মোৰাঝাৰঃ দুবছৰজোৰা দীঘলীয়া সংঘাতপূৰ্ণ পৰিৱেশৰ অৱসান ঘটাই দেওবাৰে ঐতিহ্যবাহী অসম দাৰুল হাদীছ জয়নগৰ মাদ্ৰাছাৰ পূৰ্ণাংগ পৰিচালনা সমিতিখন গঠন কৰা হয়৷ হোজাই জিলাৰ উপায়ুক্ত তন্ময় প্ৰতীম বৰগোহাঞিৰ সঞ্চালনাত মাদ্ৰাছা চৌহদতে কালি অনুষ্ঠিত এখন জনকীৰ্ণ সাধাৰণ সভাত অৱসৰপ্ৰাপ্ত গ্ৰামোন্নয়ন বিষয়া নজৰুল ইছলামক সভাপতি আৰু পূৰ্বৰ সাধাৰণ সম্পাদক (মুহতামিম) মৌলানা সামছুল ইছলামক পুনৰ সাধাৰণ সম্পাদক হিচাপে বাচনি কৰি ৫১ জনীয়া কাৰ্যনিৰ্বাহক সমিতি গঠন কৰা হয়৷
উক্ত সমিতিখন মাদ্ৰাছা পৰিচালনাৰ ক্ষেত্ৰত সৰ্বোচ্চ ক্ষমতাধাৰী সমিতি হ'ব৷ কাৰ্যনিৰ্বাহক সমিতিয়ে ইয়াৰ পৰৱৰ্তী বৈঠকত ২১ জনীয়া মূল কাৰ্যকৰী সমিতি গঠন কৰিব৷ এই সমিতিখনে মাদ্ৰাছাৰ প্ৰশাসনীয় কাম-কাজসমূহ পৰিচালনা কৰিব৷ ১৯৩২ চনত স্থাপিত এই মাদ্ৰাছাখন অসমৰ অন্যতম প্ৰাচীন ইছলাম ধৰ্মীয় উচ্চ শিক্ষাৰ প্ৰতিষ্ঠান৷
দুবছৰমান পূৰ্বে পৰিচালনাক কেন্দ্ৰ কৰি সদস্যসকলৰ মাজত আভ্যন্তৰীণ সংঘাত সৃষ্টি হোৱাৰ পিছত হোজাই জিলাৰ সেই সময়ৰ উপায়ুক্ত ডঃ মানৱেন্দ্ৰ প্ৰতাপ সিঙে মাদ্ৰাছা পৰিচালনাৰ যাৱতীয় দায়িত্ব নিজৰ হাতলৈ লৈ যায়৷ ডঃ সিঙৰ উদ্যোগতে মাদ্ৰাছা পৰিচালনাৰ বাবে এখন সংবিধান প্ৰস্তুত কৰা হয় আৰু উক্ত সংবিধানৰ বিধি অনুসৰি নতুন সমিতি গঠন কৰা হয়৷
উক্ত সভাত সভাপতি আৰু সাধাৰণ সম্পাদকৰ লগতে শিক্ষক মুস্তাফা আহমেদ আৰু অৱসৰপ্ৰাপ্ত বেংক বিষয়া জয়নাল আবেদিনক উপসভাপতি তথা শিক্ষক ৰছিদ আহমেদ আৰু আব্দুল মতিন চৌধুৰীক সহকাৰী সাধাৰণ সম্পাদক হিচাপে সৰ্বসন্মতিক্ৰমে মনোনীত কৰে৷
সভাপতিৰ ভাষণত উপায়ুক্ত তন্ময় প্ৰতীম বৰগোহাঁঞিয়ে কয় যে এটা প্ৰতিষ্ঠান গঢ় লৈ উঠাৰ অন্তৰালত অঞ্চলবাসী ৰাইজৰ অশেষ ত্যাগৰ অৱদান জড়িত হৈ থাকে৷ জয়নগৰ মাদ্ৰাছাৰ আন্তঃগাঁথনি দেখিলে এই অঞ্চলৰ ৰাইজৰ অৱদানৰ বিশালতা অনুভৱ কৰিব পাৰি৷ জয়নগৰ মাদ্ৰাছাক এখন মহান শিক্ষা প্ৰতিষ্ঠান আখ্যায়িত কৰি বৰগোহাঞিয়ে কয় যে দুখীয়া লোকৰ সন্তানক বিনা খৰছত শিক্ষা প্ৰদান কৰি জয়নগৰ মাদ্ৰাছা আৰু এই অঞ্চলৰ ৰাইজে যি মহান সেৱাৰ পৰিচয় দিছে, সেয়া বিৰল৷ অৱশ্যে শৈক্ষিক দিশত মাদ্ৰাছাখনে যথোপযুক্ত পথেৰে অগ্ৰসৰ হোৱাটো সময়ৰ দাবী বুলিও উপায়ুক্তগৰাকীয়ে মত প্ৰকাশ কৰে৷