মাৰ্ঘেৰিটাঃ অসম-অৰুণাচল সীমান্তৱৰ্তী তিনিচুকীয়া জিলাৰ মাৰ্ঘেৰিটা মহকুমা আৰক্ষী প্ৰশাসনৰ অন্তৰ্গত টিংৰাইত যোৱা নিশা প্ৰায় ১ বজাত ডিগবৈ বিধানসভা সমষ্টিৰ বিধায়ক সুৰেণ ফুকনৰ নেতৃত্বত স্থানীয় একাংশ সচেতন যুৱকে মাৰ্ঘেৰিটা মহকুমাৰ গাতে লাগি থকা চুবুৰীয়া অৰুণাচলৰ খাৰচাঙৰ পৰা অবৈধ ভাৱে ৩৮ নং ৰাষ্ট্ৰীয় ঘাইপথেৰে জাগুণ, লিডু, মাৰ্ঘেৰিটা নগৰ হৈ অবৈধ কয়লা কঢ়িয়াই অনা ১২ খন অবৈধ বাৰচকীয়া ট্ৰাক জব্দ কৰিবলৈ সক্ষম হয়৷
জব্দ হোৱা ট্ৰাক কেইখন ইতিমধ্যে আৰক্ষীক চমজাই দিয়া হৈছে। আৰক্ষীয়ে এই সন্দৰ্ভত বিধায়কগৰাকীৰ হৈ পাপু গগৈয়ে দাখিল কৰা এজাহাৰৰ ভিত্তিত ভাৰতীয় দণ্ডবিধি আইনৰ ৩৭৯ ধাৰাৰ অধীনত ১৪৬/১৭ নম্বৰৰ এটি গোচৰো ৰুজু কৰিছে৷
আনহাতে, বিধায়কজনে এই প্ৰতিবেদকক জনোৱা মতে, ইতিমধ্যে মুখ্যমন্ত্ৰী সৰ্বানন্দ সোণোৱালে এই বিষয়ে অৱগত হৈ আৰক্ষী প্ৰশাসনক বিশেষ তদন্তৰ নিৰ্দেশ দিছে ৷ মাৰ্ঘেৰিটা মহকুমা আৰু মহকুমাটোৰ গাতে লাগি থকা চুবুৰীয়া ৰাজ্য অৰুণাচলৰ খাৰচাং, নামটক আদি অঞ্চলত কয়লাৰ অবৈধ বেহা নতুন বিষয় নহয়। কিন্তু, অসম আৰক্ষী আৰু ক'ল ইণ্ডিয়াৰ সুসজ্জিত নিৰাপত্তাৰক্ষী থকাৰ পিছতো তেওঁলোকৰ পৰিৱৰ্তে এজন বিধায়কে অবৈধ কয়লাৰ গাড়ীৰ বিৰুদ্ধে অভিযান চলাব লগা হোৱা এই ঘটনাটোৱে জিলাখনত চাঞ্চল্যৰ সৃষ্টি কৰিছে।
উল্লেখ্য যে, জব্দ কৰা ট্ৰাকসমূহ বিধায়কগৰাকীৰ তৎপৰতাত আজি ৱেইট ব্ৰিজত ওজন কৰাৰ পিছত আন এক ভয়ংকৰ তথ্য পোহৰলৈ আহে। তথ্য মতে, কাগজে-পত্ৰে উল্লেখ থকাতকৈ প্ৰতিখন ট্ৰাকতে ১১ টনৰ পৰা ১৫ টন পৰ্য্যন্ত অতিৰিক্ত কয়লা বোজাই কৰা হৈছিল। লগতে, জব্দ কৰা ক্ৰমে, এইচ আৰ ৫৫ কিউ ৬৩১৭, ডব্লিউ বি ৪১ জি ৮৬৩৮, এ এছ ০১ ইউ ৩৩২৩, এ এছ ০১ বি চি ৯২৭৪, এ এছ ০১ জি চি ০২৫৪, এ এছ ০১ ডি ডি ১৯৫৭, এ এছ ১৭ বি ৬৭০৫, ইউ পি ১৫ ৮০ ৯৩৭৫, ইউ পি ১৫ চি টি ৩৭২৫, বি আৰ ০৬ জি বি ৬৮১২, বি আৰ ০৬ জি বি ৩৩৯৩ আৰু বি আৰ ০৬ জি বি ৩৩৮৬ নম্বৰৰ এই অবৈধ কয়লা পৰিবাহী ট্ৰাক কেইখনৰ অন্যান্য বিভাগীয় অনুমতি সম্বন্ধীয় নথি-পত্ৰটো ব্যাপক বিসংগতি ধৰা পৰিছে বুলি বিধায়কজনে সংবাদ মাধ্যমৰ আগত অভিযোগ কৰিছে৷
