নগাঁৱৰ গ্ৰাম্য এলেকাত কোনে চলাইছে সুৰাৰ ব্যৱসায়, পান দোকানতো আছে কম দামৰ সুৰাৰ বটল

নগাঁওঃ সাধাৰণতে বিভিন্ন উৎসৱ-পাৰ্বণত বহু সামগ্ৰীৰ লগতে বিলাতী সুৰাই বেছ গুৰুত্ব লাভ কৰে ৰাজ্য খনত৷ ঘাইকৈ আধুনিকতাৰ গ্ৰাসত ককবকাই থকা ডেকাচামে উৎসৱ-পাৰ্বণ বুলিলেই সুৰাৰ চাহিদা দুগুণে বৃদ্ধি কৰে৷ যাৰ পূৰ্ণ সুযোগ গ্ৰহন কৰি একাংশ অসাধু সুৰা ব্যৱসায়ীয়ে উৎসৱৰ বতৰত অতি নিম্নমানৰ বিলাতী সুৰাৰ ৰমৰমীয়া বজাৰ নিৰ্বিঘ্নে গঢ়ি তুলি নৱ-প্ৰজন্মক ধ্বংসৰ মুখলৈ ঠেলি দি আহিছে৷ 

সম্প্ৰতি ৰঙালী বিহুৰ আনন্দ-উছাহৰ গইনা লৈ নগাঁও জিলাটো সুবিধাবাদী চক্ৰই তেনে অবৈধ বিলাতী সুৰাৰ অবাধে ব্যৱসায় চলাই যোৱাৰ অভিযোগ উত্থাপিত হৈছে৷ প্ৰাপ্ত খবৰ মতে, জিলাখনৰ পশ্চিম প্ৰান্তৰ গ্ৰাম্য অঞ্চলত এখনো অনুজ্ঞাপত্ৰ থকা বিলাতী সুৰাৰ দোকান নথকাৰ অচিলা লৈ নগাঁও চহৰৰ এখন বহুল চৰ্চিত ৱাইন শ্ব’পৰ গৰাকীয়ে কৌশলেৰে গ্ৰাম্য অঞ্চলত সস্তীয়া বিলাতী সুৰাৰ বৃহৎ বজাৰ গঢ়ি তোলাৰ অভিযোগ উত্থাপিত হৈছে৷