70
মোৰাঝাৰঃ হোজাই জিলাত একাংশ লোকে ভুৱা পাছ ব্যৱহাৰ কৰি দেশজুৰি অব্যাহত থকা লকডাউন উলংঘা কৰাৰ অভিযোগ উত্থাপিত হৈছে৷ এনে পৰিপ্ৰেক্ষিতত হোজাই জিলাৰ ডবকা ৰাজহ চক্ৰ বিষয়াৰ কাৰ্যালয়ত বুধবাৰে মোৰাঝাৰ আৰক্ষী থানাৰ ভাৰপ্ৰাপ্ত বিষয়া সিং লিম্বুৰ নেতৃত্বত এক অভিযান চলোৱা হয়৷ উক্ত অভিযানত টকাৰ বিনিময়ত বিলাসী গাড়ীৰ পাছ ব্যৱহাৰ কৰা ঘটনা পোহৰলৈ আহে৷
আব্দুৰ ৰহিম নামৰ এজন লোকক সঘনাই ঘূৰি ফুৰাতো প্ৰত্যক্ষ কৰি সন্দেহ ওপজাত আৰক্ষীয়ে সোধ-পোছ কৰে৷ আৰক্ষীৰ প্ৰশ্নত ব্যক্তিজনে খৰ্গহস্ত হৈ ৭ খন থানাৰ ভাৰপ্ৰাপ্ত বিষয়াৰ পৰা পাছ লোৱা বুলি মন্তব্য কৰে৷ পৰৱৰ্তী সময়ত আব্দুৰ ৰহিম নামৰ সেই ব্যক্তিজনে ডবকা ৰাজহ চক্ৰ বিষয়াৰ কাৰ্যালয়ৰ এজন কৰ্মচাৰীক ৫০০ টকা উৎকোচ দি তেওঁৰ AS 06 K8905 নম্বৰৰ টয়টা গাড়ীৰ নামত পাছ সংগ্ৰহ কৰিছিল বুলি আৰক্ষী আৰু সংবাদ মাধ্যমক জানিবলৈ দিয়ে৷