♦ ৰঙাদৰিয়া উচ্চতৰ মাধ্যমিক বিদ্যালয় আৰু মৰিগাঁও উচ্চতৰ মাধ্যমিক আৰু বহুমুখী বিদ্যালয়ৰ বিজ্ঞান শাখাত এশ শতাংশ ছাত্ৰ-ছাত্ৰী উত্তীৰ্ণ
জিতুমনি নাথ, মৰিগাঁওঃ অসম মাধ্যমিক শিক্ষা সংসদে পৰিচালনা কৰা উচ্চতৰ মাধ্যমিক চূড়ান্ত পৰীক্ষাৰ আজি ঘোষণা কৰা ফলাফলত মৰিগাঁও জিলাই প্ৰথম দহজনৰ ভিতৰত স্থান লাভ কৰিবলৈ সক্ষম নহ’লেও জিলাখনত সামগ্ৰিক ফলাফল আছিল আশানুৰূপ।
সমগ্ৰ ৰাজ্যখনত কলা শাখাত ৭৫.১৪ শতাংশ, বিজ্ঞান শাখাত ৮৬.৫৯ শতাংশ আৰু বাণিজ্য শাখাত ৮৭.৫৯ শতাংশ উত্তীৰ্ণ হাৰ হোৱাৰ বিপৰীতে মৰিগাঁও জিলাত সামগ্ৰিক উত্তীৰ্ণ হাৰ হৈছে কলা শাখাত ৭৯.০৩ শতাংশ, বিজ্ঞান শাখাত ৮৭.০১ শতাংশ আৰু বাণিজ্য শাখাত ৯৫.০৮ শতাংশ।
ইয়াৰে মৰিগাঁও জিলাত কলা শাখাত ৫০৮৪ জন ছাত্ৰ-ছাত্ৰীৰ ভিতৰত ৪০১৮ জন শিক্ষাৰ্থী উত্তীৰ্ণ হয়। প্ৰথম বিভাগত ৪৯৪ জন, দ্বিতীয় বিভাগত ১৩৮৩ জন আৰু তৃতীয় বিভাগত ২১৪১ জন ছাত্ৰ-ছাত্ৰী উত্তীৰ্ণ হয়।
বিজ্ঞান শাখাত মুঠ ৫৩৯ জন ছাত্ৰ-ছাত্ৰীৰ ভিতৰত ৪৬৯ জন উত্তীৰ্ণ হয়। ইয়াৰে প্ৰথম বিভাগত ১৫৮ জন, দ্বিতীয় বিভাগত ২৬৩ জন আৰু তৃতীয় বিভাগত ৪৮ জন উত্তীৰ্ণ হয়। একেদৰে বাণিজ্য শাখাত মুঠ ৩২৫ জন ছাত্ৰ-ছাত্ৰীৰ ভিতৰত ৩০৯ জন উত্তীৰ্ণ হয়।
ইয়াৰে প্ৰথম বিভাগত ৬০ জন, দ্বিতীয় বিভাগত ১২০ জন আৰু তৃতীয় বিভাগত ১২৯ জন ছাত্ৰ-ছাত্ৰী উত্তীৰ্ণ হয়।
এই ফলাফলৰ মাজতেই জিলাখনৰ ৰঙাদৰিয়া উচ্চতৰ মাধ্যমিক বিদ্যালয়ত আৰু মৰিগাঁও উচ্চতৰ মাধ্যমিক আৰু বহুমুখী বিদ্যালয়ৰ বিজ্ঞান শাখাত এশ শতাংশ ছাত্ৰ-ছাত্ৰী উত্তীৰ্ণ হৈ সাফল্য অৰ্জন কৰে।
ৰঙাদৰিয়া উচ্চতৰ মাধ্যমিক বিদ্যালয়ৰ মুঠ ৫৯ জন ছাত্ৰ-ছাত্ৰীৰ ভিতৰত প্ৰথম বিভাগত ১০ জন, দ্বিতীয় বিভাগত ৩৮ জন আৰু তৃতীয় বিভাগত ১১ জন ছাত্ৰ-ছাত্ৰী উত্তীৰ্ণ হয়।
একেদৰে মৰিগাঁও উচ্চতৰ মাধ্যমিক আৰু বহুমুখী বিদ্যালয়তো বিজ্ঞান শাখাত এশ শতাংশ ছাত্ৰ-ছাত্ৰী উত্তীৰ্ণ হয়। মুঠ ৪২ জন ছাত্ৰ-ছাত্ৰীৰ ভিতৰত এজন ষ্টাৰসহ ৬ জন প্ৰথম বিভাগত, ২৯ জন দ্বিতীয় বিভাগত আৰু ৭ জন ছাত্ৰ-ছাত্ৰীয়ে তৃতীয় বিভাগত উত্তীৰ্ণ হয়।
তদুপৰি বিদ্যালয়খনৰ কলা শাখাত ৬৯.৩৪ শতাংশ আৰু বাণিজ্য শাখাত ৯৭ শতাংশ ছাত্ৰ-ছাত্ৰী উত্তীৰ্ণ হয়। আনহাতে মৰিগাঁৱৰ ঐতিহ্যময় মহাবিদ্যালয় মৰিগাঁও মহাবিদ্যালয়ৰ ফলাফল অনুসৰি কলা শাখাত ৯৫ শতাংশ আৰু বিজ্ঞান শাখাত ৮৬. ৫০ শতাংশ ছাত্ৰ-ছাত্ৰী উত্তীৰ্ণ হয়।
কলা শাখাৰ মুঠ ১৪১ জন ছাত্ৰ-ছাত্ৰীৰ ভিতৰত ১৩৪ জন ছাত্ৰ ছাত্ৰী উত্তীৰ্ণ হয়। ইয়াৰে ২৮ জনৰ ষ্টাৰ নম্বৰসহ ৯৪ জন ছাত্ৰ-ছাত্ৰীয়ে প্ৰথম বিভাগত উত্তীৰ্ণ হয়। বিজ্ঞান শাখাত মুঠ ৯৬ জন ছাত্ৰ-ছাত্ৰীৰ ভিতৰত ৮৩ জন ছাত্ৰ-ছাত্ৰী উত্তীৰ্ণ হয়। ইয়াৰে ৯ জনৰ ষ্টাৰ নম্বৰসহ ৩৭ জন ছাত্ৰ-ছাত্ৰীয়ে প্ৰথম বিভাগত উত্তীৰ্ণ হয়।
উল্লেখ্য যে জিলাখনৰ অন্য প্ৰায়বোৰ শিক্ষানুষ্ঠানেও উন্নত ফলাফল প্ৰদৰ্শন কৰিবলৈ সক্ষম হোৱা বুলি জনা গৈছে। ইফালে ৰঙাদৰিয়া উচ্চতৰ মাধ্যমিক বিদ্যালয়ৰ ফলাফলক লৈ সমগ্ৰ হাবিবৰঙাবাৰী অঞ্চলত এক আনন্দ উল্লাস সৃষ্টি হোৱাৰ মাজতেই এই ফলাফলক অভিনন্দন জ্ঞাপন কৰিছে অমম জাতীয়তাবাদী যুব ছাত্ৰ পৰিষদৰ হাবিবৰঙাবাৰী আঞ্চলিক সমিতিৰ হৈ উপদেষ্টা মিৰ্জা আৰিফ আলম, সভাপতি জ্যোতি নাথ আৰু সম্পাদক ৰাজামনি আলীয়ে।