হোজাইঃ ছচিয়েল মিডিয়াই সমাজত যিমান সুপ্ৰভাৱ পেলাইছে সিমানেই পেলাইছে কুপ্ৰভাৱো৷ আধুনিক সমাজৰ অবিচ্ছেদ্য প্ৰয়োজন হিচাপে পৰিগনিত হোৱা ফেচবুক, টুইটাৰ, হোৱাটচএপ আদি সামাজিক মাধ্যমসমূহৰ বহুতেই অপপ্ৰয়োগ কৰি আহিছে৷ যাৰ ফলত বহু লোকৰ জীৱন ধ্বংস হোৱাৰ নিচিনা ঘটনাও ঘটি আছে৷
শেহতীয়াকৈ ছচিয়াল মিডিয়াৰ অপপ্ৰয়োগেৰে এজন যুৱকে এগৰাকী যুৱতীৰ জীৱনৰ সতে হেতালি খেলাৰ কথা পোহৰলৈ আহিছে৷
জানিব পৰা মতে, হোজাই জিলাৰ নীলবাগানৰ জাবেদ আলী নামৰ যুৱকজনে কিছুদিন আগতে এগৰাকী কলেজীয়া ছাত্ৰীক বিয়াৰ প্ৰস্তাৱ দিছিল৷ কিন্তু ছাত্ৰীগৰাকীয়ে সেই প্ৰস্তাৱ নাকচ কৰাত কৰ্মসূত্ৰে কুৱেটত বাস কৰা জাবেদ আলী নামৰ যুৱকজনে ছাত্ৰীগৰাকীৰ অশ্লীল ভিডিঅ’ বনাই ছচিয়েল মিডিয়া যোগে ভাইৰেল কৰে৷
ইফালে লম্পট যুৱকজনৰ কুকাণ্ডই তীব্ৰ মানসিক চাপ পেলায় ছাত্ৰীগৰাকীৰ মনত৷ আনকি তীব্ৰ মানসিক চাপত ভূগি ছাত্ৰীগৰাকীয়ে কলেজ পৰ্যন্ত এৰি দিবলৈ বাধ্য হয়৷
কিন্তু ইমানৰ পাছতো যুৱকজনৰ কুকাণ্ডৰ অন্ত নপৰাত উপয়ান্তৰ হৈ ছাত্ৰীগৰাকী আৰু অভিভাৱকে হোজাই আদালতত জাবেদ আলী নামৰ যুৱকজনৰ বিৰুদ্ধে এক গোচক ৰুজু কৰে৷ কিন্তু তাৰ পিছতো আৰক্ষীয়ে যুৱকজনক আটক নকৰাত আৰক্ষীয়ে কোনো ব্যৱস্থা গ্ৰহণ নকৰাৰ অভিযোগ উত্থাপন কৰিছে ছাত্ৰীগৰাকীৰ অভিভাৱকে৷