নগাঁওঃ বটদ্ৰৱা সমষ্টিৰ বিধায়িকা আঙুৰলতা ডেকাই শেহতীয়াভাৱে সংঘটিত কৰা এক নাভূত-নাশ্ৰুত কাণ্ডই সচেতন মহলৰ চকু কপালত তুলিছে৷ জানিব পৰা মতে, সমষ্টিটোৰ জাজৰিৰ মাজগাঁওস্থিত জোনাকী ক্ষেত্ৰত অগ্ৰণী স্বেচ্ছাসেৱী অনুষ্ঠান স্বৰ্গীয় কলেশ্বৰ ডেকা জাতীয় ন্যাসে 'বটদ্ৰৱা বিশেষভাৱে সক্ষম বিদ্যালয়' নামেৰে এখনি শিক্ষানুষ্ঠান স্থাপনৰ মানসেৰে দেওঁবাৰে ইয়াৰ আধাৰশিলা স্থাপন অনুষ্ঠানৰ আয়োজন কৰিছিল৷

সেই অনুসৰি আধাৰশিলা স্থাপন কৰিবৰ বাবে স্থানীয় বিধায়িকা আঙুৰলতা ডেকাক তেওঁৰ সন্মতি সাপেক্ষে নিমন্ত্ৰণ কৰা হৈছিল ৷ আনকি পূৰ্বে ব্যস্ততাৰ বাবে বিধায়িকাগৰাকীৰ কথা মতে দুবাৰকৈ তাৰিখ পিছুৱাই শেষত দেওবাৰে বিধায়িকাগৰাকীয়ে উক্ত অনুষ্ঠানত উপস্থিত থকাৰ নিশ্চিতি প্ৰদান কৰাত উদ্যোক্তা সকলে প্ৰয়োজনীয় সকলো প্ৰস্তুতি সম্পূৰ্ণ কৰি তোলে।

ইয়াৰ বাবে পুৱা ১১ বজাত সময় নিৰ্দ্ধাৰণ কৰি স্থানীয় ৰাইজ, আন আমন্ত্ৰিত অতিথি তথা ন্যাসৰ কৰ্মকৰ্তাসকল প্ৰায় এক ঘন্টা আগৰে পৰাই অপেক্ষা কৰি থাকে যদিও বিধায়িকাগৰাকীয়ে কিন্তু সকলোকে আশাহত কৰি অনুষ্ঠানত উপস্থিত নহ’ল।

এনেদৰে কথা দিও উপস্থিত নথকাৰ কাৰণ হিচাপে বিধায়িকাৰ স্বামী আকাশদ্বীপে উদ্যোক্তাসকলক ফোন যোগে জনাই যে- বিধায়িকাগৰাকীয়ে আধাৰশিলা স্থাপনৰ কাৰণে যিখন ফলক সাজু কৰি ৰখা হৈছিল সেইখনৰ আখৰবোৰ বেয়া। সেয়ে মাজগাঁৱৰ পৰা মাত্ৰ কেই কিলোমিটাৰ মান দূৰৈত আন এটি আধাৰশিলা অনুষ্ঠানলৈ আহিও মাজগাঁৱৰ উক্ত কাৰ্যসূচীত অংশগ্ৰহণ নকৰিলে বিধায়িকাগৰাকীয়ে।

জানিব পৰা মতে, প্ৰকৃততে আধাৰশিলাৰ ফলকখন আটকধুনীয়াকৈ মাৰ্বল পাত্থৰত আখৰ খোদিত কৰাটো বিচাৰিছিল আধুনিক মনৰ বিধায়িকা আঙুৰলতা ডেকাই৷ কিন্তু সময়ৰ নাটনিত উদ্যোক্তাসকলে বিধায়িকাৰ মন-পছন্দৰ মতে ফলকখন তৈয়াৰ নকৰি চিমেন্টেৰে বনাই ফলকত আখৰ হাতেৰে লিখাৰ বাবেই ক্ষোভিত হৈ এনে নোহোৱা-নোপোজা কাণ্ড সংঘটিত কৰিলে পৰিৱৰ্তনশীল চৰকাৰৰ বিধায়িকাগৰাকীয়ে ৷

বিধায়িকাগৰাকীৰ এনে কাণ্ডক লৈ সমগ্ৰ বটদ্ৰৱা সমষ্টিতে এতিয়া বিৰূপ প্ৰতিক্ৰিয়াই দেখা দিছে। একাংশ সমাজ সচেতন ব্যক্তিয়ে বিধায়িকাগৰাকীৰ এনে কাণ্ডক চৰম দুৰ্ভাগ্যজনক আখ্যা দিয়াৰ বিপৰীতে আন একাংশই ফলকখন যিয়েই নহওঁক কিয় অনুষ্ঠানটোৰ মহৎ উদ্দেশ্যকহে বিধায়িকাগৰাকীয়ে প্ৰকৃততে গুৰুত্ব দিব লাগিছিল বুলি মন্তব্য কৰি এনে কাৰ্যক গৰিহণা দিছে।