুলি প্ৰদৰ্শন কৰি অব্যাহত ৰাখিছে মাৰাত্মক চুলাই মদৰ মুকলি বেহা৷
প্ৰশাসনৰ ১৪৪ ধাৰাকো উলংঘা কৰি এচাম অবৈধ চুলাই মদৰ ব্যৱসায়ীয়ে কুইণ্টলে কুইণ্টেলে লালি গুৰ সৰবৰাহ কৰি এনে বেহা অব্যাহত ৰখা কাৰ্যই এতিয়া চিন্তাম্বিত কৰি তুলিছে স্থানীয় আৰক্ষী প্ৰশাসনক।
দেওবাৰে মাৰ্ঘেৰিটা মহকুমাৰ আবকাৰী বিষয়া আৰু লেখাপানী আৰক্ষীৰ এটি বৃহৎ দলে যৌথভাৱে অভিযান চলাই লেখাপানীৰ উদয়পুৰ আৰু তিনিমাইলৰ কেইবাজনো লালিগুৰৰ ব্যৱসায়ীক আটক কৰে৷
লগতে ব্যৱসায়ীকেইজনৰপৰা বৃহৎ পৰিমাণৰ লালি গুৰ জব্দ কৰিবলৈ সক্ষম হয়। জব্দ কৰা লালিগুৰৰ পৰিমাণ প্ৰায় ৬৯০০ কিল’গ্ৰাম বুলি জানিব পৰা গৈছে। যাৰ বজাৰ মুল্য প্ৰায় ৫ লক্ষাধিক টকা হ’ব বুলি অনুমান কৰা হৈছে৷
ইফালে ধৃত ব্যৱসায়ীকেইজনৰ নাম ক্ৰমে মুন্না লাল, সঞ্জীৱ কুমাৰ শ্বাহ, হৰেন্দ্ৰ শ্বাহ বুলি জানিব পৰা গৈছে৷ ব্যৱসায়ীকেইজনে বিগত সুদীৰ্ঘ সময় ধৰি অতি গোপনে চুলাই মদৰ অবৈধ বেহা অব্যাহত ৰাখিছিল বুলি বিশেষ সূত্ৰে জানিব পৰা গৈছে৷