তুলসীবাৰীঃ ৰাজপথেৰে আহি থকা হিন্দু ধৰ্মাৱলম্বী ব'ল বম ভক্তক মিঠাই খুৱালে মুছলমান যুৱকে৷ ধৰ্মীয় উৎসৱ ব'ল বমত অংশগ্ৰহণ কৰাৰ বাবে ৰঙিয়াৰ তুলসীবাৰীৰ পৰা যাত্ৰা আৰম্ভ কৰা এটি যুৱকৰ দলক মিঠাই খুৱাই শুভেচ্ছা যাচে মুছলমান যুৱকে৷
আজি ৰঙিয়াত দেগা গ'ল সম্প্ৰীতিৰ এই অনন্যা দৃশ্য। ৰঙিয়াৰ তুলসীবাৰীৰ পৰা বাবা বৈকুণ্ঠ ধামলৈ যাত্রা আৰম্ভ কৰা যুৱ ভক্তসকলক যাত্রা আৰম্ভৰ প্ৰাকক্ষণত একাংশ ইছলাম ধৰ্মাৱলম্বী লোকে মিঠাই খুৱাই শুভেচ্ছা জ্ঞাপন কৰে।
ব'ল বম ভক্তৰ দলটোক শুভেচ্ছা জ্ঞাপন কৰি তাৰিফুল ইছলাম নামৰ যুৱকজনে এইখন শংকৰ-আজানৰ পূণ্যভূমি বুলি উল্লেখ কৰি ইয়াত যুগ যুগ ধৰি হিন্দু-মুছলমানে একেলগে মিলা-প্ৰীতিৰে বস-বাস কৰি আহিছে বুলি মন্তব্য কৰে।
অঞ্চলটোত ঈদত হিন্দু ধৰ্মাৱলম্বী লোকসকলে ইছলাম ধৰ্মাৱলম্বী লোকসকলক শুভেচ্ছা দিয়াই নহয় ঈদৰ দিনাখন ইছলাম ধৰ্মাৱলম্বী লোকসকলৰ ঘৰে ঘৰে গৈ আতিথ্য গ্ৰহণ কৰি আনন্দ উপভোগ কৰে বুলিও যুৱকজনে কয়।
"এয়াই হ'ল আমাৰ অসমৰ পৰম্পৰা, সংস্কৃতি৷ হিন্দু-মুছলমানৰ মাজত যুগ যুগান্তৰ ধৰি চলি অহা সম্প্ৰীতি তথা ভাতৃত্ববোধ কোনেও ধ্বংস কৰিব নোৱাৰে।" তাৰিফুলে কয়।
শেহতীয়াকৈ একাংশ ন্যাস্ত স্বাৰ্থজড়িত মহলে ধৰ্ম-সম্প্ৰদায়ৰ নামত সমাজখন ভাগ-ভাগ কৰিবলৈ বিভিন্ন ধৰণৰ সাম্প্ৰদায়িক মন্তব্য কৰি অহা কাৰ্যতো উদ্বেগ প্ৰকাশ কৰে তাৰিফুল আৰু তেওঁৰ বন্ধুবৰ্গই।
তাৰিফুল আৰু তেওঁৰ বন্ধু বৰ্গৰ এনে পদক্ষেপক ভূয়সী প্ৰশংসা কৰিছে অঞ্চলটোৰ শান্তিপ্ৰিয় ৰাইজে।তাৰিফুলহঁতৰ দৰে নতুন প্ৰজন্মই সমাজখনত শান্তিৰ বাতাবৰণ গঢ়ি তুলিব লাগিব বুলিও মত ব্যক্ত কৰে কেবাগৰাকী বয়োজ্যেষ্ঠ লোকে।