নগাঁওঃ নগাঁও জিলাৰ পশ্চিম প্ৰান্তৰ হাতীযুঁজোৱাত সোমবাৰে হিন্দু-মুছলমান উভয় ধৰ্মৰ লোকে সম্প্ৰীতিৰ নিদৰ্শন দাঙি ধৰি জাতিধ্বংসী নাগৰিকত্ব সংশোধনী বিধেয়ক-২০১৬ ৰ বাতিলৰ দাবীত ৰাজপথত উলিয়ালে বিশাল জোঁৰ সমদল।
কৃষক মুক্তি সংগ্রাম সমিতি, অনুসূচিত জাতি সংগ্রামী যুৱ পৰিষদ, অসম জাতীয়তাবাদী যুৱ-ছাত্ৰ পৰিষদকে ধৰি কেইবাটাও সংগঠনে স্থানীয় ৰাইজৰ সহযোগত জোঁৰ সমদলৰ লগতে পথ অবৰোধ কৰি সাব্যস্ত কৰে প্ৰতিবাদ। ফলত বহু সময়ৰ বাবে স্তব্ধ হৈ পৰে নগাঁও-বটদ্ৰৱাৰ-ধিং সংযোগী অতি ব্যস্ততাপূৰ্ণ পথটো।
চৰকাৰৰ বিৰুদ্ধে বিভিন্ন শ্ল’গানেৰে আকাশ-বতাহ কঁপাই তুলি প্ৰতিবাদকাৰীসকলে জাতিধ্বংসী বিধেয়ক বাতিল নোহোৱা পৰ্যন্ত বিধায়িকা আঙুৰলতা ডেকাক বটদ্ৰৱা সমষ্টিত প্ৰৱেশ নকৰিবলৈ সকিয়াই দিয়ে। অন্যথা যদিহে সমষ্টিত প্ৰৱেশ কৰে তেন্তে ক’লা পতাকা আৰু অৰ্ধ উলংগ হৈ প্ৰতিবাদ জনাব বুলি হুংকাৰ দিয়ে প্ৰতিবাদকাৰীসকলে।
উল্লেখ্য যে, সততে ৰাইজৰ মাজৰে এগৰাকী বুলি জহাই ফুৰা বিধায়িকা আঙুৰলতা ডেকাই জাতিৰ এনে সংকটৰ সময়ত নীৰৱ ভূমিকা গ্রহণ কৰাত জাঙুৰ খাই উঠিছে বটদ্ৰৱা সমষ্টিৰ বিভিন্ন দল-সংগঠনৰ লগতে সচেতন মহল। ইয়াৰ কেইদিনমানৰ পূৰ্বেও কেইবাটাও জাতীয় সংগঠনে ৰাইদঙীয়াত বিধায়িকা আঙুৰলতা ডেকাৰ পুত্তোলিকা দাহ কৰি বটদ্ৰৱা সমষ্টিত বিধায়িকাগৰাকীৰ প্ৰৱেশ নিষিদ্ধ ঘোষণা কৰিছিল৷