আমগুৰি/দিখৌমুখঃ এবিধ ক’লা আৰু মুগা বৰণৰ মাখিৰ সন্ত্ৰাসত আতংকিত হৈ পৰিছে শিৱসাগৰ জিলাৰ বাসিন্দা৷ শিৱসাগৰৰ একাংশ লোকে মাখিবিধক কলা মিলিটাৰী আখ্যা দি মাখিৰ সন্ত্ৰাসৰ পৰা ৰাইজক ৰক্ষা কৰিবলৈ দাবী জনাইছে৷ অচিনাক্ত প্ৰজাতিৰ মাখিৰ উপদ্ৰৱত জিলাখনৰ আমগুৰিৰ দিখৌমুখ অঞ্চলৰ বাসিন্দাই ঘৰৰ পৰা ওলাব নোৱাৰা হৈছে। আক্ৰমণাত্মক মাখিৰ দ্বাৰা এই পৰ্যন্ত চাৰি শতাধিক লোক আক্ৰান্ত হৈছে বুলি জানিব পৰা গৈছে। অচিনাক্ত মাখিৰ সন্দৰ্ভত গৱেষণাৰ বাবে দিখৌমুখত উপস্থিত আই চি এম আৰৰ দলো।
হয়, এক বিশেষ প্ৰজাতিৰ মাখিৰ সন্ত্ৰাসত আতংকিত হৈ পৰিছে এতিয়া শিৱসাগৰৰ দিখৌমুখৰ ৰাইজ। এই পৰ্যন্ত চিনাক্ত নোহোৱা অচিন প্ৰজাতিৰ মাখিবিধে ত্ৰাসৰ সৃষ্টি কৰিছে দিখৌমুখৰ বহুকেইটা অঞ্চলত। জাকে জাকে উৰি ফুৰা মাখিবিধে ইজনৰ পাছত সিজন লোক আক্ৰান্ত হৈছে মাখিৰ কামোৰত। জাকে জাকে মাখিৰ আগমনে ত্ৰাসিত কৰি তুলিছে অঞ্চলবাসীক।
দিখৌমুখৰ নকটানি, কালুগাঁও, ৰঘুবাৰী, ভৰলুৱা আদি গাঁও সমূহত আক্ৰান্ত হৈছে চাৰিশৰো অধিক লোক। কাৰোবাক মাখিবিধে কামুৰিলেই কামোৰা অংশত ভয়ানকভাৱে ফুলি উঠি প্ৰচণ্ড খজুৱতি ধৰিবলৈ আৰম্ভ কৰে। পুৰুষ-মহিলা, বৃদ্ধ-বৃদ্ধা, কণ কণ শিশু কোনোৱেই সাৰি যোৱা নাই মাখিৰ আক্ৰমণৰ পৰা। ভয়ানক মাখি ক'ৰ পৰা আহিল তাক লৈ আৰম্ভ হৈছে ৰহস্যৰ।
সংবাদ মাধ্যমত প্ৰকাশিত বাতৰিৰ আঁত ধৰি দিল্লীস্থ ৰাষ্ট্ৰীয় গৱেষণা কেন্দ্ৰ আই চি এম আৰৰ ডিব্ৰুগড়স্থিত উত্তৰ পূৰ্বাঞ্চলীয় কাৰ্যালয়ৰ এটা তিনিজনীয়া দল দেওবাৰে দিখৌমুখত উপস্থিত হয়। দলটোৱে মাখিবিধৰ প্ৰজাতি সন্দৰ্ভত স্পষ্টকৈ একো জনাব নোৱাৰিলে আৰু গৱেষণাৰ বাবে তেওঁলোকে কেইবাশও মাখি সংগ্ৰহ কৰি লৈ যায়।
প্ৰথমে মৰিদিখৌৰ বন্ধ জলাশয়ত থিতাপি লোৱা মাখিবিধ সম্প্ৰতি সমগ্ৰ অঞ্চলতে বিয়পি পৰিছে। এক ভয়ংকৰ পৰিস্থিতিৰ পাছতো কিন্ত এই পৰ্যন্ত শিৱসাগৰ জিলা প্ৰশাসনে কোনোধৰণৰ প্ৰতিৰোধৰ ব্যৱস্থা গ্ৰহণ কৰা নাই। শীঘ্ৰেই জিলা প্ৰশাসন নাইবা স্বাস্থ্য বিভাগে সময়োপযোগী পদক্ষেপ গ্ৰহণ নকৰিলে দিখৌমুখবাসী ৰাইজ ভয়ংকৰ সমস্যাৰ সন্মুখীন হোৱাৰ আশংকাই প্ৰকট হৈ পৰিছে।