জিতুমনি নাথ, মৰিগাঁওঃ মৰিগাঁৱত সেনাবাহিনীৰ এখন হেলিকপ্টাৰৰ জৰুৰী অৱতৰণক লৈ সাধাৰণ মানুহৰ মাজত সৃষ্টি হয় ব্যাপক চাঞ্চল্য। পাছত যান্ত্ৰিক বিজুতি বাবেহে হেলিকপ্টাৰখন অৱতৰণ কৰা হয় বুলি জানিব পৰাত হেলিকপ্টাৰখন চাবলৈ উৎসুক লোকৰ ব্যাপক সমাগম ঘটে।
জানিব পৰা মতে, সেনাবাহিনীৰ হেলিকপ্টাৰখন ডিমাপুৰৰপৰা শ্বিলঙলৈ যোৱা পথত সংঘটিত হয় এক যান্ত্ৰিক বিজুতি। মৰিগাঁও জিলাৰ ধৰমতুল আৰক্ষী থানা আৰু আমচৈ আৰক্ষী চকীৰ মাজৰ বৰবৰি পথাৰত সেনাবাহিনীৰ হেলিকপ্টাৰখন জৰুৰীভাৱে অৱতৰণ কৰিব লগাত পৰে।
ডিমাপুৰৰ সেনা চাউনীৰপৰা শ্বিলঙলৈ যোৱা আকাশী পথত হেলিকপ্টাৰখনৰ কিছু যান্ত্ৰিক বিজুতি ঘটাত বস্তি এলেকাৰপৰা ঘূৰাই আনি এই পথাৰখনত নিৰাপদে আকস্মিক অৱতৰণ কৰিব লগাত পৰে। এই খবৰ লাভ কৰাৰ লগে লগে ধৰমতুল আৰু আমচৈ আৰক্ষী আৰু মৰিগাঁও আৰক্ষী অধীক্ষক উপস্থিত হৈ ঘটনাৰ বুজ লয়।
পৰৱৰ্ত্তী সময়ত তেজপুৰৰপৰা আন এখন সেনাৰ ৰিকভাৰী হেলিকপ্টাৰ আহি ৰিকভাৰ কৰি লৈ যায় সেনাসহ হেলিকপ্টাৰখন। সেনাৰ হেলিকপ্টাৰৰ আকস্মিক অবতৰণে ৰাইজৰ মাজত তীব্ৰ চাঞ্চল্যৰ সৃষ্টি হৈছে।