হেমন্ত কলিতা, নলবাৰীঃ ৰাজ্যত শক্তি বিভাগৰ অমনোযোগিতাৰ বাবে বাৰে বাৰে যে মানুহৰ প্ৰাণ হানি হৈ আহিছে সেয়া এশ শতাংশই সঁচা বুলি প্ৰমাণিত হ’বলৈ ধৰিছে বিভাগটোৰ কাণ্ডকাণ্ডত৷ 

শেহতীয়াকৈ বিভাগটোৰ একাংশ ঠিকাদাৰে বিদ্যুৎ বিভাগৰ কৰ্মচাৰীৰ লগত মিতিৰালি কৰি অতি নিম্ন মানৰ তাঁৰ আৰু গাৰ্ড নোহোৱাকৈ বিদ্যুৎ সৰবৰাহ কৰাৰ ফলত বহু দুৰ্ঘটনা হ’বলৈ লৈছে। এই অভিযোগ অসম জাতীয়তাবাদী যুৱ ছাত্ৰ পৰিষদ, বাহঁজানী আঞ্চলিক সমিতি, বাঁহজানী আঞ্চলিক ছাত্ৰ সংন্থা আৰু স্থানীয় ৰাইজৰ৷

জানিব পৰা মতে মঙলবাৰে দুপৰীয়া বাঁহজানীৰ (বেলশৰীয়াপাৰা) বুদ্ৰুকুছি ৬৬৪ নং প্ৰাথমিক বিদ্যালয়ৰ সমীপতে বিদ্যুৎ বিভাগৰ ১১ হাজাৰ ভল্টৰ তাঁৰ এডাল চিঙি স্কুলীয়া ছাত্ৰ-ছাত্ৰী আৰু বাটৰুৱা কথমপি ৰক্ষা পৰে৷ সময় তেতিয়া প্ৰায় ১ বাজিছে। বিদ্যালয়ো ছুটীৰ সময় হৈছিল। হঠাতে আঞ্চলটোৰ মাজেৰে পাৰ হৈ যোৱা ১১ হাজাৰ ভল্টৰ তাঁৰ এডালত জুই লাগি মাটিত চিঙি পৰা প্ৰত্যক্ষ কৰে আঞ্চলটোৰ এজন স্থানীয় লোকে। কিন্ত তেওঁ নিৰুপায়। কেনেকৈ এতিয়া কাক অৱগত কৰিব! বাটৰুৱাসকলক আহা যোৱা বন্ধ কৰি আৰু বিদ্যালয়ৰ ছাত্ৰ-ছাত্ৰীসকলক বিদ্যালয়তে আৱদ্ধ কৰি ৰখা হয়৷

অৱশেষত প্ৰায় আধাঘণ্টা মান পাছত বিদ্যুৎ বিভাগৰ কৰ্মচাৰীক ফোনযোগে কোৱাত লাইনটো বিচ্ছিন্ন কৰাবলৈ সক্ষম হয়৷ উল্লেখযোগ্য যে এই ১১ হাজাৰ ভল্টৰ তাঁৰেৰে বিদ্যুৎ সৰবৰাহ কৰাৰ সময়তে তাঁৰৰ তলত গাৰ্ড দিয়াৰ দাবী জনোৱা হৈছিল। কিন্তু তাকে নকৰি সেই সময়ৰ বিদ্যুৎ বিভাগৰ কৰ্মচাৰী আৰু ঠিকাদাৰে পুলিচ প্ৰশাসন আনি জোৰ জুলুমকৈ তাৰ সংযোগ কৰিছিল৷

পিছত গাৰ্ডসমূহ কৰি দিয়াৰ প্ৰতিশ্ৰুতি দিছিল যদিও সেয়া দুবছৰে কৰা নহ’ল৷ আজিও তাঁৰ চিঙি যোৱাৰ পাছত বিদ্যুৎ বিভাগৰ কৰ্মচাৰী আহিছিল যদিও তাঁৰসমূহ সংযোগ কৰাত স্থানীয় লোকে বাধা প্ৰদান কৰে৷ স্থানীয় লোক আৰু দল-সংগঠনৰ স্পষ্ট কথা, গাৰ্ড সম্পূৰ্ণকৈ দিয়াৰ পাছতহে তাঁৰ সংযোগ কৰিবলৈ দিয়া হ’ব।