জয়ন্ত মুদৈ, নগাঁওঃ নগাঁও জিলাৰ নগাঁও আৰু কলিয়াবৰ মহকুমাৰ অন্তৰ্গত বিভিন্ন স্থানত কৃষিভূমিতে গঢ়ি উঠিছে অৰ্ধ শতাধিক ইটা ভাটা। খেতি কৰা ভূমিৰ শ্ৰেণী পৰিবৰ্তন নকৰাকৈয়ে একমাত্ৰ ধনৰ লেনদেনৰ বিনিময়ত কৃষি ভূমিতে এই ইটাভাটা সমূহ চলাই থকা হৈছে যদিও এই সন্দৰ্ভত জিলা প্ৰশাসনে নিৰ্লিপ্ত ভূমিকাহে গ্ৰহণ কৰাৰ অভিযোগ উঠিছে।
হাজাৰ হাজাৰ বিঘা কৃষি ভূমি ব্যৱহাৰ কৰি এই ইটাভাটা সমূহ চলাই থকাত কৃষকৰ কৃষিভূমি স্বাভাৱিকতে সংকুচিত হৈ পৰিছে। লগতে এই ইটাভাটাৰপৰা নিৰ্গত ধোঁৱাই সংশ্লিষ্ট অঞ্চলৰ জন জীৱনলৈ চৰম ভাবুকি নমাই অনা পৰিলক্ষিত হৈছে। সংশ্লিষ্ট এলেকাৰ ৰাজহ চক্ৰ বিষয়া আৰু প্ৰদূষণ নিয়ন্ত্ৰন পৰিষদৰ বিষয়-ববীয়াক মেনেজ কৰি এই ইটাভাটা সমূহ চলাই থকাৰ বিস্ফোৰক অভিযোগ উত্থাপন কৰিছে আৰ টি আই কৰ্মী দিলীপ নাথে।
আৰ টি আই কৰ্মী গৰাকীয়ে আৰ টি আইৰ জৰিয়তে পোৱা তথ্যৰ ভিত্তিত নগাঁৱত এক সংবাদমেল সম্বোধন কৰি এই ভয়াৱহ কেলেংকাৰীৰ কথা সদৰী কৰে। আশ্চৰ্যকৰ কথা যে, জিলাখনৰ বিভিন্ন প্ৰান্তত কেইবাটাও অবৈধ ইটাভাটা শালিতলিৰ মাটিতে চলি থকা পৰিলক্ষিত হৈছে। আনকি ২০১৭ বৰ্ষতে নথি-পত্ৰৰ ম্যাদ উকলি যোৱাৰ পিছতো জিলাখনত চল্লিশটাৰো অধিক ইটাভাটা অবৈধভাবে চলি আছে। নগাঁৱৰ অবৈধ ইটাভাটা সমূহৰ এই অনিয়মৰ সন্দৰ্ভত তৎকালীন নিৰপেক্ষ এক তদন্তৰ দাবী জনাইছে স্থানীয় ৰাইজ তথা সচেতন মহলে৷