নগাঁওঃ নগাঁও জিলাৰ ৰূপহীহাটত সোমবাৰে আৰক্ষীয়ে চলালে নিচাযুক্ত দ্ৰব্য বিৰোধী ব্যাপক অভিযান। ৰূপহীহাট আৰক্ষীয়ে কেইবাটাও স্থানত চলোৱা দিনজুৰা অভিযানৰ অন্তত ৰূপহীহাটৰ চাইদৰীয়াৰপৰা দুই ড্ৰাস্ক সৰবৰাহকাৰী আটক কৰিবলৈ সক্ষম হয়।
অভিযানকালত আৰক্ষীয়ে চাইদৰীয়াত স্থানীয় ৰাইজৰ সহযোগত দৌৰাই দৌৰাই আটক কৰে ধৃত দুই ড্ৰাগছ সৰবৰাহকাৰী যুৱকক। কুখ্যাত ড্ৰাগছ সৰবৰাহকাৰী কেইজন মাগুৰমাৰীৰ আইজুল ইছলাম আৰু ইশাদুল ইছলাম বুলি জানিব পৰা গৈছে।
উল্লেখ্য যে, এই ড্ৰাগছ সৰবৰাহকাৰীৰ বৃহৎ চক্ৰটোৱে দীৰ্ঘদিন ধৰি বৃহত্তৰ অঞ্চলটোত মাৰাত্মক ড্ৰাগছৰ ৰমৰমীয়া বেহা চলাই থকাৰ অভিযোগ উত্থাপন হৈ আহিছিল। তাৰেই পৰিপ্ৰেক্ষিতত ৰূপহীহাট আৰক্ষীৰ ভাৰপ্ৰাপ্ত বিষয়া কল্যাণ কুমাৰ গগৈৰ নেতৃত্বত সোমবাৰে চলিছিল ব্যাপক অভিযানটো।
অৱশ্যে আগন্তুক দিনবোৰতো বৃহত্তৰ ৰূপহীহাট অঞ্চলৰপৰা নিচাযুক্ত দ্ৰব্য নিৰ্মূলৰ বাবে আৰক্ষীয়ে এনেধৰণৰ অভিযান চলাই যাব বুলিও ৰাইজৰ আগত স্পষ্ট কৰে।