জয়ন্ত মুদৈ, নগাঁওঃ নগাঁও জিলাৰ বেবেজীয়াৰ সমীপৰ শেতালী চাৰিআলিৰ দিপালী বৰা নামৰ এগৰাকী নিঃকিন যুৱতীৰ ঘৰত কিছুদিনৰ পূৰ্বে এক দুষ্কাৰ্য সংঘটিত হৈছিল৷ খুব কষ্টৰে দুবেলা দুমুঠি খাই জীয়াই থকা দৰিদ্ৰ পৰিয়ালটোৰ ঘৰৰ চোতালৰ পকা ধানৰ মেজিত নিশা কোনো দুৰ্বৃত্তই জুই দি পিতৃহীনা দৰিদ্ৰ পৰিয়ালৈ অমানিশা নমাই আনিছিল৷

বিধৱা মাকৰ সৈতে থকা তিনিজনীয়া পৰিয়ালটোৰ দিপালীৰ ভায়েকটো মানসিকভাৱে বিকাৰগ্ৰস্ত৷ অবিবাহিত  এই দুৰ্ভগীয়া দিপালীয়ে ঘৰৰ পদুলিতে একেবাৰে সৰুকৈ এখন দোকান দি ঘৰখন চলাই আছে৷ বুকুত হাজাৰটা দুখৰ বোজা লৈয়ো তাই কাৰো ওচৰত হাত নপতাকৈ মাক-ভায়েকক পোহপাল দি আহিছে৷

বহু পুৰুষে কৰিব নোৱাৰা পথাৰৰ কাম তাই কৰি আহিছে৷ আনৰ পথাৰত হাজিৰা কৰাৰ উপৰিও নিজ হাতেৰে ঘৰৰ মাটি দুবিঘাত ধান খেতি কৰি পকা ধান চপাই আনি ঘৰৰ চোতালত মেজি কৰি ৰাখিছিল কেইদিনমান আগতে৷

কিন্তু সেই অভিশপ্ত নিশা কোনো পাষণ্ডই ঘৰৰ চোতালৰ দমাই থোৱা পকাধানৰ মেজিটোত জুই লগাই দিলে৷ জুয়ে পোৰা ধানখিনি চাই চাই দিপালীয়ে চকুপানী টুকি টুকি থুকাথুকি মাতেৰে মাত্ৰ প্ৰশ্ন কৰিছে--- "মোৰ ধানখিনি কিয় পুৰিলে? কাকো আজিলৈকো একো জগৰ লগাই পোৱা নাই। একো এষাৰ বেয়া কথা কৈ পোৱা নাই৷ এতিয়া নিজকে মানুহ বুলি ভাবিবলৈ টান পাইছোঁ৷" 

কি কাৰণত কোনে কিয় এই জঘন্য, অমানৱীয় কাণ্ড কৰিলে সেয়া এতিয়াও ৰহস্যৰ আৱৰ্তত। আৰক্ষীৰ তদন্তইও বাহিৰ কৰিব পৰা নাই এই দুষ্কাৰ্যৰ আঁৰৰ পাষণ্ডক৷

ইফালে, মানৱতাক লজ্জিত কৰা এই ঘটনা সংবাদ মাধ্যমত প্ৰচাৰ হোৱাৰ লগে লগে সৰ্বত্ৰে ব্যাপক প্ৰতিক্ৰিয়াৰ সৃষ্টি হৈছে৷ এনে দুষ্কাৰ্যক সকলোয়ে একেমুখে ধিক্কাৰ দিছে৷ এই ঘটনাৰ পাছৰেপৰা কাৰো ওচৰত হাত নাপাতি আনৰ ঘৰত হাজিৰা কৰি ৰোগগ্ৰস্ত বিধৱা মাতৃ আৰু ৰুগীয়া ভাতৃক সাহসৰে পোহপাল দি অহা অবিবাহিতা দীপালীক সাহস আৰু সহায় কৰিবলৈ তেওঁলোকৰ জুয়ে পোৰা চোতালত প্ৰতিদিনে হৃদয়ৱান লোকৰ আগমন ঘটিছে৷

বিভিন্ন দল-সংগঠন তথা ব্যক্তি বিশেষে দুৰ্ভগীয়া পৰিয়ালটোৰ কাষত উপস্থিত হৈ সমবেদনা জনোৱাৰ লগতে যোনে যেনেকৈ পাৰে সাধ্যানুসাৰে সহায়ৰ হাত আগবঢ়াইছে৷ ইয়াৰ অংশ হিচাপে শনিবাৰে স্বেচ্ছাসেৱী অনুষ্ঠান স্পৰ্শ, সাৰথি, অনুশীলন, প্ৰেছ ক্লাব, বেবেজীয়া, ক্ৰিয়েশ্বন আদিয়ে আৰ্থিক সাহায্য আৰু খাদ্য-সামগ্ৰী যোগান ধৰাৰ পাছত আজি হাতীচোং আঞ্চলিক ছাত্ৰ সন্থাৰ নেতৃৰ্ত্বত এটি সজাতি দল দুৰ্ভগীয়া দীপালীৰ গৃহত উপস্থিত হয়৷

গুড গাইডেন্স একাডেমী আৰু স্থানীয় ৰাইজৰ সহযোগিতাত সংগৃহীত আৰ্থিক সাহায্যৰ এটি টোপোলা সজাতি দলটোয়ে দীপালী বৰাৰ হাতত অৰ্পণ কৰাৰ লগতে পৰৱৰ্তী সময়ত পৰিয়ালটোক বিভিন্ন প্ৰকাৰে সহায়-সহযোগিতা আগবঢ়াই যোৱাৰ আশ্বাস প্ৰদান কৰে৷

ইফালে, দুৰ্ভগীয়া দিশহাৰা পৰিয়ালটোৰ এই দুৰ্যোগৰ সময়ত বিভিন্নৰ প্ৰান্তৰপৰা দল-সংগঠন আহি পৰিয়ালটোক সাহায্য প্ৰদানেৰে দুখৰ সমভাগী হৈ পৰিছে যদিও স্থানীয় বিধায়িকা আঙুৰলতা ডেকাই এই দুৰ্ভগীয়া পৰিয়ালটোৰ কাষত দুৰ্ঘটনাটো সংঘটিত হৈ যোৱাৰ এসপ্তাহ পাৰ হোৱাৰ পাছতো বৰ্তমানলৈকে উপস্থিত নোহোৱাটোয়ে ৰাইজৰ মাজত বিৰূপ প্ৰতিক্ৰিয়াৰ সৃষ্টি কৰিছে৷

সততে দুখীয়া ৰাইজৰ সহায়ৰ কথা কৈ অহা বহুবল্কী বিধায়িকা গৰাকীয়ে দৰিদ্ৰ পৰিয়ালটোৰ কাষলৈ আহি এষাৰ মাত দিবলৈ আহৰি নোপোৱা বিষয়টোৱে এতিয়া চৰ্চা লাভ কৰিছে সৰ্বত্ৰে৷

নিজৰ সমষ্টিৰ দৰিদ্ৰ লোকৰ দুৰ্যোগৰ সময়ত যদি বিধায়িকাগৰাকীয়ে দুখৰ সমভাগী হোৱাৰ প্ৰয়োজন অনুভৱ নকৰে তেন্তে তাতকৈ দুৰ্ভাগ্যৰ কথা একো হ’ব নোৱাৰে বুলি সচেতন লোকসকলে মন্তব্য প্ৰকাশ কৰিছে৷