মিৰ্জাঃ দক্ষিণ কামৰূপৰ অসম মেঘালয় সীমান্তৰ পশ্চিম কামৰূপ বন সংমণ্ডলৰ অন্তৰ্গত লোহাৰঘাট বনাঞ্চলিক কাৰ্যালয়ৰ সংৰক্ষিত বনাঞ্চলসমূহ বনবিষয়াৰ ছত্ৰ ছায়াতে বন মাফিয়াই নি:শেষ কৰি অহাৰ অভিযোগ উঠাৰ সময়তে বৰদুৱাৰ ভোলাগাঁও আঞ্চলিক ৰাভা ছাত্র সন্থাই কেইদিনমান পূৰ্বে অভিযান চলাই ২২ টা শালৰ প্ৰকাণ্ড কুণ্ডা ভৰ্তি এখন ডি আই গাড়ী জব্দ কৰি সংগঠনটোৰ কাৰ্যালয়ত এসপ্তাহ ৰখাৰ পিছত সংমণ্ডলটোৰ ডিএফ অ' ৰঞ্জন গোস্বামীৰ নিৰ্দেশত এচিএফ বিষয়া গুণদ্বীপ দাসে সংগঠনটোৰপৰা উক্ত ডিআই গাড়ীখন চমজি লবলৈ বাধ্য হৈছিল।
উল্লেখ্য যে, উক্ত ঘটনাৰ পিছদিনা অৰ্থাৎ যোৱা ১ এপ্ৰিলৰ দুপৰীয়া বৰদুৱাৰ-ভোলাগাও আঞ্চলিক ৰাভা ছাত্ৰ সন্থাই লোহাৰঘাট বনাঞ্চলিক বিষয়াৰ কাৰ্যালয়ৰ সন্মুখত বনমন্ত্ৰী পৰিমল শুক্লবৈদ্যৰ পুত্তলিকা দাহ কৰি প্ৰতিবাদ সাব্যস্ত কৰি লোহাৰঘাটৰ বন বিষয়া শান্তনু পাটোৱাৰীৰ বিৰুদ্ধে ব্যৱস্থা গ্ৰহণৰ দাবি তুলিছিল। কিন্তু ৰাজনৈতিক আশীৰ্বাদ থকা বিষয়াগৰাকীৰ বিৰুদ্ধে কোনো ব্যৱস্থা গ্ৰহণ নকৰাত পিছত পুনৰ যোৱা নিশা বাগান কলঘৰৰপৰা এখন কুণ্ডাভৰ্তি এ এছ ২৫ চি চি ৯৪৩৮ নম্বৰ অটো ভেন জব্দ কৰিবলৈ সক্ষম হয়।
এই ঘটনাই বনবিভাগৰ শীৰ্ষ মহলত জোকাৰণী তোলাৰ পিছত আজি পুনৰ লোহাৰঘাট বনাঞ্চলিক কাৰ্যালয়ৰ সন্মুখতে মুখ্যমন্ত্ৰী সৰ্বানন্দ সোণোৱালৰ পুত্তলিকা দাহ কৰি প্ৰতিবাদ সাব্যস্ত কৰে। লগতে মুখ্যমন্ত্ৰী হায় হায়, বনমন্ত্ৰী পৰিমল শুক্লবৈদ্য মুৰ্দাবাদ, বন বিভাগ হায় হায়, লোহাৰঘাটৰ বনাঞ্চলিক বিষয়া মুৰ্দাবাদ, ঘোচখোৰ বন বিষয়া শান্তনু পাটোৱাৰী হুছিয়াৰ, আৰছু জিন্দাবাদ আদি শ্লোগান দি পৰিবেশ উত্তাল কৰি তোলে।
উল্লেখ্য যে, ৩১ মাৰ্চৰ নিশা লোহাৰঘাট বনাঞ্চলিক কাৰ্যালয়ৰ নাতিদূৰৰ কৰাপাৰা গাঁৱৰ মনোজ ৰাভা নামৰ এজন বন মাফিয়াৰ ঘৰৰ চোতালৰপৰা ২২ টা শাল কাঠৰ কুণ্ডাভৰ্তি নম্বৰ প্লেট বিহীন টাটা ডি আই এখন ৰাভা ছাত্ৰ সন্থাৰ সদস্য সকলে জব্দ কৰি লোহাৰঘাটস্থিত ৰাভা ছাত্ৰ সন্থাৰ কাৰ্যালয়লৈ লৈ আহিছিল।
ছাত্ৰ সন্থাৰ অভিযানকাৰীৰ দলটোৱে এই অভিযান চলোৱাৰ পূৰ্বে লোহাৰঘাট বনাঞ্চলিক কাৰ্যালয়ৰ বনবিষয়া শান্তনু পাটোৱাৰীক বিষয়টো অৱগত কৰি সহযোগিতা বিচাৰিছিল যদিও তেওঁ বিষয়টো গুৰুত্ব প্ৰদান নকৰাৰ লগতে বনমাফিয়াক সহযোগ কৰাৰ অভিযোগ উত্থাপন কৰি প্ৰতিবাদী কাৰ্যসূচী ৰূপায়ন কৰিছিল।
ইমানৰ পিছতো বন বিষয়াগৰাকীয়ে বনমাফিয়াৰ বিৰুদ্ধে কোনো গুৰুত্ব প্ৰদান নকৰা লগতে উৰ্ধতম কৰ্তৃপক্ষয়ো বনবিষয়া গৰাকীৰ বিৰুদ্ধে কোনো ব্যৱস্থা গ্ৰহণ নকৰাত আজি ৰাভা ছাত্ৰ সন্থাই মুখ্যমন্ত্ৰীৰ সৰ্বানন্দ সোণোৱালৰ পুত্তলিকা দাহ কাৰ্যসূচী ৰূপায়ন কৰে। প্ৰতিবাদী কাৰ্যসূচীৰ জৰিয়তে শীঘ্ৰে চকিদাৰ বুলি আখ্যায়িত কৰা শান্তুনু পাটোৱাৰীৰ বিৰুদ্ধে ব্যৱস্থা হাতত নললে সমাগত লোকসভা নিৰ্বাচনত বিজেপি বিৰোধী স্থিতি গ্ৰহণ কৰিব বুলিও হুংকাৰ দিয়ে ৰাভা ছাত্ৰ সন্থাই।
বৰদুৱাৰ-ভোলাগাও আঞ্চলিক ৰাভা ছাত্ৰ সন্থাকে ধৰি কেইবাটাও সংগঠনে বিজেপিৰ বিৰুদ্ধে ভোট প্ৰদান কৰিবলৈও ৰাভা হাছাং এলেকাত জনমত গঢ়ি তোলা হ’ব বুলি প্ৰতিবাদীলোকসকলে মন্তব্য কৰে। এতিয়া ৰাভা ছাত্ৰ সন্থাৰ এনে হুংকাৰক মুখ্যমন্ত্ৰী আৰু বনমন্ত্ৰীয়ে কিদৰে গ্ৰহণ কৰে সেয়া লক্ষণীয় হ'ব। কিন্তু ৰাজনৈতিক আশীৰ্বাদ পুষ্ট ঘোচখোৰ বন বিষয়া শান্তনু পাটোৱাৰীৰ চকী ৰক্ষাৰ যুজত শল ঠেকত পৰিব নেকি গুৱাহাটী লোকসভা বিজেপি প্ৰাৰ্থী কুইন ওজা।