নগাঁওঃ ১৯৬৭ চনতে স্থাপিত নগাঁও জিলাৰ কাছমাৰী মৌজাৰ অগ্ৰণী শিক্ষানুষ্ঠান পলাশতল কাছমাৰী উচ্চ মাধ্যমিক বিদ্যালয়ৰ সোনালী জয়ন্তী সমাৰোহ বৃহস্পতিবাৰৰেপৰা তিনি দিনীয়া বিস্তৃত কাৰ্যক্ৰমণিকাৰে আৰম্ভ হৈছে৷
এক উলহ মালহ পৰিলৱেশত আজি পুৱা ৯ বজাত বিদ্যালয়ৰ পতাকা উত্তোলন কৰে বিদ্যালয় পৰিচালনা সমিতিৰ সভাপতি নৱজ্যোতি ডেকাই আৰু সোনালী জয়ন্তী সমাৰোহৰ পতাকা উত্তোলন কৰে উদ্যাপন সমিতিৰ সভাপতি ভীমাৰাম দাসে৷
একেসময়তে বিদ্যালয়ৰ প্ৰাক্তন শিক্ষক আৰু ছাত্ৰ-ছাত্ৰীৰদ্বাৰা এক বৰ্ণাঢ্য পৰিৱেশত আৰু ৫০ খন পতাকা উত্তোলন কৰা হয়৷ ইয়াৰ পাছতেই সোনালী জয়ন্তী উপলক্ষে নিৰ্মিত বিদ্যালয়ৰ স্থায়ী তোৰণ উন্মোচন কৰে চকলাঘাট উচ্চতৰ মাধ্যমিক বিদ্যালয়ৰ ভাৰপ্ৰাপ্ত অধ্যক্ষা বৃন্দামাই দেৱীয়ে৷
শ্বহীদ তৰ্পণ আৰু স্মৃতি তৰ্পণ কাৰ্যসূচীৰ শুভাৰম্ভ কৰে ক্ৰমে বিদ্যালয়ৰ প্ৰধান শিক্ষক ভূৱন চন্দ্ৰ ডেকা আৰু প্ৰাক্তন শিক্ষক হৰেণ কুমাৰ বৰাই৷ গ্ৰন্থমেলা আৰু প্ৰদৰ্শনীৰ দ্বাৰ উন্মোচন কৰে প্ৰাক্তন শিক্ষক প্ৰবীন চন্দ্ৰ ডেকাই৷ দিনৰ ১১ বজাত এটি বৰ্ণিল সাংস্কৃতিক শুভাযাত্ৰা উলিওৱা হয়৷ এই শুভাযাত্ৰাটি শুভ উদ্বোধন কৰে কাছমাৰী গাঁও পঞ্চায়তৰ সভাপতি পংকজ বৰাই৷
বিয়লি অনুষ্ঠিত হোৱা এক শিক্ষামূলক আলোচনা-চক্ৰত নগাঁও মহাবিদ্যালয়ৰ অধ্যক্ষ ড° শৰৎ বৰকটকী, বিশিষ্ট সাহিত্যিক শিৱানন্দ কাকতি আৰু ডিমৰীয়া মহাবিদ্যালয়ৰ অধ্যাপক মোহিনী মোহন ডেকা উপস্থিত থাকি বৰ্তমানৰ শিক্ষা ব্যৱস্থা বিষয়ক সাৰুৱা ভাষণ আগবঢ়ায়৷
আলোচনা-চক্ৰখন উদ্ধোধন কৰে শিক্ষাবিদ কুমুদ হাজৰিকাই৷ সন্ধ্যা বিদ্যালয়ৰ চৌহদত বন্তি প্ৰজ্বলনৰ শুভাৰম্ভ কৰে প্ৰাক্তন শিক্ষক থানুৰাম ডেকাই৷ কাইলৈ পুৱা ১১ বজাৰপৰা গুৰু শিষ্যৰ সন্মিলন অনুষ্ঠিত হ’ব৷ উক্ত অনুষ্ঠানতে স্মৃতি গ্ৰন্থ "সোনালী পলাশ" উন্মোচন কৰিব অসম সাহিত্য সভাৰ প্ৰধান সম্পাদক পদুম ৰাজখোৱাই৷