এক বিশেষ সূত্ৰই অভিযোগ কৰা মতে, খাৰচাঙৰ এই অবৈধ কয়লা সৰবৰাহত বিভিন্ন প্ৰকাৰে জড়িত থকা ব্যক্তিসমূহৰ ভিতৰত অন্যতম হৈছে ডিগবৈৰ বহু বিতৰ্কিত কয়লা ব্যৱসায়ী জনৈক এছ এন আগৰৱালা, এছ শৰ্মা, লিডু-মাৰ্ঘেৰিটাৰ জনৈক বাদল, পাৰ্থ, ৰাজা, ৰাজীৱ নামৰ ব্যক্তি কেইজন। চোৰাং ব্যৱসায়ী চক্ৰই অতি কৌশলপূৰ্ণভাৱে ক'ল ইণ্ডিয়াৰ চালান ব্যৱহাৰ কৰি দৈনিক নিশা গাড়ীয়ে গাড়ীয়ে অবৈধ কয়লা বৈধ কৰি অসমৰ লগতে বহিঃ ৰাজ্যলৈ সৰবৰাহ কৰি অহাৰ অভিযোগ কৰিছে বিশেষ সূত্ৰটোৱে।
উত্থাপিত অভিযোগ অনুযাযী, অসমত প্ৰৱেশ কৰি অবৈধ চক্ৰটোৱে লেখাপানী আৰক্ষী থানাৰ অন্তৰ্গত জাগুন আৰক্ষী চকীত ২৮ হাজাৰকৈ টকা ট্ৰাকে প্ৰতি এন্ট্ৰি ফিজৰ নামত দৈনিক উৎকোচ দি সমগ্ৰ বেহা চলাই আহিছে। এই সমগ্ৰ বেহাৰ সৈতে একাংশ ৰাজনৈতিকভাৱে আশীষধন্য বুলি দম্ভালি মৰা স্তাৱক, ক'ল ইণ্ডিয়াৰ একাংশ ঘোচখোৰ বিষয়া-কৰ্মচাৰী, একাংশ কয়লা শ্ৰমিক সংগঠনৰ নেতা, একাংশ মন্ত্ৰী-বিধায়কৰ ঘনিষ্ঠ, একাংশ দুৰ্নীতিগ্ৰস্ত আৰক্ষী তথা পৰিবহণ বিষয়াকে ধৰি বিভিন্ন পক্ষ পৰোক্ষ আৰু প্ৰত্যক্ষভাৱে জড়িত হৈ আছে।
আনহাতে, অবৈধ চক্ৰটোৱে সমগ্ৰ ঘটনাটোক বৃহৎ পৰিমাণৰ ধনৰ বিনিময়ত মেনেজৰ চেষ্টা অব্যাহত ৰাখিছে বুলি গুৰুত্বপূৰ্ণ অভিযোগ উত্থাপিত হৈছে ৷ এই সন্দৰ্ভত ছাত্ৰ মুক্তি সংগ্ৰাম সমিতিৰ তিনিচুকীয়া জিলা সমিতিৰ সভাপতি লক্ষ্যজ্যোতি গগৈ আৰু সদৌ অসম টাই আহোম ছাত্ৰ সন্থাৰ তিনিচুকীয়া জিলা সমিতিৰ নেতা উৎপল গগৈয়ে বিধায়কৰ এই পদক্ষেপ এশ শতাংশই সমৰ্থন যোগ্য বুলি মন্তব্য কৰাৰ লগতে বিধায়কগৰাকীক ভৱিষ্যতেও দুৰ্নীতিৰ বিৰুদ্ধে এনেধৰণৰ দৃষ্টান্তমূলক পদক্ষেপ গ্ৰহণৰ বাবে অনুৰোধ জনাইছে।