newsnextone.com | চাবুৱাঃ ৰাজ্যৰ সৰ্বত্ৰে এতিয়া নিচা জাতীয় সামগ্ৰীৰ অবাধ প্ৰচলনে সমাজখনক বিপথে পৰিচালিত কৰা পৰিলক্ষিত হৈ আহিছে৷ ৰাজ্যৰ ভিন্ন প্ৰান্তত গঢ় লৈ উঠা অবৈধ দেশী-বিদেশী চুলাইৰ ঘাটি সমূহে যুৱ প্ৰজন্মৰ মনত কু প্ৰভাৱ পেলাই ধ্বংসৰ মুখলৈ ঠেলি দিছে৷ আনহাতে, একাংশ চৰাকৰী বিষয়াই ধন ঘটাৰ আশাত প্ৰশাসনেও তেনে মদৰ ঘাটি সমূহ উচ্ছেদ নকৰে বুলি ৰাইজে অভিযোগ উত্থাপন কৰি আহিছে৷
অবৈধ মদ, লালিগুড়, ড্ৰাগছ আদি নিচা জাতীয় সামগ্ৰীৰ অবাধ প্ৰচলনৰ ফলত বিভিন্ন অঞ্চলৰ পৰিবেশ প্ৰদূষিত হৈ পৰা পৰিলক্ষিত হৈছে৷ ৰাজ্যৰ বিভিন্ন প্ৰান্তৰ লগতে বৃহত্তৰ চাবুৱা আঞ্চলত চুলাই মদ আৰু লালিগুড়ৰ ৰমৰমীয়া ব্যৱসায় চলি থকা বুলি অভিযোগ উত্থাপন কৰিছে সদৌ অসম মটক যুৱ-ছাত্ৰ পৰিষদে। সংগঠনটোৰ ডিব্ৰুগড় জিলা সমিতিৰ সম্পাদক উমাকান্ত গগৈ, উপ-সভাপতি নন্দন চাংমাই মদ, গাঞ্জা, ড্ৰাগছৰ দৰে বৰবিহৰ পৰা যুৱ প্ৰজন্মক ৰক্ষা কৰাৰ স্বাৰ্থত ডিব্ৰগড় জিলা উপায়ুক্তক এখন স্মাৰক পত্ৰ প্ৰদান কৰি এই অভিযোগ উত্থাপন কৰে।
