জিতুমনি নাথ, মৰিগাঁওঃ ৰাষ্ট্ৰীয় নাগৰিক পঞ্জীত একাংশ লোকে ভুৱা নথি-পত্ৰৰে নিজৰ নাম সোমোৱাবলৈ অহৰহ চেষ্টা অব্যাহত ৰখাত ভুৱা নথি-পত্ৰ প্ৰস্তুতত সহযোগিতা কৰা চক্ৰ এটাৰ ২ জন লোকক মৰিগাঁও আৰক্ষীয়ে ১৭ মে'ত গ্ৰেপ্তাৰ কৰিছিল। 

ইয়াৰ পাছতেই সোমবাৰে মৰিগাঁও স্বাস্থ্য বিভাগৰ এজন কৰ্মচাৰীক আৰক্ষীয়ে গ্ৰেপ্তাৰ কৰা ঘটনাই ব্যাপক চাঞ্চল্য সৃষ্টি কৰিছে। মৰিগাঁও আৰক্ষীয়ে গ্ৰেপ্তাৰ কৰা যুটীয়া স্বাস্থ্য সঞ্চালক কাৰ্যালয়ৰ  কৰ্মচাৰীজনৰ নাম হৈছে প্ৰবোধ হাজৰিকা। এইজন স্বাস্থ্য বিভাগৰ কৰ্মচাৰী ভুৱা জন্মৰ প্ৰমাণ-পত্ৰ প্ৰস্তুত কাৰি চক্ৰটোৰ লগত জড়িত থকা অভিযোগ লাভ কৰাত মৰিগাঁও আৰক্ষীয়ে লোকজনক কাৰ্বি আংলং জিলাৰ বকলিয়াঘাটত পলাতক অৱস্থাত গ্ৰেপ্তাৰ কৰে।

উল্লেখ্য যে জাগীৰোডৰ এটা NRC পৰীক্ষণ কেন্দ্ৰই ৰোকচানা খাতুন নামৰ মহিলাগৰাকীক তেওঁৰ নথিপত্ৰ NRC কেন্দ্ৰত পুনৰীক্ষণৰ বাবে NRC কৰ্তৃপক্ষক জমা দিবলৈ কোৱাত মহিলাগৰাকীয়ে জমা দিয়া জন্মৰ প্ৰমাণ-পত্ৰত দুটাকৈ জন্মৰ তাৰিখ (১-১-০১) আৰু (১-১-১৯৯৬) বুলি উল্লেখ থকাৰ লগতে দুয়োখন জন্মৰ প্ৰমাণ-পত্ৰৰ ক্ৰমিক নং ০৯৪৭২৮ আৰু ২৯৯৭২৮ বুলি উল্লেখ থকাত NRC পৰীক্ষণ বিষয়াগৰাকীয়ে জাগীৰোড থানাত ২৯৭/১৯ নং এক গোচৰ ৰুজু কৰে৷

সেইমৰ্মে আৰক্ষীয়ে অভিযান চলাই মৈৰাবাৰী বৰথল দলৈগাঁৱৰপৰা মোজ্জামিল হুছেইনক গ্ৰেপ্তাৰ কৰাৰ লগতে মোজ্জামিলৰ স্বীকাৰোক্তিৰ ভিত্তিত গৰৈমাৰী বিল নিগম প্ৰাথমিক বিদ্যালয়ৰ শিক্ষক হজৰত আলীক কৰায়ত্ত কৰে৷

আৰক্ষীয়ে ধৃত লোক দুজনৰ জিম্মাৰপৰা ৭১ খন জন্মৰ প্ৰমাণ-পত্ৰ, দুখন মৃত্যুৰ প্ৰমাণ-পত্ৰ, ১৩ খন পান কাৰ্ড, ১৫৮ খন গাঁওবুঢ়াৰ প্ৰমাণ-পত্ৰ আৰু চাৰিখন ভোটৰ আইডি কাৰ্ডৰ লগতে বিভিন্ন ধৰণৰ নথি-পত্ৰ জব্দ কৰিছিল।

ভুৱা নথি-পত্ৰ প্ৰস্তুতকাৰী চক্ৰটোত আৰু বহু লোক জড়িত থকাৰ সন্দেহ কৰি আৰক্ষীয়ে তদন্ত আৰম্ভ কৰাৰ পাছতেই আজি মৰিগাঁও স্বাস্থ্য বিভাগৰ কৰ্মচাৰী প্ৰবোধ হাজৰিকাক গ্ৰেপ্তাৰ কৰে। এই ঘটনাৰ লগত জড়িত আৰু কেইবাজনো চৰকাৰী কৰ্মচাৰী শীঘ্ৰেই আৰক্ষীৰ জালত পৰাৰ সম্ভাৱনা আছে বুলিও এক সূত্ৰই প্ৰকাশ কৰিছে।